ILAWIL te chʼul abat te jamal yuʼun te stiʼ te chukjibale. Yak ta skoltayel lokʼel te jpuk kʼopetik yuʼun te Jesuse. Ya kiltik bael te bin yuʼun la yichʼik chukele.

 Mato ayuk bayal kʼajkʼal kʼaxem-a te la yichʼ malel te chʼul espíritu ta stojol te jnopojeletik yuʼun te Jesuse, jich kʼot ta pasel ini: Ta jun mal kʼajkʼal te Pedro sok te Juan bajtʼik ta Templo yuʼun Jerusalén. Tey ta yochibal te Temploe ay jtul koxo winik ta yayinabto. Ta jujun kʼajkʼal ya x-ikʼot bael yuʼun te ants winiketik tey ta Temploe yuʼun jich ya skʼambey stakʼin te machʼatik ya x-ochik bael ta Temploe. Te kʼalal ilotik yuʼun te koxo winik te Pedro sok te Juan, ay bin kʼambotik yuʼun euk. ¿Binwan ya spas te Pedro sok te Juane?

 La stejkʼan sbaik, la yilbeyik sit te koxoe. Jich la yal te Pedroe: Maʼyuk jtakʼin, jaʼukmeto jaʼme ya kakʼbat te bin ay kuʼune. ¡Ta swenta sbiil te Jesús, jajchan, beenan! Jich te Pedro la stsakbey jajchel ta swaʼel kʼab te winike, jich wil jajchel ta oranax sok jajch ta beel. Chajpnax la yilik yuʼun-a te ants winiketik ta swenta te milagro ini, sok akʼbotik stseʼelil yoʼtanik yuʼun.

 Te Pedro jich la yal ini: Jaʼ ta swenta yuʼel Dios te machʼa la schaʼkuxajtes te Jesús te juʼ kuʼunkotik spasel te milagro ini. Kʼalal yakalik ta kʼop-a te Pedro sok te Juane. Ay talik chaʼoxtul jwolwanejetik yuʼun religionetik te kʼax ilinemik ta skaj te bitʼil te Pedro sok te Juan yakalik ta yalbeyel yaʼiy te ants winiketik te bitʼil la yichʼ chaʼkuxajtesel te Jesuse. Jich yuʼun la stsakik bael te jpuk kʼopetike sok la yikʼik bael ta chukjibal.

 Ta yan kʼajkʼal-abi ayin mukʼul tsoblej yuʼunik te jwolwanejetik yuʼun te religionetike. La yikʼik tal ta stojolik te Pedro sok te Juan soknix te winik te la slekubtesike. Jich la yichʼik jojkʼoybeyel: ¿Machʼa ta swenta yuʼel te la apasik ini?

 Te Pedro la yal te jaʼ ta swenta yuʼel Dios te machʼa la schaʼkuxajtes te Jesuse. Te sacerdoteetik ma snaʼik bin ya spasik yuʼun, melel ma xjuʼ ya smukik te yuʼunix jich kʼot ta pasel-a te milagro ini. Jich yuʼun jamal la yichʼik albeyel te jpuk kʼopetik te manchuk ya yalbeyikxan skʼoplal ta swenta te Jesuse, jich la yichʼik koltayel bael.

 Kʼax bael te kʼajkʼale, te jpuk kʼopetike yakaliknanix ta yalbeyel skʼoplal-a te Jesuse sok yakalik ta slekubtesel te jchameletike. Pujk ta bayuk skʼoplal ta swenta te milagroetik ini. Jich te ipal ants winiketik te ayik ta nainel ta yanyantik lumetik ta sjoyobal ta lum Jerusalén, la yikʼtiklanik tal te jchameletik ta stojol te jpuk kʼopetik swenta ya yichʼik lekubtesel. Ta swenta ini kʼax bayal slab yoʼtanik te jwolwanejetik yuʼun te religionetik te jich la schukik bael te jpuk kʼopetike. Jaʼukmeto ay bin kʼot ta pasel.

 Ta ajkʼabaltik-a te chʼul abat yuʼun Dios la sjambey stiʼil te chukjibale, jich bitʼil ya awil liʼ ini. Jich la yal te chʼul abate: Baanik, tejkʼana abaik ta Templo sok ma xakom abaik ta xcholel te skʼop Diose. Ta sab yuʼun yan kʼajkʼal, te jwolwanejetik yuʼun te religionetik la stikunik tal ta ikʼel ta stojolik te jpuk kʼopetike, jaʼukmeto ma la yichʼik tael. Ta patil la yichʼik tael ta Templo, jich la yichʼik ikʼel bael ta banti ya stsob sbaik spisil te Sanedrín.

 Jich la yalik te jwolwanejetik yuʼun te religionetike: La kalbeyexkotik ta mantal te ma xawaʼiyikix pʼijubteswanej ta swenta te Jesuse. Jaʼukmeto nojix awuʼunik te Jerusalén ta swenta te nojptesel awuʼunike. Jich la yalik te jpuk kʼopetike: Jaʼ bayalxan skʼoplal te ya jchʼuumbeytik smantal Dios te bin utʼil te smantal te winiketike. Jich ma la skom sbaik ta xcholel te skʼop Diose. ¡Kʼax lek te bin ya yakʼ jnoptike!