TE KʼALAL sujt bael ta Egipto te Moisese, la scholbey yaʼiy te sbankil Aarón ta swenta te milagroetike. Te kʼalal te Moisés sok te Aarón la yakʼbeyik yil te milagroetik te israeletike spisil la schʼuun yoʼtanik te yuʼunix jokimbilik yuʼun-a te Jehovae.

 Jich yuʼun te Moisés sok te Aarón bajtʼ yilik te Faraón. Jich la yalbeyik: Te Jehová te Dios yuʼun Israel jich ya yal: Akʼa bael oxeb kʼajkʼal te lum kuʼune swenta yuʼun ya yichʼonik ta mukʼ ta banti jochol takin kʼinal. Jaʼukmeto te Faraón jich la yal: Ma jnaʼ machʼa-a te Jehovae. Sok maba ya kakʼ bael te israeletike.

 Ilin te Faraone, jaʼ yuʼun te bitʼil te israeletik kʼan slokʼesbeyik skʼajkʼalel ta yaʼtelik yuʼun ya yichʼik ta mukʼ te Jehovae. Jich yuʼun sujotikxan ta tulan aʼtel. Te israeletik la yakʼbeyik smulin te Moisés te bitʼil la yichʼik utsʼinele, jich yuʼun te Moisés bayal la smel yoʼtan yuʼun. Jaʼukmeto te Jehová la yalbey te Moisés te manchuk ya smel yoʼtane. Yananix yakʼbon lokʼel-a te lum kuʼun te Faraón, xchi te Jehovae.

 Te Moisés sok te Aarón chaʼsujt yilik te Faraón. Ta yorail-abi la spasik jun milagro. Te Aarón la schʼoj ta lum te snabateʼe jaʼ ini kʼatpʼuj ta mukʼul chan. Jaʼukmeto te pʼijil winiketik yuʼun te Faraone jaʼnix jich la schʼojik ta lum te snabateʼike jich kʼatpʼuj ta chanetik euk. Jaʼukmeto ¡ilawil! te snabateʼ te Aarón te kʼatpʼuj ta chane yak ta sbikʼtiklanel te chanetik yuʼun te pʼijil winiketike. Jaʼukmeto te Faraón mananix la skʼan yakʼ bael-a te israeletike.

 La sta yorail yuʼun te Jehová te bitʼil la yakʼbey yil te Faraón te jaʼnax ay yuʼel stukele. ¿Yabal anaʼ bin utʼil la yakʼbey yil? Jaʼ te bitʼil la yakʼ lajunchajp wokoliletik ta stojol te lum Egiptoe.

 Te kʼalal kʼaxemix chaʼoxchajp wokoliletik-ae, ta patil te Faraón la yikʼulan tal te Moisés sok jich la yalulambey ta jujun buelta: Koma te wokolile, jich ya kakʼ bael te israeletike. Jaʼukmeto te kʼalal ya xkom te jujun wokolile, ma spas te bin ya yale, jich ma xyakʼ bael te israeletike. Jaʼukmeto te kʼalal kʼaxix-a te slajunebal wokolile, albotik yuʼun te ya xjuʼ xlokʼik bael te israeletike.

 ¿Yabal anaʼ bintik-a te lajunchajp wokoliletike? Ya xkʼaxotik ta yan página sok ya kiltik bael ta jujunchajp.