CAPÍTULO 8

¿Bin yilel stalel te lekil amigoe?

«Teme ilinemon, ay machʼa ya jkʼan kalbey yaʼiy. Teme ya jmel koʼtane, ya jkʼan te ay machʼa ya yakʼbon smukʼul koʼtan. Sok teme tseʼel koʼtane, ya jmulan te ay machʼa ya jcholbey yaʼiy. Jaʼ yuʼun ya kal te kʼax mukʼ skʼoplal te ayuk kamigotik» (Brittany).

AY MACHʼATIK ya yalik te ya skʼan sjoʼtak ta ixtaʼ o tajimal te alaletike, yan stukel te jchʼieletike ya skʼan yamigoik. Pero, ¿bin yuʼun te maba pajale?

Jtul ajoy ta tajimal ya sjokinat.

Jtul amigo ay lekil taleliletik yuʼun jich bitʼil te jaʼate.

Te Biblia, ya yal te smelelil amigoe «spisil ora ay scʼuxul yoʼtan, soc hich cʼohem te bin utʼil sbanquil ta yorahil wocol» (Proverbios 17:17). Jaʼ ini ya yakʼ kiltik te jaʼ kʼaxtoxan mukʼ skʼoplal, melel maba pajal sok te ay jtul sjoy ta tajimal o ixtaʼ te alale.

Ta melel, te kʼalal ya xmukʼubat bael ya skʼan te ayuk awamigotak te...

1. lekuk stalelik

2. yakuk schʼuunik spasel te lekil mantaliletik

3. lekuk te bin ya yakʼbatik anop

Jojkʼoyel: ¿Jichbal ya yakʼ ta ilel te awamigotak te bitʼil la kaltikixe? Kiltik ta jujun te bin ya skʼan ya yale.

Te sbabial bin ya skʼan ya awil: Lekuk stalelik

Te bin ya skʼan ya anaʼ. Maba spisil te machʼatik ya yalik te jaʼ awamigotak lek stalelik. Te sKʼop Diose ya yal: «Ay machʼatik te jun yoʼtan sbaik te ya xjinawanik» (Proverbios 18:24, Nueva Traducción Viviente [NTV]). Maniwan ya achʼuun ini. Pero nopa awaʼiy: ¿aybal ataoj jtul «awamigo» te la spuk ta alel te bin la awalbey, te la slabanat sok te la sleat ta kʼope? ¿Mabal jichuk te ya xjuʼ slajinbey skʼoplal te bitʼil lek awiloj abaike? * ¡Ma puersauk te ay bayal awamigotak, te bin mukʼ skʼoplale jaʼ te lekuk te stalele!

Te bin ya xjuʼ ya apas. Tsaa awamigotak te ay tʼujbil taleliletik yuʼun.

«Machʼauknax ya yal te lek stalel te kamiga Fiona. Ya jkʼan te jichuk jtalel sok te jichuk ya kichʼ albeyel jkʼoplal-euk. Kʼax lek ta tʼunbeyel te stalel» (Yvette, te 17 yaʼbilal).

Pasa ini:

1. Kʼopona te Gálatas 5:22, 23.

2. Jojkʼoybey aba: ¿Yabal yakʼ ta ilel te kamigotak te taleliletik yuʼun «te sit ya yacʼ te Espíritu»?

3. Tsʼibaybeya te sbiil te jtul awamigo. Jaʼnix jich tsʼibaya jun talelil te ay yuʼune.

Biilil

․․․․․

Talelil

․․․․․

Koltayel: Teme jaʼnax tal ta awoʼtan te chopol taleliletik yuʼune, jaʼniwan yorailix te ya ale yan awamigotak.

Te schebal bin ya skʼan ya awil: Yakuk schʼuunik spasel te lekil mantaliletik

Te bin ya skʼan ya anaʼ Maniwan ya anaʼ stsael ta lek te awamigotak, teme oranax ya ale. Jaʼnix jich mame skʼan chʼay ta awoʼtan te bin ya yal te sKʼop Diose: «Te machʼa ya sjoquin te machʼatic ma snaʼic qʼuinal, ya me sta swocol» (Proverbios 13:20). Te kʼopil «ma snaʼic qʼuinal» maba jaʼ te machʼatik maʼyuk lek spʼijilik o te maba lek scalificacionik ta escuela. Jaʼ te machʼatik ma schʼuunik kʼop sok te ya stoy sbaik. Maniwan ya akʼan awamigoin te machʼa jich stalele.

Te bin ya xjuʼ ya apas. Tsaa ta lek te machʼa ya xjuʼ ya awamigoin (Salmo 26:4). Jaʼ ini maba ya skʼan ya yal te ya apas jun grupo te chaʼoxtulnax machʼa ya x-och tey-a. Te bin ya skʼan ya yale jaʼ, te ya awil ta lek te yan yilel-a «te machʼa lec yoʼtan soc te machʼa chopol yoʼtan, te machʼa ya yacʼ sba ta aʼbatinel yuʼun Dios soc te machʼa ma ba ya yacʼ sba ta aʼbatinel yuʼune» (Malaquías 3:18).

«Tseʼel koʼtan te la skoltayon te jmeʼ jtat ta stael lekil kamigotak te tulan schʼuunel yoʼtanik sok te pajal kaʼbilal soke» (Christopher, te 13 yaʼbilal).

Akʼbeya sujtib te jojkʼoyeletik ini:

¿Yabal axiʼ te ya stenat te awamigotak ta spasel te bin maba leke?

□ Yak

□ Maʼuk

¿Yabal axiʼ te ya snop te ameʼ atat te maba lek te awamigotake?

□ Yak

□ Maʼuk

Koltayel: Teme la awal te yake, jaʼniwan lek te ya ale yantik awamigotak, te lek stalelik sok te tulan schʼuunel yoʼtanik.

Te yoxebal bin ya skʼan ya awil: Lekuk te bin ya yakʼbatik anop

Te bin ya skʼan ya anaʼ. Te sKʼop Dios ya yal: «Te machʼatik chopolik te ya sjokinotik, jaʼ ya sjinbotik te lekil costumbreetik kuʼuntik» (1 Corintios 15:33, NTV). Jaʼ te bin kʼot ta pasel ta stojol te Lauren: «Jaʼ ya jkʼan te lek ya yilon te joʼtak ta escuela. Ta swenta te jtukel la kaʼiy jbae jajch jpas te bin ya yalbonik sok te bin ya spasike». Teme jaʼ ya apas te bin ya skʼan te yantike jaʼme jich ya xkʼoat te bitʼil te peón yuʼun te ajedrez te ya yixlanik jaʼ chikan bin-utʼil ya skʼanik. ¿Yabal amulan-abi?

Te bin ya xjuʼ ya apas. Mame xa ajokin te machʼatik jaʼnax ya skʼan te ya apas te bin ya yalike. Manchukme chaʼoxtulnax te awamigotak; pero jaʼ mukʼ skʼoplal te lek ya awaʼiy abae, jaʼnix jich ya xjuʼ ata lekil amigoetik te ya skoltayat ta spasel te bin leke (Romanos 12:2).

«Te Clint jaʼ jtul kamigo te kʼax lek. Spisil-ora ya xkʼot ta yoʼtan te bin-utʼil ya kaʼiy jbae sok ya yakʼbon smukʼul koʼtan» (Jason, te 21 yaʼbilal).

Akʼbeya sujtib te jojkʼoyeletik ini:

¿Yabal ajel te bitʼil ya alap te akʼuʼ apakʼ, te bitʼil ya xkʼopojat, te atalel, ta swentanax te lek ya yilat te awamigotake?

□ Yak

□ Maʼuk

¿Yabal xbaat ta lugaretik te maba lek, jaʼnax yuʼun te ya xbajt tey-a te awamigotake?

□ Yak

□ Maʼuk

Koltayel: Teme la awal te yake, kʼanbeya te ameʼ atat o yan te machʼa ayix yaʼbilal te yakuk skoltayat ta sleel awamigotak te lekuk te bin ya yakʼbatik anope. Sok teme testigoat yuʼun Jehová, kʼanbeya koltayel jtul anciano ta acongregacion.

YA ATAXAN INFORMACIÓN TA CAPÍTULO 9 YUʼUN TE SCHEBAL VOLUMEN

TA YAN CAPÍTULO

¿Aybal ataoj tsajel yuʼun ya apas te bin maba leke?

[Nota]

TEXTO TE MUKʼ SKʼOPLAL

«Ay machʼatic te cʼax hich jun yoʼtan sbahic te bin utʼil te machʼa jun smeʼ soque» (Proverbios 18:24).

PASA AWIL

Pasa tulan te lekuk atalele. Teme jich ya apase ya xnoptsaj ta atojol te machʼatik lek stalelik-euk. ¡Jaʼme lekil amigoetik abi!

¿ANAʼOJBAL-A?

Te Dios maba ya stsaawan, pero ya stsa ta lek te machʼa ya yamigoin (Salmo 15:1-5).

¡YA JPAS INI!

¿Bin ya jpas swenta ya jta lekil kamigotak? ․․․․․

Jaʼik ini te machʼatik ayix yaʼbilalik te ya jkʼan jnaʼbey-xan sbaik: ․․․․․

¿Bin ya jkʼan jojkʼoybey te jmeʼ jtat ta swenta ini? ․․․․․

¿BIN YA ANOP?

● ¿Bin talelil ay yuʼun te awamigo te ya amulanbey? ¿Bin yuʼun?

● ¿Bin ya xjuʼ ya apas swenta lekil amigo ya xkʼoat?

[Te bin ya yal]

«Te jmeʼ jtat la yalbonik te yakuk kijkitay ta sjokinel chaʼoxtul kamigotak. Ta sjajchibal maba la jchʼuun melel jnopoj-a te jaʼ lekil amigoetike. Kʼax lek te bin la yalbonike, melel ta patil la kil te ay bayal machʼatik ya xjuʼ ya kamigoin» (Carlos).

[Recuadro]

Te bintik ya xjuʼ ya apas-xan

Albeya yaʼiy te ameʼ atat. Jojkʼoybeya bin yilel stalel te yamigotak te kʼalal jchʼielikto-a. ¿Aybal maba lek yamigo la staik? ¿Bin yuʼun? Jojkʼoybeya bin ya xjuʼ ya apas yuʼun maba ya ata awokol.

Akʼbeya yil te ameʼ atat te awamigotak. Teme ya xiwat ta pasel, nopa bin yuʼun. ¿Yuʼunbal ya axiʼ te ay bin ya staik ta ilel te ameʼ atate? Teme jiche, yaniwan skʼan alexan lekil amigoetik.

Chʼama awaʼiy te bin ya yal te awamigotake. Akʼa ta ilel te mukʼ skʼoplal ya awil te bin ya snopik sok te lekuk ayike (Filipenses 2:4).

Kʼotuk ta awoʼtan sok pasa perdón. Naʼame te maba toj te awamigotak. Jich bitʼil ya yal Santiago 3:2: «Jpisiltic bayel buelta ya xjelawotic».

Mame xtenawanat. Akʼbeya stiempo te awamigotak. Te kʼalal ayat ta wokole yame skoltayat (Eclesiastés 4:9, 10).

[Foto]

Teme jaʼ ya apas te bin ya skʼan te yantike, jaʼme jich ya xkʼoat te bitʼil te peón yuʼun te ajedrez te ya yixlanik jaʼ chikan bin-utʼil ya skʼanik