ILAWIL te Samuel te yak ta smalbeyel aceite ta sjol te winik ini. Jich ya yichʼ pasbeyel-a te kʼalal ay machʼa ya yichʼ tsael ta ajwalil-ae. Te Jehová la yalbey te Samuel te akʼa smalbey aceite ta sjol te Saule. Te aceite ini bujtsʼan yikʼ sok jaʼ kʼax lekxan ta swenta te yantik aceiteetike.

 Te Saúl ma xchʼuun yoʼtan teme yuʼunix jaʼ lekil ajwalil ya xkʼot-ae. Jich la yalbey te Samuel: Te joʼone stsʼumbalon Benjamín, te jaʼ kʼax tut kʼoem yuʼun spisil ta chajp stsʼumbal Israel. ¿Bin yuʼunix-a te ya awalbon te ya x-ochon ta ajwalile? Te Jehová lek la yilbey stalel te Saule, melel maba la skʼan te ya yichʼ ichʼel ta mukʼ sok te kʼax mukʼuk skʼoplale. Jich yuʼun te Jehová la stsa ta ajwalil.

 Jaʼukmeto te Saúl ma yuʼunuk ay ta meʼbail sok ma tut winikuk, melel spisil te machʼatik ay yuʼune jkʼulejetik. Jaʼnix jich kʼax tʼujbil sok najtʼil winik. ¡Maʼyuk jtul winik ta Israel te ya xkʼax ta snejkʼel te Saule! Jaʼnix jich ya x-animaj bayal sok kʼax bayal yip. Kʼax bayal sbujtsʼ kʼinal la yaʼiyik te ants winiketik te bitʼil och ta ajwalil te Saúl te tsaot yuʼun te Jehovae. Spisil jajchik ta aw: ¡Akʼa kuxajukxan bayal jaʼbil te ajwalil!

 Te skontratakik te israeletike yichʼojnanix yipik-a. Te kʼalal mato ayuk bayal kʼajkʼal yochel ta ajwalil-a te Saule, moik tal ta stojol te amonetike. Jaʼukmeto te Saúl la stsob bayal soldadoetik yuʼun, jich la stsalik ta guerra te amonetike. Kʼax bayal sbujtsʼ kʼinal la yaʼiyik te lum ta swenta te Saúl te ay ta ajwalil yuʼunike.

 Kʼalal kʼax bael te jaʼbile, te Saúl bayal la yaʼiy tsalaw sok te israeletike. Jaʼnix jich ay jtul snichʼan te ma xiw yoʼtane, Jonatán te sbiile. Te Jonatán la skoltay te israeletik ta tsalaw ta guerra. Te israeletik jaʼtonix skontratakik te filisteoetik te kʼax chopolike. Ta jun buelta bayal ta jmil filisteoetik te tal yakʼbeyik guerra te israeletike.

 Te Samuel la yalbey te Saúl te akʼa maliyotuk jaʼto teme kʼote yuʼun jaʼ ya yakʼbey chikʼbil majtʼanil ta stojol te Jehovae. Jaʼukmeto maba kʼot ta ora te Samuele. Te Saúl jajch ta xiwel la snop teme ay jajch ta akʼbeyel guerra yuʼun ta oranax te filisteoetike, jich yuʼun nailaj ta yakʼel te chikʼbil majtʼanile. Te kʼalal kʼot ta patil te Samuel, la yalbey te Saúl te la skʼaxuntay mantale. Jich la yal te Samuel: Te Jehová ya sle yan machʼa yuʼun ya x-och ta ajwalil ta stojol Israel.

 Kʼax te kʼajkʼale, te Saúl la schaʼkʼaxuntay mantal. Te Samuel jich la yalbey te Saúl: Jaʼ lekxan te xchʼuumbeyel smantal te Jehová te bin utʼil ya yichʼ akʼbeyel ta majtʼanil te lekil tuminchijetike. Ta swenta te bitʼil te maba achʼuunojbey smantal te Jehovae, ya slokʼesat ta ajwalil yuʼun Israel.

 Ta swenta ini ay bin ya xjuʼ ya yakʼ jnoptik. Ya yakʼ jnoptik te bayal skʼoplal te ya skʼan ya jchʼuumbeytik smantal ta spisil ora te Jehovae. Jaʼnix jich ya yakʼ jnoptik teme ay machʼa lek yoʼtan jich bitʼil la yakʼ ta ilel ta nailal te Saule, ya xjuʼ xkʼatpʼuj ta chopol. ¡Mame ayuk bin ora jich ya xkʼot ta pasel ta jtojoltik! ¿Mabal jichuk?