Carta ta stojol te Tito 3:1-15
3 Mame xa akom aba ta sjultesbeyel ta yoʼtanik te akʼa yakʼ sbaik ta wentainel yuʼun te ajwaliletik sok te machʼatik yichʼoj mukʼ yaʼtelik, sok akʼa schʼuunbeyik smantal, sok te chapalukik ta pasel spisil ta chajp lekil aʼteliletik,
2 te manchuk ay machʼa chopol* ya yalbeyik skʼoplal, te manchuk ya sjachik kʼop, te ma jaʼuk ya yakʼik ta chʼuunel te bin ya yalik sok te spisil-ora mansouk yoʼtanik ta stojol spisil te ants winiketike.
3 Melel ta namey ma jnaʼtik kʼinal-euk-a sok ma jchʼuuntik mantal-a, loʼlaybilotik-a sok mosoinbilotik yuʼun-a te bintik ya skʼan te jbakʼetaltik sok te bintik mulantik sba ta pasele, jaʼnax baem ta koʼtantik spasel-a te bintik chopol* sok nojel ta koʼtantik-a te bikʼtal oʼtanil, ilaybilotik-a sok talel kʼaxel ya jpʼaj jbatik-a.
4 Pero, te kʼalal chiknaj te slekil yoʼtan Dios te Jkoltaywanej kuʼuntik, sok te skʼuxul yoʼtan ta stojol te ants winiketike,
5 jaʼ la yakʼbotik jkoleltik (ma jaʼuk yuʼun te la jpastik lekil aʼteliletike, jaʼ ta swenta te la snaʼ yoʼbolil jbatik) ta skaj te la spokotik te jich kuxinotik yuʼune sok te kʼalal la yachʼubtesotik ta swenta te chʼul espiritue.*
6 Te Dios kʼax bayal la smal ta jtojoltik te chʼul espíritu* yuʼun ta swenta te Jesucristo te Jkoltaywanej kuʼuntike,
7 yuʼun jich te kʼalal toj ya kichʼtik ilel yuʼun Dios ta swenta te slekil yoʼtan te ma snujpʼuk ya kichʼtike, ya xjuʼ te ay bin pajal ya kichʼtik akʼbeyel te jun-nax ay skʼoplal sok te kuxlejalil ta sbajtelkʼinal te yakotik ta smaliyele.
8 Ya xjuʼ ya schʼuun koʼtantik te bintik la yichʼ alel ini, ya jkʼan te manchuk ya akom aba ta yaltiklanbeyel skʼoplal ini te machʼatik schʼuunojikix te Dios, yuʼun jich ma skom sbaik ta spaselxan lekil aʼteliletik. Lek skʼoplal spisil ini sok ya xtuun yuʼun te ants winiketike.
9 Ma xa achʼik aba ta kʼopetik te maʼyuk swentail sok ta yilbeyel skʼoplal te tsʼumbaliletike ni jaʼuk ta tsaktamba kʼop sok ta spasel kʼop ta swenta te Leye, melel ma xtuun sok maʼyuk bin ya xlokʼ-a.
10 Teme ay machʼa ya yakʼ te jujunxajt ya awakʼ abaike, pʼajame, teme ma la schʼuun tojobtesel ta sbabial sok ta schebal buelta,
11 melel anaʼoj te la yijkitay te be te winik-abi sok yak ta sleel smul, sok jaʼnix yak ta sleel te castigo ta stojole.
12 Te kʼalal ya jtikun ta atojol te Ártemas o te Tíquico, pasa tulan yuʼun ya xbajt awilon ta Nicópolis, melel jnopoj te tey ya jkʼases-a te yorail sike.
13 Koltaya ta spisil te bintik ya xtuun yuʼun te Zenas —te ya snaʼ ta lek te bin ya yal te Ley— soknix te Apolos yuʼun jich maʼyuk swokolik-a te kʼalal ya xbeenike.
14 Pero, te machʼatik pajal schʼuunel koʼtantik soke akʼa snopikxan spasel lekil aʼteliletik ta spisil-ora swenta jich ya xkoltaywanik te kʼalal ay repentenax ya xtal tulan wokolil, yuʼun jich spisil-ora ay lek sit te yaʼtelike.
15 Ya stikunbat spatjibal awoʼtan spisil te machʼatik sjokinojonike. Akʼbeya spatjibal yoʼtan spisil te machʼatik kʼuxotik ta yoʼtan te pajal schʼuunel koʼtantik soke.
Ayukme ta atojolik te slekil yoʼtan Dios te ma snujpʼuk ya kichʼtike.
