¿BIN ya awil liʼ ini? Tsobol ta jtul te machʼatik kajalik tal ta sakil kawuetike. Jaʼukmeto, ilawil te banti yakalik ta talele. ¡Yakalik ta koel tal ta tulan animal ta stokalil chʼulchan! ¿Aybal kawuetik ta chʼulchan?

Maʼyuk, manix batsʼil, o smelelil kawuetikuk-a. Ya jnaʼtik ini, melel ma xjuʼ ya x-animajik ta tokal te kawuetike, ¿mabal jichuk? Jaʼukmeto te Biblia ya yalbey skʼoplal ta swenta kawuetik ta chʼulchan. ¿Yabal anaʼ bin yuʼun?

Jaʼ ta swenta te bitʼil ta namey kʼinal la yichʼ tuuntesel te kawuetik ta swenta yakʼel guerraetik. Jaʼ yuʼun te Biblia ya yalbey skʼoplal te ay machʼatik kajalik ta skawuik te yakalik ta koel tal ta chʼulchan swenta yuʼun ya yakʼik ta ilel te bitʼil ay guerra yuʼun Dios ta stojol te ants winiketik te ayik ta Balumilale. ¿Bin sbiil te guerra ini? Armagedón, jaʼme ya slajin te chopolil ta Balumilale.

Te machʼa ya xwolwan ta swenta te guerra te Armagedón sbiile, jaʼme te Jesuse. Julukme ta awoʼtan te jaʼ yichʼoj tsael yuʼun Jehová yuʼun jaʼ ya x-och ta ajwalil. Jaʼ yuʼun yichʼoj scorona te Jesuse. Te espadae jaʼ ya yakʼ ta naʼel te ya slajin spisil te skontratak te Diose. ¿Chajpnaxbal ya skʼan ya kiltik te bitʼil ya slajin Dios te machʼatik chopolike?

Lea awil te Aʼyej 10. ¿Bin ya awil tey-a? Jaʼ te tulan Pulemal te banti la yichʼik lajinel te chopol ants winiketike. ¿Machʼa-a te la yakʼ tal te tulan Pulemal ini? Jaʼ te Jehová Diose. Ilawil te Aʼyej 15. ¿Bin yak ta kʼoel ta pasel tey-a? Te Jehová yak ta slajinel ta kʼajkʼ te lum Sodoma sok te lum Gomorrae.

Lea te Aʼyej 33. Ilawil te bin yakal ta kʼoel ta pasel ta stojol te kawuetik sok te scarretaik yuʼun guerra te egipcioetike. ¿Machʼa-a te la yakʼ taluk jaʼ ta sbaike? Jaʼ te Jehovae. La spas ta swenta skoltayel te lum yuʼune. Sok lea te Aʼyej 36 sok 76, teyme ya awil-a te jaʼnix jich la yakʼ lajuk te lum yuʼun ta skaj te schopolile.

Jaʼ yuʼun mame skʼan te chajpnax ya kiltik te bitʼil ya stikun tal tsobol ta jtul chʼul abatetik te Jehová ta swenta slajinel spisil te chopolil ta Balumilale. ¿Bin ya xkʼot ta spasel ta patil? Ya xkʼaxotik ta yan página sok ya kiltik bael.