ILAWIL te tsumut te yak ta koel tal ta sjol te winike. Te winik ini jaʼ te Jesuse. Ayniwan 30 yaʼbilal-a. Te machʼa jokimbil yuʼune jaʼ te Juane, sok ay la jnoptikix ta swenta ini. ¿Yatobal xjul ta awoʼtan te kʼalal te María la yulaʼtay te Elisabet sok te la stij sba te alal yuʼun sbujtsʼ kʼinal ta schʼujtʼ te Elisabete? Te alal te mato ayinem-ae jaʼ te Juane. Jaʼukmeto, ¿bin yakalik ta spasel te Juan sok te Jesús ta ora ini?

 Te Juan lajelto yoʼtan smulel ta mukʼul jaʼ Jordán te Jesuse. Jaʼme jich ya yichʼ pasel te ichʼ jaʼe. Ya yichʼ mulel ochel ta jaʼ te jtul ants winike, tey-abi ya yichʼ lokʼesel talel. Te Juan jaʼ jich ya spasbey te ants winiketike jaʼ yuʼun la yakʼbeyik sbiilin Juan J-akʼ ichʼ jaʼ. Jaʼukmeto, ¿bin yuʼun la yakʼbey yichʼ jaʼ te Jesuse?

 Jich la spas te Juan, melel jaʼnix tal te Jesús ta kʼambeyel yuʼun te akʼa yakʼbey yichʼ jaʼe. Te Juan jaʼ ya yakʼbey yichʼ jaʼ te machʼatik ya yakʼik ta ilel te sutojix yoʼtanik yuʼun te bintik chopol spasojike. Jaʼukmeto, ¿aybal bin chopol spasoj te Jesús te ya sut yoʼtan yuʼune? Maʼyuk, te Jesús maʼyuk bin ora ay bin chopol la spas, melel jaʼ sNichʼan Dios stukel te talem ta chʼulchane. Yuʼun ay yan swentail te bin yuʼun la skʼambey te akʼbot yichʼ jaʼ yuʼun te Juane. Kiltik te bin swentaile.

 Te kʼalal mato xtal ta stojol Juan te Jesuse carpintero-a. Te machʼa ya x-aʼtej ta carpinteroe ya x-aʼtej sok teʼ, jich bitʼil spasel mesaetik, sillaetik sok bankaetik. Te José te smamlal te María carpintero-a jaʼ la snojptes te Jesuse. Jaʼukmeto, te Dios ma la stikun tal ta Balumilal te sNichʼan yuʼun ya xtal ta aʼtel ta carpintero. Ay yan yaʼtel te kʼax mukʼxan skʼoplal te tal yuʼune, kʼot yorail te jajch spase. Jich yuʼun swenta la yakʼ ta ilel-a te tal spas te skʼanojel yoʼtan te sTate, jich la skʼambey te Juan te yakuk x-akʼbot yichʼ jaʼ yuʼune. ¿Labal smulan te Dios ta swenta ini?

 Laj, melel te kʼalal lokʼ tal ta jaʼ te Jesuse, ay chiknaj tal kʼop ta chʼulchan te jich la yale: Jaʼ jnichʼan ini te bayal yutsil koʼtan ta stojole. Jaʼnix jich jam yilel te chʼulchane sok ko tal tsumut ta stojol te Jesuse. Jaʼukmeto ma yuʼunuknix smelelil tsumutuk-a, jaʼnax te jich ta ilele, melel jaʼ te chʼul espíritu yuʼun te Diose.

 Ta yorail-abi ay bayal te bintik och snop ta yoʼtan te Jesuse, jich bajtʼ ta jochol kʼinal ta 40 kʼajkʼal. Tey kʼot ta tael yuʼun-a te Satanase, oxeb buelta kʼan akʼbukot skʼaxuntay te mantaliletik yuʼun te Diose. Jaʼukmeto ma la schʼuun te Jesuse.

 Ta patil-abi, sujt tal te Jesuse la snaʼbey sba chaʼoxtul winiketik te kʼot ta sbabial jtsʼaklinwanejetik o jnopojeletik yuʼun. Te chaʼoxtulike jaʼ te Andrés, Pedro (te jaʼnix jich sbiilinej Simón), te Felipe sok Natanael (te jaʼnix jich sbiilinej Bartolomé). Te Jesús sok te jnopojeletik ini bajtʼik ta skʼinal Galilea. Kʼotik ta Caná te jaʼ slumal te Natanael te banti ay il nujpunel, tey la spas-a te sbabial milagro yuʼun te Jesuse. ¿Yabal anaʼ bin-a? La skʼatpʼun ta vino te jaʼe.