TE KʼALAL yak ta kʼaxel-a te kʼajkʼale, te Jesuse la yakʼ sba ta ilel bayal buelta ta stojol te jnopojeletik yuʼune. Ta jun buelta kʼaxemto ta 500 ta jtul jnopojeletik ilot yuʼun. Te kʼalal chiknaj ta stojolike, ¿yabal anaʼ bin-a te cholbot yaʼiyike? Jaʼ te ajwalinel yuʼun Diose. Te Jehová la stikun tal ta Balumilal te Jesús swenta ya yalbey skʼoplal te ajwalinel yuʼun Diose. Jich la spasulan jaʼto te kʼalal chaʼkuxaj tal ta banti te machʼatik lajemikixe.

 ¿Yatobal anaʼ bin-a te ajwalinel yuʼun Diose? Jaʼ te bin utʼil ya xmantalteswan ta smelelil te Dios kʼalalto ta chʼulchan, sok jaʼ la yichʼ tsael yuʼun Dios te Jesús swenta ya x-och ta ajwalil. ¡Jich bitʼil te kilojtikixe, te Jesús la yakʼ ta ilel te kʼax lekil ajwalil ya xkʼot ta pajel chaʼbej te kʼalal ya smakʼlin spisil te machʼatik ayik ta wiʼnal, ya slekubteslan te jchameletike, sok te kʼalal ya schaʼkuxajtes te machʼatik lajemikixe!

 Jich yuʼun te kʼalal ya xmantalteswan jmil jaʼbil ta chʼulchan te Jesuse, ¿bin ya xkʼot ta pasel liʼ ta Balumilale? Yame xkʼatpʼuj ta tʼujbil nichimal kʼinal ta swolol te Balumilale. Mame x-ayinix guerraetik, chopolil, chamel soknix te lajele. Ya jnaʼtik te jich ya xkʼot ta pasele, melel te bin yuʼun la spas Balumilal te Diose jaʼ te ya yichʼ pasel ta nichimal kʼinal ta swenta te ants winiketike. Jaʼ yuʼun la spas te tsʼumbil kʼinal Edén. Jaʼme ay ta skʼab te Jesús te jich ya xkʼot ta pasel te skʼanojel yoʼtan te Diose.

 Kʼot yorail te bitʼil mo bael ta chʼulchan te Jesuse. Ta 40 kʼajkʼal la yakʼ sba ta ilel ta stojol te jnopojeletik yuʼune, jich la snaʼik te kuxul te Jesuse. Jaʼukmeto te kʼalal mato xbajtʼ ta chʼulchan-ae, jich la yalbey ta mantal te jnopojeletik yuʼune: Mame xlokʼex ta Jerusalén, jaʼto teme la awichʼik te chʼul espiritue. Jaʼ ini jaʼme te yip te Diose, jich bitʼil te ikʼ te ya xbeene, jaʼme ya xkoltayotik yuʼun te jnopojeletik ta swenta spasel te skʼanojel yoʼtan te Diose. Sok jich la yal ta slajibal te Jesuse: Testigo ya xkʼoex kuʼun kʼalalto ta stiʼil Balumilal.

 Te kʼalal jich la yal ini, ay bin-a te chajpnax kʼot ta pasele. Jaʼ te bitʼil kaj ta moel bael ta chʼulchan te Jesuse, jich bitʼil ya awil liʼ ta lokʼombae. Potsot ta tokal, jich ma ilotix yuʼun te jnopojeletike. Jich mo bael ta chʼulchan te Jesuse, tey-abi jajch ta mantalteswanej ta stojol te jnopojeletik yuʼun liʼ ta Balumilale.