ILAWIL te mukʼul teʼetik, te tʼujbil nichimetik sok te toyol witstikile. ¿Mabal jichuk te kʼax tʼujbilike? Ilawil te chij te yak ta weʼel ta skʼab te tut kereme. Sok ilawil te león chojetik sok te kawu te tey kotajtik ta akiltike. ¿Yabal amulan te ya xkuxinat ta jun kʼinal jich bitʼil ini?

 Te Dios ya skʼan te ya xkuxinat ta spisil ora ta jun nichimal kʼinal liʼ ta Balumilal, te banti maʼyukix te bin kʼux te ya xkʼax swokol yuʼun te ants winiketik ta ora ini. Jichme ya yal ta jamal te Biblia ta swenta te machʼatik ya xkuxinik ta yachʼil nichimal kʼinal. Jaʼnix ya xjokinotik yuʼun Dios. Ma xbajtʼ ayinukix lajel, mel oʼtan, okʼel o te bin kʼuxe, melel ya xkʼax bael spisil te bintik ay ta nailtoe.

 Jaʼme ay ta swenta te Jesús te ya xkʼot ta pasel te bintik tʼujbil ini. ¿Yabal anaʼ bin ora ya xkʼot ta pasel yuʼun? Jaʼme te kʼalal ya slajin spisil te chopolile soknix spisil te chopol ants winiketik ta Balumilale. Julukme ta awoʼtan te kʼalal ayin ta Balumilal te Jesús la slekubtes te jchameletik manchukme yanyantik-a te chamelil yichʼojike soknix ay machʼatik la schaʼkuxajtes. Jich la yakʼ ta ilel te bin ya spas ta swenta te Balumilal te kʼalal ya xmantalaj jich bitʼil Ajwalil te tsabil yuʼun te Diose.

 ¡Nopanax awaʼiy te yutsil te kuxlejalil ta yachʼil nichimal kʼinale! Te Jesús sok te jayeb machʼatik ya stsae yame xmantalajik ta chʼulchan. Jaʼme ya yilik te machʼatik ya xkuxinik liʼ ta Balumilal sok te ayuk stseʼelil yoʼtanik ta spisilike. Akʼa kiltik te bin ya skʼan ya jpastik swenta yuʼun te Dios ya yakʼbotik kuxlejalil ta sbajtʼel kʼinal ta yachʼil nichimal kʼinal te ya spase.