YA SUJTOTIK jun chebuk jaʼbil ta jpatik te kʼalal mato xbajtʼ ta Jerusalén-a te Esdrase. Te Mardoqueo sok te Ester jaʼ israeletik te kʼax mukʼ skʼoplalik te banti kʼalal wentainwan te ajwalil yuʼun Persia. Te Ester jaʼ ajwalil ants, te Mardoqueo te snichʼan stajun te Ester, jaʼ te machʼa mukʼ skʼoplal kʼot ta Persia jich bitʼil xchebal ajwalil ta stojol te mukʼul ajwalile. Yame kiltik bael te bin utʼil kʼot ta pasel ini.

 Laj bael te smeʼ stat te Ester te kʼalal tuto-ae, jich yuʼun jaʼ chʼitesot yuʼun te Mardoqueoe. Te ajwalil Asuero yuʼun Persia, ay smukʼul na ta Susa, tey yak ta aʼtel-a te Mardoqueo te jaʼ jtul j-abat yuʼune. Ta jun buelta te Vasti te yinam te ajwalil maba chʼuumbot smantal yuʼun, jich yuʼun la stsa yan yinam swenta ya yakʼ ta ajwalil ants. ¿Yabal anaʼ machʼa-a te la stsae? Jaʼ te tʼujbil achʼix Ester.

 Ilawil te jtoyba winik ini, spisil te ants winiketike yakalik ta snijanel sbaik ta stojol. Amán (Hamán) te sbiile, jaʼ jtul winik te kʼax mukʼ skʼoplal ta Persia. Jaʼ la skʼan te yakuk snijan sba euk te Mardoqueo te ya awil te nakal liʼ ini. Jaʼukmeto maba la skʼan spas te Mardoqueoe. Ma stojiluk la yil stukel te ya snijan sba ta stojol te chopol winik ini. Kʼax bayal ilin yuʼun te Amán. Ya kiltik bael te bin la spase.

 Te Amán la yaltiklambey lotil kʼopetik te ajwalil ta swenta te israeletike. Jich la yal: Chopolik sok maba ya schʼuumbatik te leyetik awuʼune, jaʼ yuʼun ya skʼan te ya yichʼik milel ta spisilike. Te ajwalil Asuero ma snaʼojuk teme israel ants te yiname. Jaʼ yuʼun la schʼuun te bin la yal te Amán sok la spas jun ley te banti la yal te bin kʼajkʼalil akʼa yichʼik milel ta spisil te israeletike.

 Te kʼalal la yaʼiy stojol te yachʼil ley te Mardoqueoe, kʼax bayal la smel yoʼtan yuʼun. Jaʼ yuʼun jich la yalbey bael te Ester: Kʼopona te ajwalile sok kʼambeya te manchuk ya yakʼotik ta lajele. Ta stojol te ley yuʼun Persia, mulil teme ay machʼa ya xbajtʼ yil te ajwalil teme ma ikʼbiluke. Jaʼukmeto te Ester bajtʼ yil te ajwalil manchukme maba ikʼbil yuʼun. Te ajwalil la sjach te sbaston te pasbil ta oro ta stojol Ester, jaʼ ini la skʼan la yal te bitʼil maba ya yichʼ milele. Te Ester la yikʼ ta weʼel te ajwalil Asuero sok te Amán. Tey jojkʼoybot yuʼun-a te ajwalil bin-a te ya skʼan te Estere. Te Ester la yal te ya schajpan weʼelil ta yan kʼajkʼal sok la yal teme ya xchaʼbajtʼ ta weʼel te ajwalil sok te Amán teylaj ya yalbey-a te bin ya skʼane.

 Ta yorail ta weʼelil-abi te Ester jich la yalbey te ajwalile: Te joʼon sok te jlumale ya kichʼkotik milel. Ilin yuʼun te ajwalile, jaʼ yuʼun jich la sjojkʼoy: ¿Machʼa-a te jich ya skʼan ya spase?

 Jich la yal te Ester: ¡Te jkontrainwaneje, jaʼ te chopol Amán ini!

 Jich bayal ilinxan yuʼun te ajwalile. Jich la stikun ta milel te Amán. Ta patil te mukʼul ajwalil la yakʼbey tulan yaʼtel te Mardoqueo, jaʼ xchebal ajwalil kʼot ta stojol. Jich te Mardoqueo la yal te akʼa yichʼ pasel yachʼil ley te banti ya yal te akʼa sle bin utʼil ya skoltay sbaik te israeletik te manchuk ya yichʼik milel ta bin ora albil skʼajkʼalel te jich ya xkʼot ta pasele. Jich bitʼil la sta tulan yaʼtel te Mardoqueoe, bayal koltayel la staik te israeletik ta swenta yantik ants winiketik jich maba la yichʼik milel yuʼun te skontratakike.