Te chʼul abat Gabriel la yichʼ tikunel bael ta stojol jtul lekil achʼix te María sbiile. Albot yuʼun te chʼul abat te yalaj sta jtul yal te ya xmantalteswan jich bitʼil ajwalil ta sbajtʼel kʼinal. Te alal te Jesús sbiile, ayin ta banti sna wakaxetik tey kʼotik ta ulaʼtayel yuʼun chaʼoxtul jkanan tuminchijetik. Ta patil, ay chaʼoxtul winiketik te talemik te banti ya xlokʼ tal Kʼajkʼal te tojobtesotik bael yuʼun jun ekʼ ta banti ay te alale. Yame jnoptik bael machʼa-a te akʼbot yilik te ekʼe, sok te bin utʼil la yichʼ koltayel te kʼalal kʼan yichʼ milel te Jesuse.

 Ta patil, yame kiltik te kʼalal ayix lajchayeb yaʼbilal-a te Jesús te yak ta kʼop sok te jpʼijubteswanejetik ta Templo. Waxaklajuneb jaʼbil ta patil la yichʼ jaʼ te Jesuse, tey-abi jajch ta xcholel skʼop Dios sok la yakʼ ta nopel ta swenta te Ajwalinel yuʼun Dios, te jaʼ ta swenta te tikumbil tal yuʼun Dios ta Balumilale. Swenta ya yichʼ koltayel ta spasel te aʼtelil ini, te Jesús la stsa lajchayeb ta jtul winiketik te kʼot ta jpuk kʼopetik yuʼune.

 Jaʼnix jich te Jesús la spas bayal milagroetik, melel la smakʼlin bayal ta jmil ants winiketik ta chaʼoxkojt chayetik sok chaʼoxpejch panetik. La slekubtes jchameletik sok la schaʼkuxajtes te machʼatik lajemike. Ta slajibal yame jnoptik bael ta swenta te bintik kʼot ta stojol te Jesús ta slajibal kʼajkʼal yuʼun te skuxlejale sok te bin utʼil la yichʼ milele. Jteb ma sta oxeb jaʼbil sok olil te la schol skʼop Dios te Jesús. Jich yuʼun kʼaxem jtebuk ta 34 jaʼbil smakoj te SWAKEBAL PARTE ini.