¿YABAL anaʼ te bin yakalik ta skʼoponel te tut achʼix sok te yamigotake? Jaʼnix te libro te yakat ta skʼoponel euke... Aʼyejetik te lokʼem ta Biblia. Jaʼ yakalik ta skʼoponel euk te aʼyej ini... «¿Bin utʼil ya xkuxinotik ta sbajtʼel kʼinal?»

 ¿Yabal anaʼ bin-a te ya snopike? Ta sbabial, jaʼ te ya skʼan nopel ta swenta te Jehová soknix ta swenta te Jesús yuʼun jich ay kuxlejalil ta sbajtʼel kʼinal. Te Biblia jich ya yal: Jaʼme te sbelal kuxlejalil ta sbajtʼel kʼinal ini. Nopa ta swenta te smelelil Diose, soknix ta swenta te Jesucristo te sNichʼane.

 ¿Bin utʼil ya xjuʼ ya jnoptik ta swenta te Dios Jehová soknix ta swenta te Jesús te sNichʼane? Ta sbabial, jaʼ te ya jkʼopontik te libro Aʼyejetik te lokʼem ta Biblia kʼalalto ta sbabial sok kʼalalto ta slajibal. Te libro ini bayal bintik ya yalbey skʼoplal ta swenta te Jehová sok te Jesuse, ¿mabal jichuk? Soknix ya yalbey bayal skʼoplal ta swenta te bintik spasojike soknix te bintik yato spasike. Jaʼukmeto ay bin yan ya skʼan kʼoponel.

 ¿Yabal awil te yan libro te ay ta lume? Jaʼ te Bibliae, o te Scʼop Dios. Kʼambeya te ayuk machʼa ya skʼopombat te textoetik te banti lokʼesbil skʼoplal te aʼyejetik ta libro ini. Te Biblia tsʼakal ya yalbotik te bin ya skʼan ya jpastik ta swenta spasbeyel yaʼtel te Jehová ta stojil sok te bitʼil ya xjuʼ kuʼuntik stael te kuxlejalil ta sbajtʼel kʼinale. Jaʼ yuʼun ya skʼan te ya jkʼaytes jbatik ta skʼoponel ta spisil ora te Bibliae.

 Jaʼukmeto ma tikʼuk-a te jaʼnax ya jnoptik ta swenta te Jehová sok te Jesucristoe. Yaniwan xjuʼ te bayal bin ya jnaʼtik ta swenta schebalik sok te bintik ya yakʼik ta nopele. Jaʼukmeto ayto te bin ya skʼanxan pasel swenta jich ya jtatik-a te kuxlejalil ta sbajtʼel kʼinale.

 Jaʼnix jich ya skʼan ya jpas ta jkuxlejaltik te bintik ya jnoptike. ¿Yatobal xjul ta awoʼtan te Judas Iscariote? Jaʼ te jtul jpuk kʼop te la yichʼ tsael yuʼun Jesús te kʼalal la stsa te lajchaytul jpuk kʼopetik yuʼune. Te Judase bayal bintik la snop ta swenta te Jehová sok ta swenta te Jesuse. Jaʼukmeto, ¿bin la spas? Ta patil ayin sbikʼtal yoʼtan sok la yakʼ ta kʼabal te Jesús ta 30 ta sejp plata. Mame sta kuxlejalil sbajtʼel kʼinal te Judase.

 ¿Yatobal xjul ta awoʼtan te Giezi te machʼa la jnopbeytik jtebuk skʼoplal ta Aʼyej 69? La skʼan kʼuʼul sok takʼin te ma jaʼuk ay ta swenta yichʼele. La spas lot yuʼun jich la sta-a te biluketik ini, jich akʼbot castigo yuʼun te Jehovae. Jaʼnixme jich ya yakʼbotik castigo euk teme ma jchʼuumbeytik te leyetik yuʼune.

 Jaʼukmeto ay bayal ta jtul lekil ants winiketik te spisil ora jun yoʼtan la spasbeyik yaʼtel te Jehovae. ¿Mabal jichuk ya skʼan ya jpastik euk? Jich bitʼil te tut Samuele ay bin lek ya yakʼ jnoptik. Julukme ta awoʼtan te la kiltik ta Aʼyej 55, aytonax chaneb o joʼeb yaʼbilal-a te kʼalal jajch ta aʼtel ta stojol te Jehová ta Nailpakʼ temploe. Jaʼ yuʼun, manchukme tutato maba ya skʼan ya yal te ma xjuʼ ya apasbey yaʼtel te Diose.

 Melelnix-a jpisiltik ya jkʼan jtʼumbeytik stalel te Jesucristoe. Jich bitʼil te ya xchiknaj ta ilel ta Aʼyej 87, ta yalalilto ay ta Templo ta kʼop sok yantik ta swenta te sTat te ay ta chʼulchane. Akʼame jnopbeytik te stalele. Akʼa kalbeytik ta stojol te ants winiketik te banti kʼalal ya xjuʼ kuʼuntik te bitʼil chajpnax yutsil te Dios kuʼuntik, te jaʼ te Jehová sok te Jesucristo te sNichʼane. Teme jich ya jpastik spisil ini, yame xjuʼ xkuxinotik ta sbajtʼel kʼinal ta yachʼil nichimal kʼinal te ya spas ta Balumilal te Diose.