TE LIBRO yuʼun aʼyejetik ini yuʼunix kʼoemik ta spasel-a, melel yichʼoj lokʼesel ta Biblia te libro te kʼax mukʼ skʼoplale. Te aʼyejetike ya scholbat awaʼiy jaʼto te bitʼil jajch spas Dios te bintik aye soknix te bintik yak ta kʼoel ta pasel ta kʼajkʼal ini. Jaʼnix jich ya yalbatxan te bin yato spas ta pajel chaʼbej te Diose.

 Te libro ini yame yakʼbat anaʼ te bin ya yal te Bibliae. Ya scholbat awaʼiy ta swenta ants winiketik te ya yalbey skʼoplal te Bibliae soknix te bintik la spas ta skuxlejalike. Jaʼnix jich ya yakʼ ta nopel te bin tʼujbil yaloj te Jehová ta swenta te ants winiketik te ya xkuxinik ta sbajtʼel kʼinal ta nichimal kʼinal ta Balumilale.

 Ay 116 aʼyejetik yichʼoj te libro ini. Lokʼem ta waxakeb parte. Ta sbabial página yuʼun te jujun partee ya scholbat awaʼiy jtebuk te bin ya yalbey bael skʼoplal te parte-abi. Te bin ya scholbey skʼoplal te aʼyejetike jich yichʼoj choltiklanel te bin utʼil kʼotik ta pasel ta nameye. Jichme ya yakʼbat anaʼ stojol-a te bin ora kʼot ta pasel te aʼyeje soknix te bin utʼil snitoj sba skʼoplal sok te yantik aʼyejetike.

 Te aʼyejetike jich tsʼibaybil te bitʼil ya xkʼopoj te alaletike. Bayalme ta jtul alaletik te ya xjuʼ ya skʼoponik ta stukeliknaxe. Te alnichʼanetik yame xbajtʼ smulanik te kʼalal ya xkʼopombot yaʼiyik bayal buelta yuʼun te smeʼ statike. Te libro ini bayal bintik tulan skʼoplal ya yalbey ta swenta jchʼieletik soknix ta swenta te machʼatik ayix yaʼbilalike.

 Ta slajibal te jujun aʼyeje yame yichʼ tael textoetik yuʼun Biblia tey-a. Jaʼ lek te yakuk akʼopon te textoetik te banti lokʼesbil skʼoplal te aʼyejetike. Te kʼalal ya xlaj ta nopel te jujun aʼyeje, jaʼnix jich ilawil te jojkʼoyeletik te yichʼoje sok pasa tulan ta stabeyel te sujtibe, jaʼik ini ayik te banti ya xlaj te Aʼyej 116.