TE KʼALAL lokʼikix bael ta kuarto-ae, te Jesús sok te jpuk kʼopetik yuʼun bajtʼik ta banti ay te awal tsʼunubil ta Getsemaní. Ay bayal buelta kʼoemikix tey-a. Te Jesús la yalbey te jpuk kʼopetik te manchuk ya xwayik sok te yakuk skʼoponik te Diose, tey-abi namaj bael jtebuk la skejan sba ta skʼoponel Dios.

 Ta patil, te Jesús sujt tal te banti ay te jpuk kʼopetike. ¿Binwan yakalik ta spasel ta akʼop? ¡Ochem swayelik! Oxeb buelta albotik yuʼun te Jesús te manchuk ya x-och swayelike, jaʼukmeto te kʼalal jujun buelta sujt tale ochem swayelik-a. ¿Bin utʼil ay-a te yato x-och swayelik ta ora ini? Ta slajibal buelta te kʼalal sujt tal te Jesuse jich la yal: La staix yorail te ya x-akʼoton ta skʼab te jkontratake.

 Ta yorailnax-abi chiknaj skʼop bayal ta jtul winiketik. ¡Yichʼojik tal yespadaik sok steʼik! Sok stuchtiklanejik skʼajkʼik yuʼun ya yilik kʼinal-a. Te kʼalal noptsajike ay machʼa lokʼ tal ta yolil te winiketike, tal ta stojol te Jesuse. La yujtsʼiy jich te bitʼil ya awile. ¡Te winik ini jaʼ te Judas Iscariote! ¿Bin yuʼun te la yujtsʼiy te Jesuse?

 Te Jesús jich la sjojkʼoy: Judas, ¿ta swentabal ujtsʼiyel ya awakʼon ta kʼabal? Melelnix-a, te ujtsʼiyel te la yakʼ te Judase jaʼ señail yuʼun la yakʼbey snaʼ stojol te winiketik te machʼa-a te Jesús te yakalik ta sleele. Jaʼ yuʼun te skontratak te Jesús ochik ta tsakel yuʼun. Jaʼukmeto te Pedro ma la skʼan te jichnax ya yikʼik bael te Jesuse, melel la slokʼes te espada te yichʼoj tale jich la yejchʼentes te winik te ay ta stojole. La sbojbey lokʼel te swaʼel chikine. Ta oranax te Jesús la spikbey sok la slekubtesbey te schikin te winike.

 Te Jesús jich la yalbey te Pedroe: Otsesa ta yawil te espada awuʼune. ¿Yuʼunbal ma xjuʼ kuʼun ta akʼop te ya jkʼambey te jTat bayal ta jmil chʼul abatetik yuʼun te ya skoltayonike? ¡Yanix xjuʼ yuʼun-a! Jaʼukmeto te Jesuse ma la skʼambey te Dios te yakuk xtikumbot tal chʼul abatetik ta stojole, melel snaʼoj te kʼotix yorail te ya x-ikʼot bael yuʼun te skontratake. Jun yoʼtan la yakʼ sba ta tsakel. Yatome kiltik bin kʼot ta stojol te Jesuse.