ILAWIL te lokʼomba ini, nakal te Jesuse. Yak ta snojptesel spisil te ants winiketik ta wits yuʼun Galilea. Te machʼatik ay ta stsʼeele jaʼ te jnopojeletik yuʼune. La stsa lajchayeb ta jtul yuʼun jich ochik ta jpuk kʼopetik yuʼun. Te jpuk kʼopetike jaʼik te jnopojeletik te kʼax lekxan la yil sbaik sok te Jesuse. ¿Yabal anaʼtiklambey te sbiile?

 Ta sbabial, jaʼ te Simón Pedro sok te Andrés te sbankil yijtsʼin sbaike. Soknix te Jacobo (Santiago) sok te Juan te sbankil yijtsʼin sbaik euke. Ay yan jpuk kʼop te jaʼnix jich sbiilinej Jacobo (Santiago), soknix ay yan te Simón sbiil euke. Ay chaʼtul te sbiilinejik Judas, te jtule jaʼ te Judas Iscariote te yane jaʼ te Tadeo te yan sbiil yichʼoje. Jaʼnix jich ay yantik jaʼ te Felipe sok te Bartolomé (te jaʼnix jich sbiilinej Natanael) sok te Mateo soknix te Tomás.

 Te kʼalal lokʼix bael ta Samaria-ae, jajch ta xcholel skʼop Dios ta sbabial buelta te Jesuse, jich yak ta yalel: Nopolix yorail te ajwalinel yuʼun te chʼulchane. ¿Yabal anaʼ bin-a te ajwalinele? Jaʼ te bin utʼil ya xmantalteswan ta smelelil te Diose. Jaʼ stsaoj ta ajwalil te Jesuse. Jaʼme ya xmantalaj kʼalalto ta chʼulchan sok ya yichʼ tal lamal kʼinal ta Balumilal. Yame xpastaj ta nichimal kʼinal ta swolol te Balumilal ta swenta te ajwalinel yuʼun te Diose.

 Liʼ ta lokʼomba ini te Jesús yak ta snojptesel te ants winiketik ta swenta te ajwalinel yuʼun Dios. Jich la yal ini: Jichme ya akʼoponik te Diose. Jtatik Dios te ayat ta chʼulchan, akʼa ichʼotuk ta mukʼ abiil. Akʼa taluk te ajwalinel awuʼune. Akʼa yichʼ pasel te skʼanojel awoʼtan ta Balumilal jich te bin utʼil yak ta pasel ta chʼulchan. Jaʼ ini jaʼnax chaʼoxpʼaluk te bin la yakʼ ta nopel te Jesús ta swenta skʼoponel te Diose. ¿Yabal anaʼ yalel ta spisil?

 Jaʼnix jich te Jesús yak ta snojptesel te ants winiketik ta swenta te bin utʼil ya skʼan ya yil sbaik ta jujuntule. Jich la yal: Pasbeya jich te yantik te bin ya akʼan ya xpasbotat te jaʼate. ¿Mabal ya amulan te ay machʼa ya yakʼbat awil yutsil yoʼtane? Jaʼ yuʼun ya skʼan lek ya kil jbatik sok te yantike. ¡Kʼax leknax te kʼalal jich ya yichʼ pasel ta nichimal kʼinal ini! ¿Mabal jichuk?