Teme tut kerem o tut achʼix la sjakʼbotik jkʼoptike, jaʼ lek te akʼa jojkʼoybeytik teme nakal te smeʼ statike, melel jich ya kakʼtik ta ilel te ya kichʼtik ta mukʼ te meʼil tatiletike (Pr 6:20). Teme ya yikʼotik ochel ta sna te tut kereme, mame skʼan ya jchʼuuntik. Teme ma xjuʼ xkʼopojotik sok te smeʼ statike, jaʼ lek ya kulaʼtaytik ta yan buelta.

Manchukme jaʼix jtul jchʼiel, jaʼ lek te ya jojkʼoytik teme nakal te smeʼ state. Teme maba jocholike, akʼa jojkʼoybeytik teme ya x-akʼbot permiso yuʼun te smeʼ stat swenta ya stsa te bin ya skʼan ya skʼopone. Teme ya x-akʼbot permisoe akʼa japbeytik junetik o kakʼbeytik yil te jw.org.

Kʼalal ya jchaʼulaʼtaytik te chʼiel te la smulan yaʼiyel te skʼop Diose, akʼa kalbeytik te ya jkʼantik ya xkʼopojotik sok te smeʼ state. Jich ya xjuʼ ya kakʼtik ta naʼel te bin yuʼun ya kulaʼtaytike sok ta swenta te lekil tsitsel ya yakʼ te Biblia ta stojol te familiae (Sl 119:86, 138). Kʼalal ya kichʼtik ta mukʼ te meʼil tatiletike lekme jkʼoplaltik yuʼun sok yame xjuʼ ya jcholbeytik yaʼiyik te lek yachʼil kʼop ta spisil te familia ta yan buelta (1Pe 2:12).