Carta ta stojol te Tito 1:1-16
1 Joʼon Pabloon, te j-abaton yuʼun Dios sok te jpuk-kʼopon yuʼun te Jesucristo. Te schʼuunel koʼtan jun-nax ay sok te schʼuunel yoʼtanik te machʼatik tsabilik yuʼun te Diose, jun-nax ay sok te smelelil kʼop, te jun skʼoplal ay sok te bin-utʼil ta ichʼel ta mukʼ te Diose,
2 spisil ini yichʼoj yip ta swenta te bin yakotik ta smaliyel, jaʼ te kuxlejalil ta sbajtelkʼinal, te bin yakotik ta smaliyele, namey yalojbeyix skʼoplal-a te Diose, te Dios ma spas lot stukel
3 (manchukme jich-abi, kʼot yorail te la yakʼ ta naʼel te skʼop ta swenta te scholel te skʼop te la yakʼbon kaʼtelin spasel te jaʼnix la yalbon ta mantal te Dios te Jkoltaywanej kuʼuntik).
4 Ya jtsʼibaybat ta atojol te carta ini, Tito, te jich kʼoemat te bin-utʼil mero jnichʼan te jich schʼuunel awoʼtan te bin-utʼil te schʼuunel koʼtankotike:
Ayukme ta atojol te slekil yoʼtan Dios te ma snujpʼuk ya kichʼtik sok te lamalkʼinal te talem ta stojol te jTatik Dios sok te Cristo Jesús te Jkoltaywanej kuʼuntike.
5 La kijkitayat ta Creta yuʼun ya atojobtes spisil te bintik ma lek yak ta pasele sok te ay machʼatik ya awakʼbey yichʼ yaʼtelik ta ancianoil ta jujunpam lum, jich te bin-utʼil la kalbat ta mantal te ya apase:
6 te anciano ya skʼan te maʼyuk smul ya yichʼ tabeyel, te jtuluknax yinam sok te jchʼuunjeletikuk te yal snichʼnab, te manchuk ya yichʼik albeyel skʼoplalik te jaʼ ya xbajt ta yoʼtanik spasel te bin ya skʼan yoʼtanik sok te ma schʼuunik mantale.
7 Te anciano* ya skʼan te maʼyuk smul ya yichʼ tabeyel, melel jaʼ swentainojbey te bin ay yuʼun te Diose, sok mame skʼan te jaʼnax ya spas te bin ya skʼan yoʼtan stukel, mame skʼan te oranax ya x-ilin, te manchuk ya xyakub, te manchuk ya xmajawan sok te manchuk ya xbikʼtaj yoʼtan yuʼun stael takʼin te ma stojiluke.
8 Yame skʼan ya x-otseswan ta sna, te kʼuxuk ta yoʼtan te bin lek ta pasel, te ayuk spʼijil yoʼtan, te tojuk yoʼtan, te junuk yoʼtan sok te yakuk snaʼ skomel sba.
9 Ya skʼan te jaʼuk ay ta yoʼtan te smelelil kʼop te kʼalal ya xnojpteswan, yuʼun jich ya xjuʼ ya yakʼbey smukʼul yoʼtan te yantik ta swenta te lekil nojptesel sok te ya skom te machʼatik ya skontrainik te smelelil kʼope.
10 Melel ay bayal winiketik te ya stoy sbaik te maʼyuk swentail te bin ya yalik sok te ya sloʼlayik te yantike, jaʼ kʼaxemtoxan jich ya spasik te machʼatik ayto skʼoplal ta yoʼtanik te circuncisione.*
11 Te winiketik ini ya skʼan ya yichʼik makbeyel te yeike, melel jaʼik te machʼatik yakik ta sjinel jujun familiaetik te kʼalal ya yakʼik ta nopel te bin ma lekuk yuʼun jich ya spasik ganar takʼin te ma stojiluke.
12 Ay jtul j-alwanej yuʼunik te jich la yal: «Te cretenseetik stalel jpaslotetik, pajalik sok jtiʼawal chambalametik te ya yakʼik wokol, chʼajil ants winiketik te jaʼnax baem ta yoʼtanik weʼel».
13 Smelelil te bin ya yale. Jich yuʼun mame xa akom aba ta yakʼtiklanbeyel tulan komel yuʼun jich lek ay te schʼuunel yoʼtanike
14 sok mame schʼam yaʼiyik stojol te lotil aʼiyejetik yuʼun te judioetik sok te mantaliletik yuʼun te winiketik te la yijkitayik te smelelil kʼope.
15 Te machʼatik lek yoʼtanik lek ya yilik spisil te bintik aye. Yan stukel te machʼatik boloben skʼoplalik te maʼyuk schʼuunel yoʼtanik maʼyuk bin lek ya yilik stukel, melel boloben te snopojibal yuʼunik soknix te bin ya x-albot yuʼun te yoʼtanike.
16 Ya yalik ta komonsitil te ya snaʼbeyik sba te Diose, pero ta swenta te yaʼtelik ya yakʼik ta ilel te ya spʼajike, melel ilaybilik sok ma schʼuunik mantal soknix maba lek ilbilik yuʼun Dios swenta ya spasik biluk lekil aʼtelil.
Notaetik
^ O «superintendente». Jaʼ te machʼa ya yil sok ya skanantay te yantike.
