¿YABAL anaʼ machʼa-a te tut alal ini? Jaʼ te Jesuse. Ayinelto ta sna wakax te bantinix ya yichʼ makel yantik chambalametik tey-a. Te María la smejtsʼan te Jesús ta kanoa te banti ya xweʼ te wakax soknix yantik chambalametik. Jaʼukmeto, ¿bin yuʼun te ayik ta banti sna chambalametik te María sok te José? ¿Mabal jichuk ya awil te ma snujpʼuk te ya x-ayin jtul alal liʼ ini?

Maʼuk. Ta swenta te bin yuʼun tey ayik-ae jaʼ ta skaj te la slokʼes jun ley te ajwalil César Augusto yuʼun Roma te banti ya yal te spisil te ants winiketik te akʼa sujtukik bael ta slumalik te banti ayinike sok te akʼa yotses sbiilik ta june. Te José ayin ta Belén, jaʼukmeto te kʼalal kʼotik tey-ae ma la staik ta majanel na. Jaʼ yuʼun bajtʼik te banti nainemik te chambalametike. ¡Jaʼ yorail-a te ayin te Jesuse! Jaʼukmeto ya kiltik te lek ay te Jesuse.

¿Yabal awil te jkanan tuminchijetik te talik ta yilel te Jesuse? Ayik ta akiltik ta skanantayel tuminchijetik ta ajkʼabal, tey-abi chiknaj tal xojobil ta chʼulchan te joytayotik yuʼune. ¡Jaʼ jtul chʼul abat! Kʼax bayal xiwik yuʼun te jkanan tuminchijetike. Jaʼukmeto jich albotik yuʼun te chʼul abate: ¡Ma xiwex! Ya kalbeyex awaʼiyik te bin yachʼil kʼoem ta pasel ta Belén, yoʼtik ayinemix te Kajwaltik Cristo. ¡Jaʼme te machʼa ya skoltay te lume! Potsbil ta pakʼ sok metsel ta skanoa wakax. Ta oranax chiknaj tal chʼul abatetik, jajchik ta yalbeyel yutsil skʼoplal te Diose. Jich te jkanan tuminchijetik ta oranax bajtʼik ta sleel te Jesús, jich la staik.

¿Yabal anaʼ bin yuʼun te kʼax mukʼ skʼoplal te Jesuse? ¿Yabal anaʼ machʼanix ta smelelil-a? Julukme ta awoʼtan te la kalbeytik skʼoplal ta sbabial aʼyej yuʼun te libro ini ta swenta te sNichʼan te Diose. Jaʼ ini aʼtej sok te Jehová ta spasel te chʼulchan sok te Balumilal soknix spisil te bintik aye. Te machʼa ini, ¡jaʼ te Jesuse!

Te Jehová la yakʼbey ta schʼujtʼ María te skuxlejal te sNichʼan te kʼalal ayto ta chʼulchan-ae. Ta yorail-abi jajch ta chʼiel ta schʼujtʼ te María jich te bitʼil ya spasik te yantik alaletik ta schʼujtʼ te smeʼike. Jaʼnax yuʼun te alal ini jaʼ sNichʼan Dios stukel. Ta patil ayin ta Belén ta banti sna wakax. ¿Kʼotbal ta awoʼtan te bin yuʼun te tseʼelnax yoʼtanik te chʼul abatetik te kʼalal la yalbeyik yaʼiy te ants winiketik te ayinemix te Jesuse?