TEMA TA SBABIAL PÁGINA | MULANA SK‘OPONEL TE BIBLIA
¿Bin-utʼil ya amulan te bin ya akʼopone?
Swenta ya amulan skʼoponel te Bibliae mukʼ skʼoplal te yakuk anaʼ te bin-utʼil ya xjuʼ ya akʼopone. Kiltik cheʼoxebuk te bin ya xjuʼ ya apas swenta ya amulan skʼoponel.
Lea junuk Biblia te maba chujkul te bitʼil kʼasesbile. Maniwan ya amulan skʼoponel teme ay ya ata kʼopiletik te maba ya xkʼot ta awoʼtane sok te maba ya yichʼix tuuntesele. Jaʼ yuʼun, lea junuk Biblia te oranax ya xkʼot ta awoʼtan te kʼopiletik ya stuuntese. Jaʼnix jich, te tsʼakaluk sok smeleliluk te bin ya yale. *
Tuuntesa te yachʼil tecnología. Ta jkʼajkʼaleltik, te Bibliae maba jaʼnax ay ta junetik, jaʼnix jich ya jtatik ta electrónico. Ya xjuʼ ya akʼopon ta internet o ya apas descargar ta computadora, tablet o teléfono. Ay Bibliaetik te yichʼoj koltayel yuʼun ya kiltik yantik traduccionetik o yuʼun ya jpajtik versiculoetik sok yantik. Jaʼnix jich teme maba ya xjuʼ ya akʼopone, ya xjuʼ ya awaʼiy ta audio. Bayal machʼatik ya smulanik yaʼiyel te kʼalal ya xbajtik ta yaʼtelik, te kʼalal ya sakʼ skʼuʼ spakʼik o kʼalal ya spasik yan aʼtelil. ¿Banti amulan te jaʼate? ¿Bin yuʼun ma ya apas junuk?
Leaxan información. Ayme chajpanbil junetik te ya skoltayat yuʼun ya xkʼotxan ta awoʼtan te Bibliae. Jich bitʼil ay mapaetik te ya yalbey skʼoplal te lugaretik te ya xchiknaj ta relatoetik yuʼun te Biblia. Jaʼnix jich, ay cheʼoxeb articuloetik te lokʼem liʼ ta revista ini sok ta sección «Nojptesel ya yakʼ te Biblia» te ya jtatik ta Internet ta jw.org te ya skoltayat yuʼun ya xkʼot ta awoʼtan te bin ya yal te Bibliae.
Jela te bitʼil ya akʼopone. Teme wokol ya awaʼiy skʼoponel ta sjajchibal kʼalal ta slajibal te Bibliae, jaʼ lekxan te jaʼ ya akʼopon te banti ya amulane. Ya xjuʼ jaʼnax ya akʼopon ta swenta jtul j-abat yuʼun Dios ta namey kʼinal. Te recuadro « Nopaxan ta swenta te ants winiketik te ya yalbey skʼoplal te Biblia» ya xjuʼ ya skoltayat yuʼun ya awilbeyxan skʼoplal ta lek ini. Ya xjuʼ ya akʼopon ta jujun tema o xcholet ya akʼopon. ¿Yabal akʼan apas jich ini?
^ parr. 4 Bayal machʼatik ya yalik te smelelil, te tsʼakal sok te maba chujkul ta kʼoponel te Traducción del Nuevo Mundo de las Santas Escrituras. Te Biblia ini, jaʼ spasojik te stestigotak Jehová, sok kʼaxem ta 130 kʼopiletik kʼasesbil. Ya xjuʼ ya apas descargar ta Internet ta jw.org o pasa descargar te aplicación JW Library. O teme ya akʼane, ya xjuʼ ya yakʼbat junuk jtul testigo yuʼun Jehová.