Jaʼnax kuxinik jilel waxaktul te kʼalal kʼax te Pulemale, jaʼukmeto, te kʼalal kʼax bayal te jaʼbile bayal ta jmil la spʼol sba te ants winiketike. Te kʼalal kʼaxix-a te Pulemale, kʼax 352 jaʼbil, tey-abi ayin te Abraham (Abrahán). Ya jnoptik bael bin utʼil kʼot ta pasel te bin la yal te Dios te kʼalal la yakʼbey jtul snichʼan te Abraham te la sbiilin Isaac. Ta xchaʼtulul te snichʼnab te Isaac, jtulnax la yichʼ tsael yuʼun Dios te jaʼ te Jacobe.

 Te Jacob la sta bayal snichʼnab ay lajchayeb ta jtul keremetik sok chaʼoxtul achʼixetik soknix chaʼoxtul yinam. Te lajuntul snichʼnab te Jacobe la sbikʼtal oʼtantayik te José te yijtsʼinike, sok la schonik bael swenta yuʼun ya xkʼot ta mosoinel ta Egipto. Ta patil te José mukʼ skʼoplal kʼot, melel och ta ajwalil ta lum Egipto. Kʼalal tal tulan wiʼnal, te José ay bin la spas yuʼun la stsajtaybey yoʼtan te sbankiltak yuʼun jich la yil-a teme jelonix te stalelike. Ta patil spisil te machʼatik ay yuʼun te Jacobe, te israeletike, bajtʼik ta nainel ta Egipto. Jaʼ ini kʼot ta pasel te kʼalal kʼaxemix 290 jaʼbil yayinel-a te Abraham.

 Te 215 jaʼbil kʼax baele kuxinik ta Egipto te israeletike. Te kʼalal lajemix-a te José la yichʼik mosoinel ta Egipto. Kʼalal kʼax bael te jaʼbile ayin te Moisés sok tuuntesot yuʼun Dios swenta yuʼun ya slokʼes tal ta Egipto te israeletike. Smakoj 857 jaʼbil ta spisil te aʼyej ya yichʼ cholel ta XCHEBAL PARTE.