ILAWIL te Jesús spetoj te tut kereme. Ya kiltik te ay skʼoplal ta yoʼtan te alaletike. Te winiketik te yakalik ta ilawe jaʼ te jpuk kʼopetik yuʼune. ¿Yabal anaʼ bin yakalik ta albeyel yuʼun te Jesuse?

 Te Jesús sok te jpuk kʼopetik yuʼune sujtelikto tal ta namal beel. Te kʼalal yakalik ta talel te be-ae, la stij sbaik ta kʼop. Jaʼ yuʼun te kʼalal kʼotike jojkʼoybotik yuʼun te Jesuse: ¿Bin-a te la atij abaik ta kʼop ta be yuʼune? Ma yuʼunuknix ma snaʼojbey bin swentail-a te Jesuse. Jaʼukmeto la sjojkʼoy yuʼun ya yil teme ya x-albot yuʼun te jpuk kʼopetike.

 Ma la sjakʼik te jpuk kʼopetike, melel snaʼojik te jaʼ la stij sbaik ta kʼop yuʼun te machʼa-a te mukʼxan skʼoplal ya xkʼot ta spisilike. Ay chaʼoxtul te ya skʼanik te mukʼ skʼoplalik ya xkʼotik ta stojol te yantike. ¿Binwan utʼil ya x-albotik yuʼun te Jesús te bitʼil ma lekuk te ay machʼa ya skʼan te jaʼ mukʼxan skʼoplal ya xkʼote?

 La yikʼ tal jtul tut kerem. La stejkʼambey yil ta sit te jnopojeletike sok jich la yal te Jesuse: Ya jkʼan te yakuk anaʼik ta lek ini: Teme maba ya ajel te atalelik jich bitʼil te alaletike, maʼyuk bin ora ya x-ochex ta banti ay te ajwalinel yuʼun Dios. Te machʼa jich stalel te bitʼil te tut kerem ini jaʼme te machʼa mukʼ skʼoplal ya xkʼot ta banti te ajwalinel yuʼun Diose. ¿Yabal anaʼ bin yuʼun te jich la yal te Jesuse?

 Jaʼ yuʼun te bitʼil te alaletike ma snop ta yoʼtanik te ya skʼan te mukʼxan skʼoplal ya xkʼotik ta stojol te yantik alaletike. Jaʼ yuʼun te jpuk kʼopetik ya skʼan te yakuk snopbeyik stalel te bitʼil te alaletike sok te manchuk ya stij sbaik ta kʼop ta swenta te machʼa mukʼ skʼoplal ya xkʼote.

 Ta yantikxan buelta jaʼnix jich la yakʼ ta ilel te Jesús te ay bayal skʼoplal ta yoʼtan te alaletike. Cheʼoxeb u ta patil ay chaʼoxtul ants winiketik te la yikʼik tal yal snichʼnabik ta yilel te Jesuse. Te jpuk kʼopetik kʼan skomik te alaletike. Jaʼukmeto jich albotik yuʼun te Jesuse: Akʼa talukik ta jtojol te alaletike, mame xakomik, melel te ajwalinel yuʼun Dios jaʼme yuʼun te machʼatik jich stalelik ini. Jich la spetiklan te alaletike, sok la yakʼtiklambey bendición. ¡Kʼax lek te bitʼil ya jnaʼtik te kʼux ta yoʼtan alaletik te Jesuse! ¿Mabal jichuk?