MA STSʼIJKIX yuʼun te Josee. La yalbey te j-abatetik yuʼun te akʼa lokʼukik bael ta spisilike. Te kʼalal stukel ayix sok–a te sbankiltake, jajch ta okʼel te Josee. Ya xjuʼ jnop ta koʼtantik te chamnax la yaʼiyik te sbankil yijtsʼinab, melel ma snaʼik te bin yuʼun te jajch ta okʼele. Te José jich la yal ta patil: Joʼon te Joseone. ¿Kuxultobal te jtate?

 Chamnax la yaʼiyik te sbankil yijtsʼinab te José te maʼyuk bin la yalikix yuʼune. Ayik ta xiwel. Jaʼukmeto jich la yal te Josee: Awokolukik noptsajanik tal ta jtojol. Te kʼalal noptsajik tale jich la yal: Joʼon te José te awijtsʼinonik te machʼa la achonik tal ta Egiptoe.

 Te José yaknanix ta kʼop sok yutsil yoʼtan-a: Ma xamel awoʼtanik yuʼun te la achononik tal liʼ ini. Ta melel jaʼ Dios te la yakʼon tal ta Egipto swenta skoltayel skuxlejal ants winiketik. Te Faraón la yakʼon ta ajwalil ta spisil skʼinal Egipto. Jaʼ yuʼun, baanik ta ora te banti ay te jtate sok albeyaik ini. Sok albeyaik te akʼa taluk ta nainel liʼ ini.

 Jich te José la smeytiklan te sbankil yijtsʼinabe sok la spetiklan jaʼnix jich la yujtsʼiylan ta spisil. Te kʼalal la snaʼ stojol te Faraón te kʼot te sbankiltak te José, jich la yalbey te Josee: Akʼa yichʼik bael carretaetik sok akʼa yikʼ tal te atatike sok spisil te jayeb machʼatik ay yuʼune soknix akʼa sujtukik tal liʼ ini. Jaʼ ya kakʼtiklambey te lekil kʼinal ta spisil Egipto.

 Jich la spasik te bin la yichʼ alele. Ya xjuʼ awil te José liʼ ini te yak ta spatbeyel yoʼtan te stat te kʼalal kʼotik ta Egipto sok spisil te machʼatik ay yuʼune.

 Kʼax bayalikix-a te machʼatik ay yuʼun te Jacobe. Ta spisilik 70 ta jtul te bajtʼik ta nainel ta Egiptoe, tey ajtaybil-a te Jacob, te snichʼnabe, soknix te smamtake. Jaʼnix jich tey ajtaybil euk-a te inamiletik sokniwan bayal ta jtul abatetik yuʼunik. Jich jajchik ta nainel ta skʼinal Egipto. La sbiilinik israeletik, melel te Dios yakʼojbeyix sbiilin Israel-a te Jacobe. Jich kʼotik ta lum yuʼun Dios te kʼax kʼambil yuʼune, jich te bitʼil ya kiltik bael ta patile.