¡ILAWIL yak ta kʼubel ochel ta jaʼ te barcoe, sok yak ta wuyel! ¿Yabal ata ta ilel te ants winiketik te yak schʼojbel ochel sbaik ta jaʼe? Ay chaʼoxtul te ayikix ta stiʼil mar. ¿Teybal ay euk-a te Pabloe? Yame kiltik bael te bin yak ta kʼoel ta pasel ta stojol-ae.

 Julukme ta awoʼtan te bitʼil ayix cheb jaʼbil te yichʼoj chukel ta Cesarea te Pabloe. Ta patil la yotsesik ta jun barco te Pablo sok yantikxan jchukeletik yuʼun ya yichʼik ikʼel bael ta Roma. Ta nopol skʼinal Creta te ay ta yolil mare, tsakotik yuʼun tulan yikʼal jaʼal ta mar jich kajik ta yukʼilanel yuʼun. Te jtij barcoetike ma juʼ yuʼunik ta stojobtesel te barcoe. Ta kʼajkʼaleltik ma la yilik te Kʼajkʼale jaʼnix jich ta ajkʼabal ma la yilik te ekʼetike. Bayal kʼajkʼal ta patil te machʼatik ayik ta barcoe, la skuyik te maba ya xkolikix ta jkʼaxele.

 Jich yuʼun te Pablo la stejkʼan sba sok jich la yal: Mame ayuk machʼa ya xlaj jtuluk, jaʼnaxme ya xlaj stukel te barcoe, yuʼun jtul chʼul abat la stejkʼan sba ta jtojol te ajkʼabeye sok jich la yalbon: ¡Pablo mame xiwat! Yame xkʼot atejkʼan aba ta stojol te César te ajwalil yuʼun Romae. Sok yame xkoltayotik yuʼun Dios te machʼatik sjokinejat ta beele.

 ¡Te kʼalal ayix chanlajuneb kʼajkʼal sjajchel-a te tulan ikʼ ta mare, ta olil ajkʼabal te jtij barcoetike la yilik te bitʼil maba kʼubulix te yaʼlel te mare! Jich kaj xiʼik teme ya xkʼot sjin sba sok tonetik ta ajkʼabale jich yuʼun la schʼojik koel te anclaetik yuʼun te barcoe. Ta sab yuʼun yan kʼajkʼal la yilik te spamlej stiʼil te mare. Jich yuʼun la spasik tulan ta stojobtesel te barco kʼalalto tey-a.

 Jich te kʼalal nopol ya xkʼotix ta stiʼil mar-ae la smaj sba ta tonetik soknix ta sjiʼal mar jich maba la stijix sba-a, kaj ta majel yuʼun te yip mar te xkechet ya xtale sok jich kaj ta wuyel te barcoe. Te capitán yuʼun soldadoetike jich la yal: Spisil te machʼatik ya snaʼik nuxele, akʼa nuxukik lokʼel kʼalalto ta tiʼ mukʼul jaʼ, patil akʼa schʼoj sbaik ochel te yantik te ma snaʼik nuxele sok akʼa stuuntesik xejtʼelul te barco yuʼun jich ya xkajajik ta ba jaʼ-a. Jich la spasik te 276 ta jtul te machʼatik ayik ta barco-ae jich kolik, melel kʼotik ta stiʼil mar, jichnix kʼot ta pasel-a te bitʼil la yal te chʼul abate.

 Te jsejp kʼinal te ay ta yolil mare Malta sbiil. Te ants winiketik tey-ae kʼax bayal la skʼuxultayik te machʼatik lokʼik tal ta barcoe. Te kʼalal kʼejp te kʼinale la skʼasesik ta yan barco te Pabloe jich la yikʼik bael ta Roma.