Carta yuʼun Santiago 4:1-17
4 ¿Banti ya xtal awuʼunik te guerra sok te ya atsak abaik ta kʼope? ¿Mabal yakuk xjajch tal ta swenta te bin ya smulan spasel te bakʼet te yak ta yutsʼinel te awoʼtanike?
2 Te jaʼexe ay bin ya akʼanik, pero maba ya ataik. Ya xmilawanex sok ay sbikʼtal awoʼtanik, pero maba ya ataik te bin ya akʼanike. Ya atsak abaik ta kʼop sok ya ajachik guerra. Maʼyuk bin ataojik, melel maba ya akʼanik.
3 Te kʼalal ya akʼanike, maba ya x-akʼbotex, melel jaʼ ta swenta bintik chopol* te ya akʼanike, yuʼun jich ya apasik te bin ya smulan spasel te abakʼetalike.
4 J-antsinel* antsetik, ¿mabal anaʼojik te jaʼ skontrainel Dios teme jun ko’tan jbatik sok te balumilale? Jich yuʼun, machʼauk-a te jun yoʼtan sba sok te balumilal yak ta skontrainel te Diose.
5 O ¿yabal akuyik te maʼyuk swentail te kʼalal jich ya yal te sJun Diose: «Te snopojibal kuʼuntik jaʼ ya yakʼ te spisil-ora ay sbikʼtal koʼtantike»?
6 Pero, jaʼ kʼax bayalxan te slekil yoʼtan Dios te ma snujpʼuk ya kichʼtike. Jaʼ yuʼun, jich ya yal te sJun Dios: «Te Dios ya skontrain te machʼatik mukʼ skʼoplal ya skuy sbaik, yan stukel te machʼatik pekʼel yoʼtanik ya yakʼbey yil te slekil yoʼtan te ma snujpʼuk ya kichʼtike».
7 Jaʼ yuʼun akʼa abaik ta wentainel yuʼun te Diose, pero jaʼ xa akontrainik te Pukuje,* jichme ya x-an bael ta atojolik.
8 Noptsajanik* ta stojol Dios, jichme ya xnoptsaj ta atojolik-euk. Jmulawiletik, poka akʼabik; jchaʼlam-oʼtanetik,* sakubtesa awoʼtanik.
9 Mela awoʼtanik, pichʼilukme awoʼtanik sok okʼetaya abaik. Akʼa kʼatpʼujuk ta pichʼil oʼtanil te atseʼejike sok akʼa kʼatpʼujuk ta mel-oʼtan te stseʼelil awoʼtanike.
10 Pejkʼana abaik ta stojol te Jehová,* jichme ya smukʼubtesbeyex akʼoplalik.
11 Kermanotak, ijkitayaik te bitʼil talel kʼaxel chopol* akʼoplal ya awalbey abaike. Machʼauk-a te chopol ya yalbey skʼoplal te yermano o ya yichʼ ta kʼope jaʼ ya yalbey chopol skʼoplal te ley sok jaʼ ya yichʼ ta kʼop te leye. Teme jaʼat ya awichʼ ta kʼop te ley, maba yakat ta skʼotesel ta pasel te bin ya yal te ley, jich kʼoemat bitʼil juez.
12 Jtulnax Jpasley sok Juez, jaʼ te machʼa ya yakʼ kolel sok te ya xjuʼ ya xlajinwan. Pero te jaʼat, ¿machʼa ya akuy aba-a te ya awichʼ ta kʼop te apatxujke?
13 Aʼiya awaʼiyik jaʼex te jich ya awalik: «Yoʼtik o pajel ya xbootik ta mukʼul jpam lum, ya xjalajotik jun jaʼbil tey-a, yame kaʼiytik manbajel sok chonbajel, jich ya jpastik bayal ganar»,
14 manchukme ma xa anaʼik te bin ya xkʼot ta pasel ta pajel chaʼbej. Melel jichex te bitʼil sjab lumkʼinal te jtsʼin-nax* ya xchiknaj, patil ya xchʼay bael.
15 Jaʼ ya skʼan te jichuk ya awalike: «Teme jich ya skʼan te Jehová* sok teme kuxulotike, yame jpastik ini o yame jpastik te yane».
16 Pero, te jaʼexe ya atoy abaik ta swenta te bin ya awalik te mukʼ akʼoplalik ya akuy abaik yuʼune. Spisil toybail jich te bin-utʼil ini, ma lekuk.
17 Jich yuʼun, teme ay machʼa ya snaʼ spasel te bin leke, pero maba ya spas, jaʼ mulil ya xkʼot ta stojol.
Notaetik
^ O «ma lek».
^ O «Jmulawil».
^ O «Diabloe».
^ O «Jijtsʼajanik».
^ O «jchebal-oʼtanetik».
^ O «ma lek».
^ O «ajkʼnax».
