TE AJWALIL Nabucodonosor la yikʼ bael ta Babilonia te israeletik te pʼijubtesbilik ta leke. Ta patil la stsa chaʼoxtul jchʼieletik te kʼax tʼujbilik sok te pʼijike. Ay chantul liʼ ta lokʼombae. Te jtule jaʼ te Daniele, te oxtulikxane jaʼ te Sadrac, Mesac sok te Abed-nego (Abednego) te jich akʼbotik sbiilik yuʼun te babilonioetike.

 Te Nabucodonosor la yakʼtiklan ta pʼijubtesel swenta yuʼun ya x-aʼtejik ta smukʼul na. Ta oxeb jaʼbil ta patil la stsa te machʼatik kʼax pʼijikxan swenta yuʼun ya xkoltayot ta schajpanel tulan kʼopetik. La skʼan te ayuk lek yipik te jchʼieletike, jich yuʼun la yal ta mantal te jaʼnix akʼa sweʼik sok akʼa yuchʼik euk te bin ya sweʼ te ajwalil sok te machʼatik ay yuʼune.

 Ilawil te jchʼiel kerem Daniele. ¿Yabal anaʼ te bin yak ta yalbeyel te Aspenaz, te j-abat te tulan yaʼtel akʼbil yuʼun te Nabucodonosore? La yalbey te ma skʼan ya sweʼ te bujtsʼan weʼeliletik te ya sweʼ te ajwalile. Jaʼ yuʼun la smel yoʼtan te Aspenaz, sok jich la yal: Te ajwalil yalojix ta mantal te bin ya aweʼike sok te bin ya awuchʼike. Sok teme maba lekatik ta ilel jich bitʼil te yantik jchʼieletike, yame xjuʼ ya smilon yuʼun.

 Jich yuʼun te Daniel la skʼopon te jkanan winik te jaʼ wentaimbilik yuʼun sok te oxtul yamigotak te jaʼnix yakʼoj te Aspenaze. Jich la yal te Daniele: Pasa prueba lajunebuk kʼajkʼal ta jtojolkotik, te jaʼnax ya awakʼ jweʼkotik itaj sok ya awakʼ kuchʼkotik jaʼ. Ta patil paja awil te jsit kelawkotik sok te yantik keremetik te ya sweʼik te weʼelil yuʼun te ajwalile, sok yame awil te machʼatik lekxan ta ilele.

 Lek la yaʼiy te bin la yichʼ albeyel te jkanan winike. Te kʼalal tsʼakaj te lajuneb kʼajkʼale, te Daniel sok te oxtul yamigotake jaʼ lekikxan ta ilel-a te sit yelawik te bitʼil te yantik jchʼieletike, jich la sweʼulanik itaj, ma jaʼuk te bin ya sweʼ te ajwalile.

 Te kʼalal tsʼakaj te oxeb jaʼbile spisil te jchʼieletik la yichʼik ikʼel bael ta stojol te ajwalil Nabucodonosor. Te kʼalal laj yoʼtan ta kʼop sok spisil, jich la yichʼik ilel yuʼun te ajwalil te jaʼ kʼax pʼijikxan te Daniel sok te oxtul yamigotake. Jich jilik ta jkoltaywanej ta sna te ajwalile. Jaʼ lajunebxan buelta la yichʼik tabeyel spʼijilik-a te Daniel, Sadrac, Mesac sok te Abed-nego ta swenta te jnaʼojeletik o te jpʼijil winiketik te kʼalal ya xtal te ajwalil ta bintik sjojkʼoyel sok te kʼalal ay kʼopetik yuʼune.