ILAWIL te winik te ay ta jaʼe. La sta tulan wokol, ¿mabal jichuk ya awil? ¡Te mukʼul chay ya awile yame xbikʼot yuʼun! ¿Yabal anaʼ machʼa-a te winik ini? Jonás te sbiile. Yame kiltik te bin utʼil la schʼik sba ta tulan kʼop ini.

 Te Jonás jaʼ jtul j-alwanej yuʼun te Jehovae. Mato jaluk slajel-a te j-alwanej Eliseo te kʼalal jich la yichʼ albeyel Jonás yuʼun te Jehovae: Baan ta mukʼul lum Nínive, yuʼun kʼax bayal schopolil te ants winiketik tey-ae, ya jkʼan te yakuk awalbey ta swenta te smulike.

 Jaʼukmeto ma la skʼan bajtʼ te Jonase. Jich och ta jun barco te kʼejel bajtʼe. Ma la smulan te Jehová te bitʼil lokʼ ta anele. Jaʼ yuʼun la yakʼ jajchuk tulan yikʼal jaʼal ta mar. Kʼax tulan te ikʼ te jich kʼan kʼubuk ochel ta jaʼ te barcoe. Te jtijbarcoetike xiwik ta jkʼaxel, och yawtayik te diosetik yuʼunik swenta jich ya xkoltayotik yuʼun-a.

 Ta patil, te Jonás jich la yaltiklambey: Kichʼoj ta mukʼ te Jehová te Dios te la spas te chʼulchan sok te Balumilale. Yakon ta anel yuʼun ma jkʼan jpas te bin la yalbon te Jehovae. Jich yuʼun te jtijbarcoetike la sjojkʼoybeyik: ¿Bin ya jpaskotik ta atojol swenta yuʼun jich ya xlamaj-a te yikʼal jaʼal ta mare?

 Te Jonás jich la yal: Chʼojawonik ochel ta mar, jichme ya xlamaj te mare. Te jtijbarcoetike ma la skʼan schʼojik koel, jaʼukmeto te kʼalal tulanajxan te yikʼal jaʼal ta mare jich la schʼojik ochel ta mar te Jonase. Jich kom ta oranax te yikʼal jaʼale jich la slaman sba te mare.

 Te kʼalal kʼub ochel ta jaʼ te Jonase bikʼot yuʼun mukʼul chay. Jaʼukmeto maba laj. Ta oxeb kʼajkʼal sok oxeb ajkʼabal ayin ta schʼujtʼ te mukʼul chaye. Te Jonás kʼax ma lek la yaʼiy sba yuʼun te bitʼil ma la schʼuumbey smantal te Jehová te bitʼil ma bajtʼ ta Ninivee. Jaʼ yuʼun, ¿yabal anaʼ bin-a te la spase?

 Och ta skʼoponel Jehová te Jonás sok la skʼambey koltayel. Jich yuʼun te Jehová la yakʼ te xejtayotuk lokʼel yuʼun te mukʼul chay ta lum kʼinale. Ta patil, bajtʼ ta Nínive. ¿Mabal yakuk yakʼ jnoptik te tulan skʼoplal te ya skʼan ya jchʼuumbeytik spisil te bintik ya yalbotik te Jehovae?