CAPÍTULO 37

¿Yabal skʼan ya kichʼix jaʼ?

Ala teme smelelil o lotil:

Spisil te j-abatetik yuʼun te Dios ya skʼan ya yichʼik jaʼ.

□ Smelelil

□ Lotil

Te bin swentail te ichʼjaʼ, jaʼ te ya skomotik ta spasel mulil.

□ Smelelil

□ Lotil

Te yichʼel jaʼ, jaʼ ya sjam jbetik yuʼun ya jta jkoleltik.

□ Smelelil

□ Lotil

Maba ya yichʼon ta kʼop te Dios teme maba kichʼoj jaʼe.

□ Smelelil

□ Lotil

Como yak ta yichʼbelik jaʼ te kamigotak ya skʼan ya kichʼix jaʼ-euk.

□ Smelelil

□ Lotil

¿YAKATBAL ta spasel ta akuxlejal te bin ya yal te Bibliae? ¿Yakatbal ta spasel tulan ta yamigoinel te Diose? ¿Yabal acholbey yaʼiy yantik te bin achʼuuneje? Teme yake, snujpʼ te ya akʼan ya awichʼix jaʼe, pero ta nail ya skʼan ya awil teme chapalatixe. Te bin ya skoltayat ta snaʼel te chapalatixe jaʼ te bin sujtib la awakʼbey te cuestionario la kiltik ta sjajchibale.

● Spisil te j-abatetik yuʼun te Dios ya skʼan ya yichʼik jaʼ.

Smelelil. Jaʼ jich la yal ta mantal te Jesuse (Mateo 28:19, 20). Jaʼnix jich la yichʼ jaʼ-euk te Jesuse. Jaʼ yuʼun, swenta ya atʼun te Cristo, ya skʼan ya awichʼ jaʼ kʼalal ya xkʼot ta awoʼtan te bin smakojbey skʼoplal te ichʼjaʼ sok teme seguro ayatix te ya akʼan ya awichʼ jaʼe.

● Te bin swentail te ichʼjaʼ, jaʼ te ya skomotik ta spasel mulil.

Lotil. Te ichʼjaʼ, jaʼ jun señail yuʼun ya yilik te ants winiketik te la awakʼix aba ta stojol te Jehová. Jich ya jpastik, melel jich ya jkʼan ya xkuxinotik te bitʼil ya yal ta mantal te Jehová, ma jaʼuknax yuʼun te ya skomotik ta spasel te bin ma leke, pero te ya smulan te koʼtantike.

● Jaʼ ya sjam jbetik yuʼun ya jta jkoleltik.

Smelelil. Jich bitʼil ya yal te Bibliae, kʼax tulan skʼoplal te ichʼjaʼ yuʼun ya jtatik te jkoleltik (1 Pedro 3:21). Manchukme jich-abi, ma jaʼuk ya skʼan ya yal te jaʼnax ya kichʼtik jaʼ yuʼun ya jkʼan ya jtatik te jkoleltik. Jaʼukme ya jpastik ta swenta te kʼux ta koʼtantik te Jehová sok te ya jkʼan ya x-abatinotik ta stojol sok spisil koʼtantik ta sbajtelkʼinal (Marcos 12:29, 30).

● Maba ya yichʼon ta kʼop te Dios teme maba kichʼoj jaʼe.

Lotil. Manchukme kichʼojtik jaʼ, o maʼuk te Santiago 4:17 jich ya yal: «Te machʼa snaʼoj te bin lec ta pasel, pero teme ma ba ya spas, ha smul abi». Jich yuʼun, nopa awaʼiy: ¿Kʼoembalix ta awoʼtan te bin ya skʼan ta atojol te Diose? ¿Jichbal ya awaʼiy te chapalatix yuʼun ya ata ta nopel te bin ya apas sok te akuxlejale? Teme jiche, ya xjuʼ ya awalbey yaʼiy te ameʼ atat o jtul hermano. Jaʼme ya skoltayatik yuʼun ya xjuʼ ya awichʼ jaʼ.

● Como yak ta yichʼbelik jaʼ te kamigotak ya skʼan kichʼix jaʼ-euk.

Lotil. Yame skʼan ya xlokʼ tal ta awoʼtan te ya awichʼ jaʼe (Salmo 110:3). Jaʼtome ya xjuʼ ya awichʼ jaʼ kʼalal ya xkʼot ta awoʼtan ta lek bin ya skʼan ya yal te ya xkʼoat ta testigo yuʼun Jehová sok teme seguro ayat te ya xjuʼ awuʼun skʼotesel ta pasel te bin la awalbey ta jamal te Diose (Eclesiastés 5:4, 5).

Kʼax mukʼ skʼoplal te ya jtatik ta nopel te ya kichʼtik jaʼe

Te ichʼjaʼ ya sjelontesbat akuxlejal sok ya sjambat abe yuʼun ya ata bayal bendicionetik. Pero, jaʼnix jich ayme ta awenta skʼotesel ta pasel te bin la awalbey ta jamal te Jehová te kʼalal la awakʼ aba ta stojole.

¿Nopolbal ya staix yorail te ya awichʼ jaʼe? Teme jiche, tseʼelukme awoʼtan yuʼun. Jaʼ jun mukʼul majtanil te ya x-abatinotik ta stojol te Jehová sok spisil koʼtantik sok te jujun kʼajkʼal ya kakʼtik ta ilel te kakʼoj jbatik ta stojole (Mateo 22:36, 37).

TA YAN CAPÍTULO

Ilawil bin-utʼil ya atuuntes te akuxlejale.

TEXTO TE MUKʼ SKʼOPLAL

«Yacuc awacʼ abaqʼuetalic scuenta cuxul chicʼbil mahtanil, te chʼultesbil soc te lec yoʼtan Dios yuʼun, te hich ya scʼan chʼuhuntayel awuʼunic te Diose» (Romanos 12:1).

PASA AWIL

Jojkʼoybeya te ameʼ atat te machʼa hermano o hermanailuk ya xjuʼ ya skoltayat yuʼun ya xchʼi te schʼuunel awoʼtane (Hechos 16:1-3).

¿ANAʼOJBAL-A?

Te ichʼjaʼ jaʼ jun te bin ya skʼan ya apas swenta ya awichʼ te «marca» te ya yakʼ kolel (Ezequiel 9:4-6).

¡YA JPAS INI!

Te bintik ya yakʼ ta nopel te Biblia te ya skʼan ya xkʼotxan ta koʼtan yuʼun ya xjuʼ ya kichʼ jaʼ: ․․․․․

¿Bin ya jojkʼoybey te jmeʼ jtat ta swenta-abi? ․․․․․

¿BIN YA ANOP?

● ¿Bin yuʼun te maba tajimaluk te ichʼjaʼe?

● ¿Bin yuʼun te ay jchʼieletik te oranax la skʼan yichʼik jaʼe?

● ¿Bin yuʼun te ay jchʼieletik te ma orauk ya yakʼ sbaik ta stojol Dios sok te ya yichʼik jaʼe?

[Te bin ya yal]

«Kʼalal ya jultes ta koʼtan te kichʼoj jaʼe, ya skoltayon yuʼun ya jpas te bin stojil sok jich maba ya jchʼik jba ta kʼop-a». (Noemí)

[Recuadro sok foto]

jojkʼoyeletik te ya spasbey sbaik ta swenta te ichʼjaʼ

¿Bin señail te ichʼjaʼe? Kʼalal ya awichʼ mulel ta jaʼ jich kʼoem te ya xlajate, te ya awijkitay spisil te bin ya skʼan awoʼtan-ae. Te kʼalal ya xlokʼat tal ta jaʼe, jich kʼoem te ya xkuxinat yan buelta, pero te jaʼ ya apasix te bin ya skʼan yoʼtan te Jehovae.

¿Bin ya skʼan ya yal te ya kakʼ jba ta stojol te Jehovae? Ya skʼan ya yal te ma awuʼunukix te akuxlejal, te jaʼ la awakʼbeyix ta skʼab te Jehovae (Mateo 16:24). Te kʼalal mato ya awichʼ jaʼ-ae, ya skʼan ya apas jun oración banti ya awalbey te Jehová te spisil-ora ya apasbey te skʼanojel yoʼtane.

¿Bin ya skʼan te yakalon ta spasel te kʼalal mato kichʼoj jaʼ-ae? Ya skʼan te yakuk apas ta akuxlejal te bin ya yal te Biblia sok te yakuk acholbey yaʼiy yantik te bintik achʼuuneje. Ya skʼan te ya anop te Biblia sok ya apas oración swenta ya awamigoin te Diose. Tulan skʼoplal te atukel ya xlokʼ tal ta awoʼtan te ya akʼan ya x-abatinat ta stojol te Jehová, ma jaʼuk yuʼun te ay machʼatik ya yalbat te yakuk awichʼ jaʼe.

¿Jayeb kaʼbilal ya skʼan ayuk kuʼun yuʼun ya kichʼ jaʼ? Ma jaʼuk mukʼ skʼoplal te jayeb awaʼbilale. Pero, ya skʼan te yijubenix te snopojibal awuʼun sok te kʼoemix ta awoʼtan te bin smakbeyoj skʼoplal te ya awakʼ aba ta stojol te Jehovae.

¿Bin ya skʼan ya jpas teme ya jkʼan ya kichʼix jaʼ, pero te jmeʼ jtat ya yalbonik te yakuk jmaliyxane? Teme ya yalbat te ameʼ atat te yakuk amaliyxan swenta ya apas ta akuxlejal te bin ya yal te Biblia, ichʼa ta mukʼ sok tuuntesa te tiempo-abi yuʼun ya awamigoinxan te Jehová (1 Samuel 2:26).

[Recuadro]

Pasa te bintik ya yal liʼ ini

¿yakat ta snopel te ya awichʼ jaʼe?

Te jojkʼoyeletik ini ya skoltayat yuʼun ya anaʼ teme ya xjuʼ ya awichʼix jaʼe. Te kʼalal mato awakʼojbey sujtib-ae, ¡nailme xa akʼopon te textoetik!

¿Yabal smukʼulin awoʼtan te Jehová? ¿Bin-utʼil yakat ta yakʼel ta ilel? (Salmo 71:5). ․․․․․

¿Yabal anaʼ stsajtayel te bin lek sok te bin ma lekuke? ¿Bin-ora jich awakʼoj ta ilel? (Hebreos 5:14). ․․․․․

¿Jayjayeb tiempo ya akʼopon te Dios? ․․․․․

¿Aybal bin jamal skʼoplal ya awalbey te Jehová ta oración? Te bintik ya awale, ¿yabal yakʼ ta ilel te kʼux ta awoʼtan te Jehová? (Salmo 17:6). ․․․․․

¿Bin-utʼil ya akʼan ya alekubtes te bitʼil ya akʼopon te Diose? ․․․․․

¿Jayjayeb kʼajkʼal ya anop te Bibliae? (Josué 1:8). ․․․․․

Te kʼalal ya anop te Bibliae, ¿bintik ya awilbey skʼoplal? ․․․․․

¿Bin ya akʼan ya apas sok ya awilbey skʼoplal te kʼalal ya anop te Bibliae? ․․․․․

¿Yabal anaʼ scholel skʼop Dios ta lek? (Jun ejemplo: ¿Yabal anaʼ scholbeyel skʼoplal te bintik nail ya skʼan nopel ta Bibliae? ¿Yabal achaʼulaʼtay te machʼatik la smulanik te skʼop Diose? ¿Yakalatbal ta spasel tulan yuʼun ay machʼa ya anojptes ta Biblia?).

□ Yak □ Maʼuk

¿Yabal xlokʼat ta scholel skʼop Dios manchukme maba ya xlokʼ stukel te ameʼ atate? (Hechos 5:42).

□ Yak □ Maʼuk

¿Bin ya akʼan ya apas ta swenta te scholel skʼop Diose? (2 Timoteo 2:15). ․․․․․

¿Spisilbal-ora ya xbaat ta tsoblejetik, o bayal buelta ya achʼay? (Hebreos 10:25). ․․․․․

¿Bin-utʼil ya xkoltaywanat ta tsoblejetik?

Teme yakʼojbat permiso te ameʼ atat, ¿yabal xbaat ta tsoblejetik te kʼalal ma xjuʼ ya xbajtike?

□ Yak □ Maʼuk

¿Yabal amulan spasbeyel skʼanojel yoʼtan te Diose? (Salmo 40:8). ․․․․․

□ Yak □ Maʼuk

¿Aybal bin-ora juʼ awuʼun sitintayel te tenele? (Romanos 12:2). ․․․․․

¿Bin ya akʼan ya apas yuʼun maʼyuk bin-ora ya xlaj te skʼuxul awoʼtan ta stojol te Jehová? (Judas 20, 21). ․․․․․

Teme ya yijkitayik Jehová te ameʼ atat o te awamigotak, ¿yatobal x-abatinatxan ta stojol te Jehová? (Mateo 10:36, 37).

□ Yak □ Maʼuk

[Foto]

Maba tajimal te ichʼjaʼ jich te bin-utʼil maba tajimaluk te nujpunele