KAKʼTIK TA ILEL TE JCHʼUUNEJTIK DIOSE
Ma xa apas te bin maba lek ta pasel kʼalal ya xpʼijubteswanat ta Biblia
Ma bayaluk ya xkʼopojat. Mame xa akuy te jaʼat spisil ya acholbey yaʼiye. Te Jesús la spas jojkʼoyeletik swenta la skoltay te ants winiketik yuʼun kʼot ta yoʼtanik te bin la skʼan la yakʼbey snaʼe (Mt 17:24-27). Te jojkʼoyeletike yame xkoltaywan swenta ma xchʼay sbujtsʼ ya yaʼiy ta snopel te Bibliae sok yame awil te bintik schʼuunej te machʼa yakat ta snojptesele soknix teme ya xkʼot ta yoʼtan te bin yak ta snopele (be-S paj. 253, parr. 3, 4). Kʼalal ya apasbey jojkʼoyele, naʼame smaliyel te sujtib ya yakʼbate. Teme maba ya snaʼe, ma xa awalbey te sujtibe, jaʼ lek pasbeya yan jojkʼoyel yuʼun jich ya akoltay ta snaʼel-a (be-S paj. 238, parr. 1, 2). Mame animal ya xkʼopojat swenta ya xkʼot ta yoʼtan te bin yachʼil yak ta snopel te machʼa awakʼbey snop te Biblia (be-S paj. 230, parr. 4).
Ma xa achujkultes te bin ya achole. Tsʼika aba te manchuk ya acholbey spisil te bintik ya anaʼ ta swenta te temae (Jn 16:12). Jaʼ xa awilik te bin-nix tulan skʼoplal ta parrafoe (be-S paj. 226, parr. 4, paj. 227, parr. 1). Kʼalal bayal bin ya yichʼ alel ta swenta te tema manchukme tʼujbilik ta aʼiyele ya xchʼay te bin-nix tulan skʼoplal-ae (be-S paj. 235, parr. 3). Teme kʼotix ta yoʼtan te bin mukʼ skʼoplale kʼaxan ta yan parrafo.
Ma bayaluk informasion xa awilik. Te bin ya jkʼantike jaʼ te ya xkʼot ta oʼtanil te bin ya kakʼtik ta nopele ma jaʼuknax te ya jkʼopontike (Lu 24:32). Tuuntesa te yip te Biblia kʼalal ya akʼopon te textoetik te tulan skʼoplal ta leccione (2Co 10:4; Heb 4:12; be-S paj. 144, parr. 1-3). Tuuntesa lokʼombakʼopetik te ya snaʼbey sbae (be-S paj. 245, parr. 2-4). Ichʼa ta wenta te bin chujkʼul ya yaʼiy sok te bin schʼuunej ta jujun jtul te machʼa yakat ta yakʼbeyel snop te Biblia sok tuuntesa te informasion ta swenta te bin yak ta kʼaxel ta stojole. Pasbeya jojkʼoyeletik jich bitʼil ini: «¿Bin ya anop ta swenta te bin la anop ta ora ini? ¿Bin ya anop ta swenta te Jehovae? ¿Bin-utʼil ya skoltayat teme ya apas ta akuxlejal te tsitsel ini?» (be-S paj. 238, parr. 3-5; paj. 259, parr. 1).