¿Bin-utʼil ya xjuʼ amulan skʼoponel te Biblia sok te yakuk xtuun awuʼun te bin ya anop tey-a? Akʼa kiltik joʼchajp te bin spasojik te machʼatik ya skʼoponike.

Lea jun lugar. Lea te banti lamalnax kʼinal. Te banti maʼyuk bin ya schʼaytesbat awoʼtan sok te ayuk lek luz jichme ya xkʼot ta awoʼtan te bin ya akʼopone.

Kʼopona sok slekil awoʼtan. Te Biblia jaʼ jun majtanil te yakʼojbotik te Diose. Teme ya akʼan skoltayat ta akuxlejale, ijkitaya te toyba oʼtanile, akʼa aba ta nojptesel yuʼun te Diose jich bitʼil ya spas jtul alal te bayal bin ya skʼan snop ta stojol te state (Salmo 25:4).

Nail pasa oración. Te Biblia jaʼ yichʼoj te snopojibal yuʼun te Diose, swenta ya xkʼot ta koʼtantik ya skʼan ya jkʼanbeytik te koltayel yuʼune. Jaʼnix ya yal te ya yakʼbey te schʼul espíritu te machʼa ya xkʼanbot yuʼune (Lucas 11:13). Te schʼul espíritu ya skoltayat yuʼun ya xkʼot ta awoʼtan te bin ya snop te Diose. Ta patil yame xkʼotxan ta awoʼtan «te bila muquen ay ta yoʼtan stuquel te Diose» (1 Corintios 2:10, TZOXCH).

Kʼotuk ta awoʼtan te bin ya akʼopone. Mame jaʼuknax te ya akʼopone. Nopa awaʼiy ta swenta te bin yakat ta skʼoponele. Jojkʼoybey aba: «¿Bin tʼujbil talelil ay yuʼun te abat yuʼun Dios ta relato ini? ¿Bin-utʼil ya xjuʼ jpas ta jkuxlejal te bin yakon ta snopele?».

Ayuk bin ya xlokʼ awuʼun-a. Swenta yuʼun ya amulan skʼoponel te Bibliae, pasa tulan yuʼun ya slekubtesbat te akuxlejale. Te yakuk skoltayat yuʼun ya anaʼbeyxan sba ta lek te Diose, te lekil mamalalil o inamil ya xkʼoat, sok yantikxan. Ta patil lea ta Biblia te banti ya akʼan anaʼbeyxan skʼoplale. *

Te joʼchajp koltayeletik ini yame skoltayat yuʼun ya xjajch akʼopon, pero ¿bin-utʼil ya xjuʼ amulanxan ta lek skʼoponel te Bibliae? Yame kilbeytik skʼoplal ta yan artículo.