MATO sta cheb jaʼbil-a te uʼuninot te lum Babilonia yuʼun te medoetik sok te persaetike. ¡Ilawil te bin yak ta kʼoel ta pasel ta lokʼombae! Yakalikix ta lokʼel bael ta Babilonia te israeletike. ¿Bin utʼil kolik bael? ¿Machʼa koltayotik lokʼel yuʼun?

 Jaʼ te Ciro, te ajwalil yuʼun Persia. Ayto bayal jaʼbil ya skʼan ya x-ayin-a te Ciroe, te kʼalal jich akʼbot stsʼibay yuʼun Jehová te j-alwanej Isaías ta stojol te Ciroe: Jaʼ ya apas te bin ya kalbat te ya apase. Jamalme ya xjil te mukʼul puertaetik swenta yuʼun jich ya awuʼunin-a te lume. Ta melel, te Ciro jaʼ wolwan ta yuʼuninel te lum Babiloniae. Te medoetik sok te persaetik ochik bael ta ajkʼabal ta yutil te lume, melel jamal jilel te mukʼul puertaetike.

 Te Isaías te j-alwanej yuʼun Jehová jaʼnix jich la yal jilel te bitʼil te Ciro jaʼ ya yal mantal te ya xchaʼyichʼ pasel te lum Jerusalén soknix te Temploe. ¿Labal yal lokʼel te mantalil ini? Laj, la yal. Jich la yal ta stojol te israeletike: Baanik ta Jerusalén yuʼun ya achaʼpasik te Templo yuʼun Jehová te Dios awuʼunike. Jich bajtʼ spasik te israeletike.

 Jaʼukmeto ma spisiluk te israeletik te ayik ta Babilonia juʼ yuʼunik sujtel bael ta Jerusalén. Kʼax namal te sbelale, melel yaniwan xbeenik chaneb u, jaʼ yuʼun te machʼatik meʼel mamalikixe sok te machʼatik ayik ta chamele maba juʼix yuʼunik te sujtik baele. Ma jaʼuknax-abi ay yantikxan bin yuʼun. Jaʼ yuʼun jich albotik yuʼun te Ciroe: Akʼbeyaik plata, oro sok yantikxan biluketik ta swenta te machʼatik ya xbajtʼik ta schaʼpasel te Jerusalén sok te Templo yuʼune.

 Jich yuʼun te machʼatik sujtik bael ta Jerusalén la yichʼik akʼbeyel bayal majtʼaniletik. Jaʼnix jich te Ciro la yakʼ bael te mukʼul tazaetik sok te copaetik te la slokʼes te ajwalil Nabucodonosor ta Templo yuʼun Jehová te kʼalal la slajin te Jerusalene. Jaʼ yuʼun bayal te bintik la yichʼik bael te lume.

 Ta patil te kʼalal ayniwan chaneb u sbeelik-a te israeletike kʼotik ta Jerusalén, tey yorail tsʼakaj-a te 70 jaʼbil te maʼyuk jtuluk ants winik jil ta Jerusalén jaʼto te kʼalal la yichʼ lajinele. Manchukme sujtik ta slumalik te israeletike, yame staik tulan swokolik, yatome kiltik bael.