TEMA TA SBABIAL PÁGINA | MULANA SK‘OPONEL TE BIBLIA
¿Yabal xjuʼ jkʼopontik te Bibliae?
«Jnopoj-a te wokol ya xkʼot ta koʼtan te bin ya yal te Biblia» (Jovy).
«Jich ya kil-a te maba tʼujbil ta kʼoponel te Bibliae» (Queennie).
«Kʼalal la kil te bayal página yichʼoj, maʼyuk la jkʼan la jkʼoponix-a» (Ezekiel).
¿Aybal jich anopoj-euk te bintik la yichʼix alele? Ayniwan la akʼan te ya akʼopon te Bibliae, pero ay bin la skomat. Ay bayal ants winiketik, ya yalik te kʼax wokol ta kʼoponel te libro ini. Pero ¿jichbal ya anopxan-a teme ya anaʼ te ya skoltayat yuʼun tseʼel awoʼtan sok te ay swentail ya xkʼot te akuxlejale? ¿Bin ya anop yuʼun teme ya awil te ay bayal bin-utʼil ya xjuʼ ya amulan skʼoponel? ¿Yabal ya akʼan awil te bintik kʼax tʼujbil ya xjuʼ ya yakʼbat anop te Bibliae?
Ilawil te bin ya yalik chaʼoxtul ants winiketik te jajchik ta skʼoponel te Bibliae sok la staik ta ilel te bayal bin lek ya xlokʼ yuʼunik-a te kʼalal ya skʼoponike.
Jich ya yal te Ezekiel, te kʼaxemix ta 20 yaʼbilale: «Ta nailal jich ya kaʼiy jba te bitʼil jtul ants winik te ya xbeen bael ta carretera te ma snaʼ banti ya xbajte, pero kʼalal la jkʼopon te Biblia ayix swentail ya kaʼiy te jkuxlejale. Melel yichʼoj tojobteseletik te ya xtuun kuʼuntik ta jujun kʼajkʼal».
Frieda, te jaʼnix jich kʼaxem ta 20 yaʼbilal, ya schol kaʼiytik: «Ta nailal oranax ya x-ilinon, pero jaʼ la skoltayon te bin la jkʼopon ta Bibliae, jich la jnaʼ skomel te kilinbae. Ta ora ini lekubenix te jtalele sok ay bayalxan kamigotak».
Jtul ants te Eunice sbiil te kʼaxemix ta 50 yaʼbilal jich ya yal: «Yakal skoltaybelon yuʼun ya jlekubtes te jtalele, jaʼnix jich la skoltayon ta yijkitayel te bintik maba lek kʼayemon ta spasele».
Te skʼoponel te Biblia ya xjuʼ ya skoltayat yuʼun ya amulanxan ta lek te akuxlejale, jich bitʼil te ants winiketik te la kalbeytikix skʼoplale sok bayalxan millón ta jtul (Isaías 48:17, 18). Jaʼnix jich, ya skoltayat yuʼun ya ata ta nopel ta lek te bin ya apase, ta stael lekil awamigotak, ta stsʼikel te estrés sok ya jnaʼbeytikxan sba te Jpaswanej kuʼuntike, jaʼ te bin kʼax mukʼxan skʼoplale. Te tojobteseletik te ya jtatik ta Biblia talem ta stojol te Diose, jaʼ yuʼun teme ya jpas ta jkuxlejaltik jaʼme jlekiltik. Melel lek te tojobtesel ya yakʼe.
¿Bin-utʼil ya xjajchat ta skʼoponel? Ta yan artículo yame kiltik te bintik ya skʼan ya apas yuʼun ya xjajchat ta skʼoponel te Biblia sok te yakuk amulan skʼoponele.