KʼAXEMIX lajuneb jaʼbil te la yichʼik ikʼel bael ta Babilonia yuʼun Nabucodonosor te israeletik te pʼijubtesbilik ta leke. ¡Ta ora ini, ilawil! Te Jerusalén yak ta kʼajkʼel, te israeletik te maba lajik liʼ ini, la yichʼik bael chukel ta Babilonia.

 Julukme ta awoʼtan te la yalik ta jamal te j-alwanejetik te jich ya xkʼot ta pasel teme maba la yijkʼitayik spasel te bintik chopole. Jaʼukmeto te israeletik ma la skʼan schʼuunik te bintik la yalik te j-alwanejetike. Jaʼ la yichʼikxan ta mukʼ te lotil diosetike, ma jaʼuk te Jehová. Jich yuʼun lananix yichʼik castigo-a. Jnaʼojtik ini, melel te Ezequiel te j-alwanej yuʼun Dios ya yalbotik te bintik chopol la spasik te israeletike.

 ¿Yabal anaʼ machʼa-a te Ezequiele? Jaʼ jtul kerem te ikʼot bael ta Babilonia yuʼun te Nabucodonosor te ayix tal slajunebal jaʼbil te kʼalal mato yichʼoj lajinel-a te Jerusalene. Te Daniel sok te oxtul yamigotak, te Sadrac, Mesac sok te Abed-nego, junax la yichʼik ikʼel bael ta Babilonia sok te Ezequiele.

 Kʼalal ay ta Babilonia-a te Ezequiele akʼbot yil yuʼun Jehová ta jun milagro te bintik chopol yak ta pasel ta Templo te ay ta Jerusalén. Yuʼunix ay ta Babilonia-a te Ezequiele, jaʼukmeto akʼbot yil yuʼun Jehová spisil te bintik yak ta pasel ta Temploe. ¡Kʼax xiʼbantik sba te bintik la yile!

 Te Jehová jich la yalbey te Ezequiel: Ilawil te bintik ilaytik sba yakalik ta spasel te ants winiketik liʼ ta Temploe. Ilawil te pajkʼetik te bombil ta chanetik sok yantik chambalametik ta bayuknax. ¡Sok ilawil te israeletik te yakalik ta yichʼel ta mukʼ te lokʼombaetike! Jich te Ezequiel la yil spisil te bintik yak ta pasele, sok la stsʼibay.

 Te Jehová jich la sjojkʼoybey te Ezequiel: ¿Yabal awil te bintik muken yakalik ta spasel te jwolwanej israeletike? Jaʼnix jich la yilxan te Ezequiel te ay 70 ta jtul winiketik te yakalik ta yichʼel ta mukʼ te lotil diosetike. Jich yakalik ta yalel: Maba ya yilotik te Jehová. La yijkʼitayix te kʼinale.

 Ta patil, te Jehová la yakʼbey yil te Ezequiel chaʼoxtul antsetik te ayik ta stiʼnail Templo, te ay ta stojol norte. Tey nakalik ta yichʼel ta mukʼ-a te lotil dios Tamuz. Jich albotxan yuʼun Jehová te Ezequiel: ¡Ilawil te winiketik te ayik ta yochibal Temploe! Ayniwan 25 ta jtul tey-a. Jich la yil te Ezequiele. ¡Snijanoj sbaik ta stojol te banti ya xlokʼ tal te Kʼajkʼale sok yakalik ta yichʼel ta mukʼ te Kʼajkʼale!

 Jich la yal te Jehová: Ma xyichʼonik ta mukʼ te ants winiketik ini. ¡Ma jaʼuknax ya spasik te bintik chopole, yato xtalik ta Templo kuʼun ta spasel te bintik chopole! Jaʼ yuʼun jich la yal ta jamal te Jehovae: Yame yilbonik te kilimbae. Sok mame jnaʼbey yoʼbolil sbaik te kʼalal ya yichʼik lajinele.

 Oxebniwan jaʼbil ta patil kʼalal akʼbot yil te Ezequiel yuʼun Jehová spisil ini, te israeletik la stoy sbaik ta stojol te ajwalil Nabucodonosor jich akʼbotik guerra yuʼune. Ta patil, jun jaʼbil sok olil te babilonioetik la swokʼik ochel te tsʼajkʼetik yuʼun Jerusalén sok la schikʼik spisil te lume. Jteb ma spisiluk te ants winiketik lajik bael o la yichʼik bael chukel ta Babilonia.

 ¿Bin yuʼun la yakʼ taluk tulan lajinel ta stojol te israeletik te Jehovae? Jaʼ yuʼun te ma la skʼan schʼambeyik yaʼiy te skʼop te Jehovae sok ma la schʼuumbeyik te smantale. Jaʼ ini ya yakʼ kiltik te bayal skʼoplal te spisiluk ora ya jpastik te bin ya yal te Jehová.

 Ta sjajchibal ijkʼitayot jilel tut jtsojb ants winiketik ta Israel. Te Gedalías (Guedalías) te jtul judío winik jaʼ akʼbot jilel swentain yuʼun Nabucodonosor te ants winiketik ini. Jaʼukmeto ay chaʼoxtul israeletik te la smilik te Gedalías. Te israeletik la xiʼik teme ya xchaʼsujtik tal te babilonioetik sok te ya yichʼik lajinel yuʼun te bin la spasike. Jich yuʼun la sujik te Jeremías te yakuk xbajtʼik soke, jich anik bael ta Egipto.

 Ta swenta ini maʼyuk jtul ants winik te jil ta lum Israele. Maʼyuk machʼa nain 70 jaʼbil ta lum Israel. Jochol jil ta jkʼaxel. Jaʼukmeto te Jehová la yal ta jamal te ya yakʼ xchaʼsujt tal ta Jerusalén te lum yuʼun kʼalal kʼaxemix-a te 70 jaʼbile. Jaʼukmeto, kʼalal mato xkʼot yorail ini, ¿bin kʼot ta pasel ta stojol te lum yuʼun Dios tey ta Babiloniae? Yame kiltik bael.