TE WINIK te skejanoj sba ya awile jaʼ te Estebane. Jaʼ jtul jnopojel te jun yoʼtan yakʼoj sba ta stojol te Jesuse. Jaʼukmeto, ¡ilawil te bin yak ta kʼoel ta pasel ta stojole! Te winiketik ini yakalik ta xchʼojel ta mukʼul tonetik te Estebane. ¿Bin yuʼun te kʼaxto chopol ya yilik te Esteban te jich yakalik ta spasbeyel ini? Yame kiltik bael.

 Te Esteban jaʼ koltayot yuʼun te Dios ta spasel te milagroetike. Te winiketik ini jaʼ ma smulanik te bitʼil jich yak ta spasele, sok te bitʼil yak ta snojptesel te ants winiketik ta swenta te bin smelelile. Jaʼukmeto akʼbot bayal spʼijil yuʼun Dios te Estebane, melel la yakʼbey snaʼ te winiketik ini te bitʼil lotil te bintik yakalik ta yakʼel ta nopele. Jaʼ kʼaxto ilinikxan yuʼun, jich la stsakik sok la yikʼik tal chaʼoxtul winiketik swenta ya yalik lot ta stojol.

 Jaʼ yuʼun jich jojkʼoybot yuʼun te mukʼul sacerdotee: ¿Yuʼunixbal jich-a te bin yakalik ta yalele? Jich te Esteban ay bin jajch scholbey skʼoplal ta swenta te bin ya yal te Bibliae. Te kʼalal ya xlajix yoʼtan ta kʼop-ae la yal te ay winiketik ta snailalto te maba lek la yilik te j-alwanejetik yuʼun te Diose. Sok jich la yalxan: Pajalex sok te winiketik-abi, melel la amilik te Jesús te j-abat yuʼun te Diose, sok maba achʼuunejik te leyetik yuʼun te Diose.

 ¡Kʼaxto ilinikxan yuʼun te jwolwanejetik yuʼun te religionetike! La skʼux sbakel yeik yuʼun te yilimbaike. Jaʼukmeto la sjach moel sit te Estebane sok jich la yal: ¡Ilawilik! Yakon ta yilel te Jesús te tekʼel ta chʼulchan ta swaʼel kʼab te Diose. Jich la smak schikinik yuʼun sok la sjumtayik ta stsakel te Estebane. La sjochik lokʼel ta tiʼ lum.

 La slokʼesik te snajtʼil kʼuʼike la yakʼbeyik skanantay jilel te jchʼiel winik te Saulo sbiile. ¿Yabal awil te banti ay te Sauloe? Tey-abi ay chaʼoxtul winiketik te jajch schʼojik ta ton te Estebane. Jich bitʼil ya awil liʼ ini, la skejan sba sok jich la yal ta skʼoponel Dios: Jehová mame xawakʼbey castigo ta swenta te bin chopol yakalik ta spasele. Te Esteban snaʼoj te bitʼil loʼlaybilik yuʼun te jwolwanejetik yuʼun te religionetike. Te kʼalal laj yoʼtan ta yalel ini, jich laj te Estebane.

 Te kʼalal ay machʼa ya yutsʼinate, ¿lekbal te ya awakʼbey spakole o lekbal te ya akʼambey Dios te yakuk x-akʼbot castigo yuʼune? Yan te Esteban sok te Jesús ma jichuk la spasik stukel. Lek la yiltiklanik te machʼatik kʼaxto utsʼinotik yuʼune. Akʼame jkʼayimbeytik te stalelike.