CAPÍTULO 35

¿Bin-utʼil ya xjuʼ ya kamigoin te Diose?

Te kʼalal la sta swokol te Gabriel la sta ta ilel te kʼax mukʼ skʼoplal te ya yamigoin te Diose. Jich la yal: «Te jpapa la yijkitayotik jilel te kʼalal 12 kaʼbilal-ae. Ya xjul ta koʼtan te jun ajkʼabal te kʼalal ayon ta jcuarto-ae, la jkʼanbey te Jehová te yakuk sujt tal te jpapae».

Te kʼalal ay ta mel-oʼtan-ae, te Gabriel jajch skʼopon te Bibliae. La sta jun texto te banti ay machʼa jich la yalbey te Jehovae: «Ya yacʼ sba ta atojol te machʼa ma xhuʼ scanantaybel sba; haʼat jcoltaywanejat yuʼun te meʼbaʼ» (Salmo 10:14). Te Gabriel mero tijbot yoʼtan yuʼun te bin la skʼopone jich la yal: «Te kʼalal la jkʼopone, jich la kaʼiy te la yalbon te Jehová te jaʼ ya skoltayon sok te jaʼ jTate. Maʼyuk yan tatil jich bitʼil te Jehovae».

¿JICHBAL ay ta kʼaxel ta atojol te bitʼil te Gabriele? Chikan teme jich o maʼuke. Te Jehová yananix skʼan ya yamigoinat-a. Ilawil bin ya yal te Biblia: «Nohpojanic ta stojol Dios, hich ya xnohpoj ta atojolic» (Santiago 4:8). ¿Labal awil? Manchukme ma chikanuk ta ilel sok kʼax toyol ay. ¡Te Jehová ya skʼan ya yamigoinotik!

Pero, mame jichuknax ya kamigointik te Diose. Ay bin ya skʼan ya jpastik yuʼun ya xnoptsajotik ta stojol. Kaltik jun ejemplo. ¿Aybal bin atsʼunoj? ¿Bin ya skʼan ya apas swenta leknax ya xchʼi-a? Ya skʼan ya ale ta lek te banti ya awakʼe sok ya skʼan ya awakʼbey yaʼlel. Ya skʼan ya akanantay ta lek. Jaʼ jich kʼoem te yamigoinel te Jehovae. ¿Bin ya skʼan ya apas yuʼun ya awamigoin?

Nopa te Bibliae

Jich bitʼil te kʼalal ay machʼa ya akʼan ya awamigoin aba soke, ya skʼan ya akʼopon abaik sok te ya achʼambey aba awaʼiyik te akʼopike. Jaʼ pajal sok te kʼalal ya jkʼan ya kamigoin jbatik sok te Diose. Pero, ¿bin-utʼil ya kaʼiybeytik skʼop te Jehovae? Jaʼ te kʼalal ya jkʼopontik sok ya jnoptik te Bibliae (Salmo 1:2, 3).

Pero chʼajatniwan ta skʼoponel te Bibliae. Jaʼniwan ya amulanxan yilel te televisión, te tajimal sok te videojuegoetik o te ya xlokʼat ta paxial sok te awamigotake. Pero teme ya akʼan ya awamigoin te Diose, puersa ya skʼan ya akʼopon te Biblia yuʼun ya awaʼiybey te skʼope.

Mame xa akuy te kʼax chʼajiltik sba te skʼoponel te Bibliae. Manchukme ma kʼayemat ta skʼoponel jun, ya xjuʼ te kʼunkʼun ya xjajch amulan snopel te Bibliae. Pero te bin nail ya skʼan ya apase jaʼ te ya alokʼesbey stiempoil. ¿Binwan-utʼil? Ya xjuʼ ya apas te bin ya spas te Lais. Jich ya yal: «Kakʼojbey yorail te skʼoponel te Bibliae. Ya jkʼopon jun capítulo ta jujun sab». Te María te 15 yaʼbilal, jich ya yal: «Ta jujun ajkʼabal te kʼalal mato xboon ta wayel-ae ya jkʼopon jtsʼinuk te jBibliae».

Jaxan te jaʼate, ¿bin-ora ya akʼopon te aBibliae? Nail ila  te recuadro te ay ta página 292. Ta patil, tsʼibaya liʼi bin-ora ya xjuʼ ya akʼopon te aBiblia manchukme media horanax.

․․․․․

Pero aytome bin ya skʼan ya apasxan. Te kʼalal ya xjajch akʼopon te Biblia, ayniwan tulan ya awaʼiy te bin ya akʼopone. Jichniwan ya awaʼiy aba te bitʼil te Jezreel, jaʼ jtul jchʼiel kerem te 11 yaʼbilal jich ya yal: «Ay bintik ya jkʼopon ta Biblia te wokol ya xkʼot ta koʼtane». Pero mame xa akom aba. Julukme ta awoʼtan te jich ya awaʼiybey skʼop te Jehová te jaʼ lekil awamigoe. Teme ya apas tulan ta skʼoponel, yame xjajch amulan sok bayalme bin ya anop.

Pasa oración

Ta swenta te oración ya xjuʼ ya akʼopon te Diose. Jaʼ jun tʼujbil majtanil. Ya xjuʼ ya akʼopon chikan jayeb hora ta kʼajkʼalel o ta ajkʼabal. Te Jehová spisil-ora ya yaʼiybat te akʼope. Ya smulan yaʼiyel stojol te bin ya awalbeye. Jaʼ yuʼun te Biblia jich ya yal: «Aʼbeya snaʼ Dios spisil te bintic yac acʼambeyic, soc halbeyahic wocol Dios yuʼun» (Filipenses 4:6).

Jaʼ-abi ya skʼan ya yal te ya xjuʼ ya awalbey spisil te Diose, jich bitʼil te bintik ya amel awoʼtan yuʼun sok te awokole. Pero jaʼnix jich ya skʼan ya awalbey wokol. Melel te kʼalal ay bin ya spas ta jtojoltik te kamigotaktike, ya kaltik wokol yuʼun. Kʼaxtoxan jich ya skʼan ya apas ta stojol te Jehová, melel bayal bin spasoj ta atojol (Salmo 106:1).

Tsʼibaya te bintik ya akʼan ya awalbey wokol yuʼun te Jehovae.

․․․․․

Jaxan teme ay bin-ora jich ya awaʼiy te bayal bintik ya amel awoʼtan yuʼun o bayal te bintik ya axiʼe, ¿bin ya xjuʼ ya apas? Pasa te bin ya yal Salmo 55:22: «Aʼbeya Jehová te bin ay awocol yuʼun, ha me ya yaʼbat awip; mayuc bin ora ya yacʼ yahluc te machʼa toj yoʼtan».

Tsʼibaya junuk te bintik ya amel awoʼtan yuʼun te ya akʼan ya awal ta oración.

․․․․․

Ilawil bin-utʼil skoltayejat te Jehová

Aytoxan bin ya skoltayat yuʼun ya awamigoin te Diose. Te David jich la yal ta kʼayoj: «Pasahic prueba, ilawilic te ha lec yoʼtan te Jehová» (Salmo 34:8). Te David la stsʼibay te kʼayojil-abi te kʼalal mato jaluk kʼax tulan wokol ta stojol. Kʼan milotuk yuʼun te ajwalil Saúl. Ta skaj-abi la snakʼ sba ta skʼinal te filisteoetik te jaʼ skontratake, pero naʼbot sba yuʼunik. Jich yilel-a te tey ya yichʼ milel-ae. Pero maʼuk. ¿Bin-utʼil kol? La skʼatpʼun sba bitʼil winik te sojkem sjole (1 Samuel 21:10-15).

Pero te David maba la snop te stukelnax la skoltay sbae. Ta sjajchibal te kʼayojil la spase la yal te jaʼ koltayot yuʼun te Diose: «La jle te Jehová, la yaʼiybon jcʼop, la yacʼon ta libre yuʼun spisil te jxiwele» (Salmo 34:4). Ta swenta te bin kʼax ta stojol, jich la yal: «Pasahic prueba, ilawilic te ha lec yoʼtan te Jehová».

Nopa awaʼiy bin-utʼil ay skanantayojat te Jehová sok tsʼibaya. Tsʼibaya te bin lek kʼax ta atojol manchukme ma kʼax mukʼ skʼoplal yilel.

․․․․․

Ta jujuntul ya skʼan ya jpastik tulan ta yamigoinel te Diose manchukme te jmeʼ jtatik ay la snojptesotikix ta swenta te Bibliae. ¿Yakatbal ta spasel tulan ta yamigoinel te Diose? Teme matoe, te capítulo ini yame skoltayat. Maba atukel ya yijkitayat te Jehová sok ya skoltayat, jaʼ yuʼun te Biblia jich ya yal: «Cʼanahic, hich me ya xʼaʼbotex. Lehahic, hich me yac atahic ta lehel» (Mateo 7:7).

YAME ATABEYXAN SKʼOPLAL TA CAPÍTULO 38 SOK 39 TA VOLUMEN UNO

TA YAN CAPÍTULO

¿Yabal xiwat ta yalbeyel skʼoplal te Diose? ¿Bin ya xjuʼ ya apas yuʼun ya awalbey skʼoplal te bintik achʼuuneje?

TEXTO TE MUK‘ SK‘OPLAL

«Tseʼelnaxme yoʼtanik te machʼatik ya snaʼik te ya skʼan ya snopik te skʼop Diose» (Mateo 5:3, TNM).

PASA AWIL

Teme ya akʼopon chaneb página yuʼun te Biblia ta jujun kʼajkʼal, ya xlaj awuʼun ta jun jaʼbil.

¿ANAʼOJBAL-A?

Yakat ta skʼoponel te libro ini sok ya achʼuun te bin ya yal te Biblia, melel te Jehová ya skʼan te yakuk awamigoine (Juan 6:44).

¡YA JPAS INI!

Ya jpas ini yuʼun ya jnopxan ta lek te Biblia: ․․․․․

Ya jpas ini yuʼun ya jpasxan oración: ․․․․․

¿Bin ya jkʼan ya jojkʼoybey te jmeʼ jtat ta swenta te tema ini? ․․․․․

¿BIN YA ANOP?

● ¿Bin ya xjuʼ ya apas yuʼun ya amulanxan snopel te Biblia?

● ¿Bin yuʼun ya skʼan ya schʼam yaʼiy Jehová te oracione?

● ¿Bin-utʼil ya xjuʼ ya alekubtes te oración ya apase?

[Te bin ya yal]

«Te kʼalal chʼinonto-ae, jun-nax te bin ya kalulan ta oración-ae. Ta ora ini jaʼ ya kalbey skʼoplal te bin lek o ma lek kʼax ta jtojol ta jujun kʼajkʼale. Ma junukxanix te bin ya kalulane» (Eva).

 [Recuadro sok foto]

Ila bin yichʼoj te aBiblia

1. Tsaa junuk relato te ya amulane. Swenta ya xkʼot ta awoʼtan te bin ya akʼopone, kʼanbeya apʼijil te Jehovae.

2. Kʼun xa akʼopon. Mame animaltiknax ya akʼopon. Nopa awaʼiy te tey ayat-a: pasa tulan te yakuk awil kʼoem te bin ay ta kʼoel ta pasele, te ya awaʼiybey skʼop te machʼatik ya xkʼopojik, te ya awichʼbey yikʼ te bintik ay tey-a sok te yakat ta sweʼel kʼoem te weʼeliletike. Kʼalal jich ya apase, yame awiltiklan kʼoem te bin ayat ta skʼoponele.

3. Pasbeya aba jojkʼoyeletik. Kʼalal ay bin ya xlaj awoʼtan skʼoponel, jojkʼoybeya aba ini:

● ¿Bin yuʼun la yakʼ ta tsʼibayel te Jehová?

● ¿Machʼatik ya xjuʼ ya jtʼunbey stalel, sok machʼatik-a te ma lek stalelike?

● ¿Bintik la jnop te ya skoltayon ta jujun kʼajkʼal?

● ¿Bin la snojpteson ta swenta te Jehová?

4. Pasa oración. Cholbeya Jehová te bintik la anop sok te bin-utʼil ya akʼan ya apas ta akuxlejal. Sok albeya wokol yuʼun te Biblia.

[Foto]

«Ha tsumbil cʼahcʼ yuʼun coc te acʼope, ha ya sacubtes te be cuʼune» (Salmo 119:105).

[Recuadro sok foto]

Jaʼ nail xa apas te bin mukʼ skʼoplal

¿Jichbal ya awaʼiy te maʼyuk atiempo ta spasel oración sok ta skʼoponel te Biblia? Te bin ya skoltayate, jaʼ te ya anaʼ bin-a te mukʼ skʼoplale.

Jpas kiltik ini: Otsesa tonetik ta jun cubeta. Ta patil kojkonbeya ochel jiʼ jaʼto te kʼalal ya xnoje. ¿Bin yilel jil? Nojel ta ton sok ta jiʼ te cubetae.

Pasaxan awil yan buelta, pero jaʼ nail xa awotses te jiʼe, ta patil te tonetik. ¿Ochbal spisil te tonetik? Maʼuk, ¿melel? Jaʼ ta skaj te jaʼ nail la awotses te jiʼe.

¿Bin ya jnoptik? Teme jaʼ nail ya apas te bintik ma mukʼ skʼoplal jich bitʼil te tajimal o yantikxan, maʼyukix atiempo ta spasel te bintik mukʼ skʼoplal te jaʼ te bin ya smulan te Diose. Jaʼ yuʼun te Biblia ya yal te yakuk kiltik ta lek te bintik mukʼ skʼoplale (Filipenses 1:10). Teme ya achʼuun te consejo ini, ayme atiempo ta spasel te bin ya skʼanbat te Diose sok te ya apas te bintik ya amulane. Mame xchʼay ta awoʼtan: jaʼ nail xa apas te bintik mukʼ skʼoplal.

[Foto]

Te yamigoinel te Jehová pajal sok jpejt nichim te ya skʼan kanantayel swenta ya xchʼi-a