ILAWIL te Caín sok te Abele. Pajal chʼiemikix. Te Caín jaʼ la smulan te tsʼumbajele. La smulan stsʼunel sbakʼ awal tsʼunubil sok sit teʼetik soknix itajetik, o boketik.

 Te Abel jaʼ la yaʼtelin schʼitesel tuminchijetik. Jaʼ la smulan skanantayel te alal tuminchijetike. Jaʼik ini ya xmukʼubik sok ya xkʼatpʼujik ta mukʼul tuminchijetik, sok maba jalaj ta esmajel, o te la spʼol sba te tuminchijetik yuʼun te Abele.

 La sta yorail te Caín sok te Abel te la yichʼbeyik bael smajtʼan te Diose. Te Caín jaʼ la yichʼ bael te sit yawal stsʼunube. Te Abel jaʼ la yakʼ ta majtʼanil te tuminchijetik yuʼun te banti lekike. Te Jehová lek la yil te Abel sok te majtʼanil yuʼune. Yan stukel te Caín maba lek ilot yuʼun te Jehová soknix te majtʼanil yuʼune. ¿Yabal anaʼ bin yuʼun?

 Ma jaʼuknax yuʼun te bitʼil jaʼ lek te majtʼanil te la yakʼ te Abele, jaʼ yuʼun te bitʼil kʼux ta yoʼtan te Jehová soknix te sbankile, melel lek yoʼtan stukel. Jaʼukmeto te Caine kʼax cholpol stukel, melel maba kʼux ta yoʼtan te yijtsʼine.

 Jich yuʼun te Dios la yalbey te Caín te akʼa sjel te stalele. Jaʼukmeto te Caín ma la yichʼ ta mukʼ te bin albot yuʼun te Diose. Kʼaxemtoxan ilin yuʼun, melel jaʼ lek la yichʼ ilel yuʼun Dios te Abele. Te Caín jich la yalbey te Abele: Konik ta akiltik. Te kʼalal tey ayikix ta stukelik-ae kʼax tulan la smaj, jich la smil te yijtsʼine. ¿Mabal jichuk ya awil te kʼax chopol te bin la spas te Caine?

 Manchukme laj te Abele, te Dios maba chʼayem ta yoʼtan stukel, jaʼ yuʼun te lek stalel stukele, sok te Jehová ma xchʼay ta yoʼtan te machʼatik jich stalel bitʼil ini. Jich yuʼun ya sta yorail te Jehová Dios te ya schaʼkuxajtes tal te Abele, ta yorail-abi maʼyuk bin ora ya xlajix-a. Yame xkuxin sbajtʼel kʼinal liʼ ta Balumilal. ¿Mabal jichuk te kʼax lek te ya jnaʼbeytik sba te machʼatik jich stalelik te bitʼil te Abele?

 Jaʼukmeto maba lek ya yil Dios te machʼatik jich stalel te bitʼil te Caine. Ta patil te kʼalal smilojix-a te yijtsʼin te Caine, te Dios la yakʼbey castigo jaʼ te bitʼil namal tikunot bael ta stojol te machʼatik ay yuʼune. Te kʼalal bajtʼ ta kuxinel ta yan kʼinal te Caine, la yikʼ bael jtul achʼix te yijtsʼiniwan te patil la yinamine.

 Te kʼalal kʼaxix-a te kʼajkʼale te Caín sok te yiname jajch staik yal snichʼnabik. Te yantik keremetik sok achʼixetik yuʼun te Adán sok te Evae nujpunik soknix la sta yal snichʼnabik euk. Jich la spʼol sba te ants winiketik ta Balumilale. Akʼa jnaʼbeytik sba chaʼoxtuluk.