Carta ta stojol te Tito 2:1-15
2 Pero, te jaʼate mame xa akom aba ta yalbeyel skʼoplal te bin jun ay skʼoplal sok te lekil nojptesele.
2 Te winiketik te ayix yaʼbilalik ya skʼan te ay spʼijil yoʼtanik ta swenta te bin ya spasike sok ya skʼan te yijubenukix te snopojibal yuʼunik, te ayuk spʼijil yoʼtanik sok te lekuk ay te schʼuunel yoʼtanik, te skʼuxul yoʼtanik sok te yakuk xkujch yuʼunik.
3 Jaʼnix jich, te antsetik te ayix yaʼbilalik ya skʼan te yakuk x-ichʼawanik ta mukʼ, te manchuk ya xleawanik ta kʼop, te manchuk mosoinbilik yuʼun bayal vino sok te jaʼuk ya yakʼik ta nopel te bin leke,
4 yuʼun jich ya stojobtesik* te antsetik te pekʼelxan yaʼbilalik swenta kʼuxuk ta yoʼtanik te smamalalik sok te yalatakik,
5 te ayuk spʼijil yoʼtanik, te maʼyuk bin chopol* ya snopik ta stojol te winiketik, te yakuk snaʼik lek aʼtel ta snaik, te lekuk yoʼtanik sok te ya yakʼ sbaik ta wentainel yuʼun te smamalalik, jich maba ya yichʼ bolkʼoptayel te skʼop te Diose.
6 Jaʼnix jich mame xa akom aba ta stojobtesel te keremetik yuʼun jich ya sta spʼijil yoʼtanik,
7 jaʼatnix akʼa ta ilel lekil ejemplo ta swenta spisil te lekil aʼteliletik ya apase. Yijubenukme te snopojibal awuʼun te kʼalal ya awakʼ ta nopel te bin lek skʼoplale
8 sok tuuntesa te lekil kʼop aʼiyejetik te ma xjuʼ ta kontrainel, yuʼun jich ya xkʼexawik te jkontrataktik te kʼalal maʼyuk bin chopol* ya stabotik ta alele.
9 Te mosoetik akʼa yakʼ sbaik ta wentainel yuʼun te yajwalik ta spisil te bin ya spasike: te jaʼuk ya spasik te bin lek yoʼtanik yuʼun, te manchuk chopoluk* ya sutbeyik skʼop
10 sok te manchuk ay bin ya yelkʼanbeyik, akʼa yakʼik ta ilel te ya xjuʼ ya xmukʼulinot yoʼtanik yuʼun te yajwalike, yuʼun jich ya stʼujbiltesik spisil te nojptesel yuʼun te Dios te Jkoltaywanej kuʼuntik.
11 Melel chiknajix ta ilel te slekil yoʼtan Dios te ma snujpʼuk ya kichʼtik te kʼalal la slebey skolel spisil te ants winiketike.
12 Jaʼ ini ya snojptesotik ta spʼajel te bintik ma xyakʼ ta ichʼel ta mukʼ te Dios sok te bintik mulantik sba ta balumilal sok te ayuk spʼijil koʼtantik te bin-utʼil ya xkuxinotik, te tojuk te bin ya jpastik sok te yakuk kichʼtik ta mukʼ Dios ta yolil te balumilal ini
13 te kʼalal yakotik ta smaliyel te bin smukʼulinoj koʼtantik te jelawen yutsil sok te kʼalal ya xchiknaj tal te yutsilal te mukʼul Dios sok te Jesucristo te Jkoltaywanej kuʼuntik.
14 Jaʼ la yakʼ sba ta lajel ta jtojoltik, jich la skoltayotik lokʼel ta spisil ta chajp te bin chopol,* yuʼun jaʼ ya schʼultes jun pueblo te jaʼnax yuʼun ya xkʼot sok te yoʼtanuk ya skʼan ya spas lekil aʼteliletik.
15 Mame xa akom aba ta yalbeyel skʼoplal spisil ini, ta tojobteswanej* sok ta komaw jich te bitʼil awichʼoj mukʼ awaʼtele. Mame ayuk machʼa ya awakʼ spʼajat.
Notaetik
^ O «snojptesik».
^ O «ma lek».
^ O «ma lek».
^ O «ma lekuk».
^ O «ya skontrain te ley».
^ O «yakʼel mukʼul oʼtanil».
