ILAWIL te ants winiketik te yakalik ta stseʼlayel te jchʼiel kerem ini. ¿Yabal anaʼ machʼa-a? Jeremías te sbiile, jaʼ jtul j-alwanej yuʼun Dios te kʼax mukʼ skʼoplale.

 Te kʼalal mato jaluk slajimbel-a te lokʼombaetik ta lum Jerusalén te Josiase, te Jehová la yalbey te Jeremías te yakuk x-och ta j-alwanej yuʼune. Jaʼnax yuʼun te kʼax keremto la yaʼiy sba yuʼun ya x-och ta j-alwanej. Jaʼukmeto albot yuʼun te Jehová te jaʼ ya xkoltayot yuʼune.

 Te Jeremías la yalbey te israeletik te akʼa yijkʼitayik spasel te bintik chopole soknix la yal te lotil diosetiklaj te ya yichʼik ta mukʼ te yantik nacionetike. Jaʼukmeto bayal ta jtul israeletik jaʼ la skʼan la yichʼik ta mukʼ te lokʼombaetike ma jaʼuk te Jehová te smelelil Diose. Jaʼ yuʼun kʼalal te Jeremías la yalbey te lum te ya x-akʼbotik castigo yuʼun Dios ta swenta te bitʼil chopolike tseʼlayotiknax yuʼun.

 Kʼax bael te jaʼbile. Laj te Josiase, oxeb u ta patil och ta ajwalil te Joacim (Jehoiaquim) te snichʼane. Te Jeremías maba skomoj sba ta yalbeyel jich te lume: Te Jerusalén yame yichʼ lajinel teme ma xajeltay te atalelike. Jich yuʼun te sacerdoteetike la stsakik te Jeremías sok jich la yalik ta aw: Yame skʼan ya yichʼ milel te Jeremiase, melel yak ta schopol kʼoptayel te lum kuʼuntike.

 ¿Binwan ya spasix-a te Jeremiase? ¡Maba xiw yoʼtan! Jich la yalbey ta spisil te lume: Te Jehová jaʼ la stikunon tal ta yalel te kʼopetik ini. Teme maba ya ajelik te achopol talelike, yame slajin te Jerusalene. Jaʼnax yuʼun naʼaikme ta swenta ini: Teme ya amilonike, ya amilik jtul winik te maʼyuk bin chopol spasoje.

 Jich te winiketik te tulan yaʼtel yichʼojik ta lume maba la yakʼik ta milel te Jeremiase. Jaʼukmeto te israeletike maba la yijkʼitayik ta spasel te chopol yaʼtelike. Ta patil tal te Nabucodonosor te ajwalil yuʼun Babilonia tal yakʼbey guerra te Jerusalén. Jich te Nabucodonosor la yabatin te israeletike. La yikʼ bael bayal ta jmil israeletik ta Babilonia. ¡Nopanax awaʼiy te bin yaʼiyel ya awaʼiy aba teme ay machʼa te ma xanaʼbey sba te ya yikʼat bael ta yan nación te maʼyuk awiloje!