TE KʼALAL yak ta sbeeltayel kʼaxel te lum te Jesuse, la slekubtes jchameletik. Te milagroetik te la yichʼ pasele pujk skʼoplal ta sjoyobal ta yantik lumetik. Jich yuʼun te ants winiketike la yikʼtiklanik bael te machʼatik chamen yok skʼabik, maʼsitetik, koxoetik sok yantikxan chamel te yichʼojik te ants winiketike. Jich te Jesús spisil la slekubteslan.

 Ay kʼaxemix ta oxeb jaʼbil te akʼbot yichʼ jaʼ te Jesús yuʼun te Juane. Te Jesús la yalbey te jpuk kʼopetik yuʼun te bitʼil nopol ya xbajtʼ ta Jerusalén te banti ya yichʼ milele, sok te ya xchaʼkuxaj tal ta yolil te machʼatik lajemikixe. Jaʼukmeto ma skomoj sba ta slekubtesel te jchameletike.

 Ta jun buelta te Jesús yak ta nojpteswanej ta sábado. Te sábado jaʼ skʼajkʼalel kʼux oʼtan yuʼunik-a te judioetike. Te ants te ya awil liʼ ta lokʼombae ayix waxaklajuneb jaʼbil te kʼujul spate jich ma xjuʼ toj ya stejkʼan sba ta lek-a. Jich yuʼun te Jesús la skajan skʼab ta sba te antse jich ora tojob te spate. ¡Lekub ta oranax!

 Ta swenta ini bayal ilinik yuʼun te jwolwanejetik yuʼun religionetike. Ay jtul te jich la yal ta stojol te ants winiketike: Ay wakeb kʼajkʼal te ya xjuʼ ya x-aʼtejotike, jaʼ ya skʼan ya xtal awakʼ abaik ta lekubtesel yuʼun te achamelike, ma jaʼuk-a te sabadoe.

 Jaʼukmeto jich la yal te Jesuse: ¡Jchopol oʼtanex! ¿Mabal yakuk atilik ta sábado kʼajkʼal te aburroik yuʼun ya awikʼik bael ta uchʼ jaʼ? Jich yuʼun, ¿mabal yakuk skʼan lekubtesel ta swenta te schamel te ants ini, te ayix waxaklajuneb jaʼbil te jich aye? Ta swenta te bin la yichʼik albeyele kʼexawik yuʼun te chopol winiketik ini.

 Ta patil, te Jesús sok te jpuk kʼopetik yuʼune bajtʼik ta Jerusalén. Te kʼalal nopol ya xkʼotikix ta lum Jericó-ae, ay chaʼtul jkʼambajel maʼsitetik te jajchik ta awe: Jesús koltayawonkotik.

 Jich te Jesuse la yikʼ tal te chaʼtul maʼsitetike sok jich la sjojkʼoylambey: ¿Bin-a te ya akʼan ya jpasbeyexe? Jich la yalik: Kajwal jaʼ te yakuk ajambonkotik te jsitkotike. Pikbot sitik yuʼun te Jesuse, ¡jich la yilik kʼinal ta oranax! ¿Yabal anaʼ bin yuʼun te Jesús la spas spisil te milagroetik ini? Jaʼ yuʼun te bitʼil la snaʼbey yoʼbolil sba te ants winiketike, sok te yakuk yakʼik xchʼuunel yoʼtanik ta stojole. Ta spisil ini ya yakʼ smukʼul koʼtantik te maʼyuk machʼa ya stsakotix ta chamel te kʼalal ya xmantalaj te Jesús ta swenta te Balumilale.