Carta yuʼun Santiago 2:1-26
2 Kermanotak, te jaʼexe maʼyuk schʼuunel awoʼtanik ta stojol te Kajwaltik Jesucristo te ay yutsilal teme tsabilnax awuʼunik te machʼa lek ya awilike, ¿mabal jichuk?
2 Teme ay jtul winik te ay chʼokow* ta skʼab te pasbil ta oro sok te kʼax tʼujbil te skʼuʼ te ya xkʼot ta tsoblejetik awuʼunik sok teme ya xkʼot jtul pobre te ay yabakul* te skʼuʼe,
3 teme jaʼ lekxan ya awilik te machʼa kʼax tʼujbil te skʼuʼ sok te jich ya awalbeyik «Naklan liʼ ta banti te lekil lugar», pero teme jich ya awalbeyik stukel te pobre «Tekʼlan jilel liʼi» o «Naklan ta stsʼeel te skajtajib koke».
4 Teme jich ya apasik ini, ¿mabal tsabiluknax te machʼa lek ya awilik sok mabal jichuk kʼoemex te bin-utʼil juecetik te chopol* ya xchajpanwanike?
5 Aʼiya awaʼiyik stojol, kermanotak te kʼuxex ta koʼtane. ¿Mabal jaʼuk la stsa Dios te pobreetik ta sit te balumilal yuʼun jkʼulejetik ya xkʼotik ta swenta te schʼuunel yoʼtanik sok te ya x-akʼbot yichʼik te Wentainel* te jamal yaloj te ya yakʼbey te machʼatik kʼux ya x-aʼiyot yuʼune?
6 Pero, te jaʼexe apʼajojik te pobreetike. ¿Mabal jaʼuk te jkʼulejetik te ya yakʼbeyex awokolik sok te ya sjochex bael ta chajpajibaletike?
7 ¿Mabal yakuk sbolkʼoptaybeyik te yutsil sbiil te machʼa la yikʼexe?
8 Jich yuʼun, teme ya achʼuunik spasel te ley yuʼun te ajwalil jich te bin-utʼil ya yal te sJun Dios «Kʼuxukme xa awaʼiy ta awoʼtan te apatxujk jichnix te bin-utʼil kʼux ya awaʼiy aba te jaʼate», kʼax lek te jich yakex ta spasele.
9 Pero, teme ma xa akom abaik ta yakʼel ta ilel te ay machʼa tsabilnax awuʼunike, yakex ta sleel amulik sok jaʼnix ya yalbeyex te ley te yakex ta skʼaxuntayel te mantale.
10 Melel teme ay machʼa tsʼakal ya schʼuun spasel te bin ya yal te Ley, pero teme ay la skʼaxuntay junuk te mantalile, lame staix smul ta skʼaxuntayel spisil te bin ya yal te Leye.
11 Melel te machʼa jich la yal «Mame xa awaʼiy antsiwej sok mame xa awakʼ aba ta antsinel» jaʼnix jich la yal «Mame xa awaʼiy milaw». Jich yuʼun, teme maba ya awaʼiy antsiwej sok maba ya awakʼ aba ta antsinel, pero ya awaʼiy milaw, yame amulin ta skʼaxuntayel te bin ya yal te leye.
12 Jichukme ya xkʼopojex sok jichukme atalelik te bin-utʼil ya spasik te machʼatik ya yichʼik chajpanel ta swenta te ley te ya x-akʼawan ta libre.
13 Melel te machʼa maba ya snaʼbey yoʼbolil sba te yane maba ya yichʼ naʼbeyel yoʼbolil sba-euk te kʼalal ya yichʼ chajpanele. Te machʼa ya snaʼbey yoʼbolil sba te yane yame yaʼiy tsalaw te kʼalal ya yichʼ chajpanele.
14 Kermanotak, ¿aybal bin ya xlokʼ yuʼun-a te machʼa ya yal te ay schʼuunel yoʼtan teme maʼyuk yaʼtelule? ¿Yabal xkol yuʼun te jich ay te schʼuunel yoʼtan-abi?
15 Teme jtul hermano o jtul hermana maʼyuk skʼuʼ spakʼ sok maʼyuk sweʼel ta swenta jujun kʼajkʼal,
16 teme jich ay-abi, sok ay jtulex te jaʼex te jich ya awalbeyike «Lamalukme awoʼtan ya xbaat, ayukme lek akʼuʼ apakʼ sok makʼlina aba ta lek», pero teme maʼyuk bin ya awakʼbeyik ta swenta te bin ya xtuun yuʼun te sbakʼetal, ¿aybal bin ya xlokʼ-a?
17 Jaʼnix jich-euk, te chʼuunel oʼtanile lajem teme maʼyuk yaʼtelule.
18 Pero ayniwan machʼa jich ya yal: «Te jaʼate ay schʼuunel awoʼtan, yan te joʼone ya jpas lekil aʼtelil. Akʼbon kil te schʼuunel awoʼtan te maʼyuk yaʼtelul, te joʼone ya kakʼbat awil te schʼuunel koʼtan ta swenta te lekil aʼtelil ya jpase».
19 ¿Mabal achʼuunojuk te jun-nax Dios aye? Kʼax lek te jich achʼuunoje. Pero, jaʼnix jich schʼuunojik-euk te pukujetik sok ya xnijk yoʼtanik yuʼun.
20 Jaʼat te ma xa anaʼ kʼinal, ¿yuʼunbal ma xa anaʼ te maʼyuk bin ya xlokʼ-a teme maʼyuk yaʼtelul te schʼuunel awoʼtane?
21 ¿Mabal jichuk te toj la yichʼ ilel ta swenta yaʼtel te jtatik Abrahán te kʼalal la yakʼ te snichʼan Isaac ta skajtajib chikʼbil majtanil?
22 ¿Labal awil te la yakʼ ta ilel schʼuunel yoʼtan sok yaʼtelul sok te la yichʼ lekubtesel te schʼuunel yoʼtan ta swenta te yaʼtele?
23 Jich kʼot ta pasel te bin ya yal te sJun Dios te jich ya yal: «Te Abrahán la yakʼ schʼuunel yoʼtan ta stojol te Jehová,* jich toj ilot yuʼun». Jich la sbiilin amigo yuʼun Jehová.*
24 ¿Mabal jichuk ya awilik te toj ya yichʼ ilel te ants winik ta swenta te yaʼtel te ma jaʼuknax ta swenta te schʼuunel yoʼtane?
25 Jaʼnix jich kʼot ta stojol-euk te Rahab te j-antsinel* antse, ¿mabal jichuk te toj la yichʼ ilel ta swenta yaʼtel te kʼalal la yikʼ ochel ta sna te jtsajtaywanejetik sok te la stikunlan bael ta yan bee?
26 Jich te bin-utʼil te bakʼetalil te maʼyuk skuxlejale lajem-abi, jaʼnix jich lajem te chʼuunel oʼtanil teme maʼyuk yaʼtelule.
