¡ILAWIL! Jich yilel te ay ta wokol te Daniele. ¡Jaʼukmeto maʼyuk bin yak ta pasbeyel yuʼun te león chojetike! ¿Yabal anaʼ bin yuʼun? ¿Machʼa la yotses te Daniel te banti ay te león chojetike? Kiltik bael.

 Jaʼ ayix ta ajwalil ta Babilonia jtul winik te sbiilinej Darío. Kʼax lek ilot te Daniele, ta skaj te lekil winik sok te pʼij yoʼtane, jich yuʼun akʼbot yaʼtel ta gobernador yuʼun te Darío te banti ay ta wentainwaneje. Ta swenta ini och sbikʼtal yoʼtanik te yantik winiketik ta stojol te Daniele, jich yuʼun ay bin la spasik.

 Bajtʼik ta stojol te Darío jich la yalbeyik: Jpisil ya jkʼankotik, mukʼul ajwalil te yakuk awakʼ jun ley te banti ya yal te maʼyuk machʼa ya xjuʼ ya skʼopon jtul dios o jtul winik ta 30 kʼajkʼal jaʼatnaxme te ya skʼoponatike, mukʼul ajwalil. Teme ay machʼa ya skʼaxuntay te leye, yame yichʼ chʼojel ochel ta schʼen león chojetik. Te Darío ma la snaʼ bin yuʼun te jich la skʼanik te winiketik ini. Jaʼukmeto la skuy te leke, jich yuʼun la yakʼ ta tsʼibayel. Jich ma juʼix ta jelel-a te leye.

 Te kʼalal la yaʼiy stojol te Daniel ta swenta ini, bajtʼ ta sna sok tey la skʼopon Dios jich te bitʼil kʼayemnanix ta spasel-ae. Te chopol winiketike snaʼojiknanix-a te maba ya yijkʼitay skʼoponel Dios te Daniele. Tseʼelnax yoʼtanik yuʼun, melel jich yilel te juʼ yuʼunik te bin la skʼanike, jaʼ te yakuk slajinik te Daniele.

 Kʼalal la yil te bin yak ta kʼoel ta pasel te ajwalil Darioe, la smel yoʼtan yuʼun. Jaʼukmeto ma juʼix yuʼun sjeltayel te leye, jich yuʼun la stikun ta chʼojel ochel ta schʼen león chojetik te Daniele. Jaʼukmeto jich albot yuʼun ajwalil te Daniele: Yakuklajme skoltayat te Dios te awakʼoj aba ta abatinel yuʼune.

 Te ajwalil Darío ma la snaʼ bin la spas yuʼun, te ajkʼabal-abi ma och swayel. Ta yan kʼajkʼal ta sab animalnax bajtʼ ta ora ta schʼen león chojetik. Jich te bitʼil ya awil ta lokʼombae. Jajch ta aw te ajwalile: ¡Daniel, j-abat yuʼun te kuxul Dios! ¿Juʼbal skoltaybelat ta ye león chojetik te Dios te awakʼoj aba ta abatinel ta stojole?

 La sjakʼ te Daniele: Te Dios la stikun tal chʼul abat yuʼun, jaʼ la smakbey ye te león chojetike jich maba la yutsʼinonik.

 Kʼax tseʼelnax yoʼtan yuʼun te ajwalile. Jich la stikun ta lokʼesel tal ta chʼen te Daniele. Tey-abi la yakʼ ta chʼojel ochel tey-a te chopol winiketik te kʼan slajinik te Daniele. Mato staojik koel-a te skʼubulil te chʼene, tsakotik ta ora yuʼun te león chojetike sok wuytiklambot sbakelik yuʼun.

 Ta patil te ajwalil Darío la yakʼ ta tsʼibayel ta swenta spisil te banti kʼalal swentainej te kʼinale: Ichʼaikme ta mukʼ te Dios yuʼun te Daniele, melel ya spas milagroetik te chajpnax ta ilele. Jaʼ la skoltay te Daniel, jich ma tiʼot yuʼun te león chojetike.