SPISIL te bintik leke talem ta stojol te Diose. Jaʼ la spas te Kʼajkʼal yuʼun ya yakʼbotik sakal kʼinal ta kʼajkʼaleltik, te U sok te ekʼetik yuʼun ya yakʼbotik jtebuk sakal kʼinal ta ajkʼabal. Soknix te Balumilal yuʼun ya xkuxinotik tey-a.

 Jaʼukmeto te Kʼajkʼal, te U, te ekʼetik sok te Balumilal ma jaʼuk nail la spastiklan te Diose. ¿Yabal anaʼ te bin nail la spas te Diose? Jaʼ nail la spas te chʼul abatetike. Te chʼul abatetik ini ma xjuʼ kiltik, jich bitʼil te ma xjuʼ kiltik te Diose. Te Dios la spas te chʼul abatetik swenta yuʼun ya xjokinot ta kuxinel ta chʼulchan.

 Te sbabial chʼul abat te la spas te Diose jaʼ sba sNichʼan kʼot. Kʼax kʼambil yuʼun-a te sTate sok jaʼ aʼtej sok. La skoltay te Dios ta spasel spisil te bintik aye. La skoltay ta spasel te Kʼajkʼale, te Ue, te ekʼetike soknix te Balumilal kuʼuntike.

 Jich yuʼun, ¿bin yilel-a te Balumilal jiche? Ta sjajchibal maʼyuk machʼa ya xjuʼ xkuxin ta Balumilal-a. Jaʼnax nojel ta jaʼ ta swolol-a te Balumilale. Jaʼukmeto te Diose la skʼan te ya xkuxin ants winiketik ta Balumilal. Jich yuʼun jajch xchajpan ta jwentatik. ¿Bin jajch spas?

 Jaʼ te bitʼil la skʼan te ayuk sakal kʼinal ta Balumilal. Jich yuʼun te Dios la yakʼ tiluk xojobil Kʼajkʼal ta swolol te Balumilale. Jich chiknaj te kʼajkʼaleltik sok ajkʼabal. Ta patil te Dios la yakʼ lokʼuk tal ta maretik te lum kʼinale.

 Ta sjajchibal maʼyuk bin ay ta lum kʼinal-a. Jich yilel-a te bitʼil ya awil ta lokʼomba ini. Maʼyuk nichimetik, teʼetik sok chambalametik. Maʼyuk chayetik ta maretik. Jich yuʼun, bayal yaʼtel-a te Diose swenta lek ya xkuxinik-a te chambalametik sok te ants winiketik ta Balumilale.