¡ILAWIL kʼax tulan yakalik ta aʼtel liʼ ini! Te israeletik yakalik ta spasel te tsʼajkʼetik yuʼun te Jerusalene. Ay kʼaxemix 152 jaʼbil-a te kʼalal te Nabucodonosor la slajin te Jerusalén, la sjin te tsʼajkʼetik sok la schikʼtiklan te puertaetik yuʼun te lume. Te israeletik ma la spasik ta oranax te tsʼajkʼetik te kʼalal sujtiknax tal ta Babiloniae.

 ¿Binwan utʼil la yaʼiy sbaik ta akʼop te israeletik ta swenta te bitʼil ayix jaʼbil te maba yichʼoj pasel te tsʼajkʼetike? Ayiknax ta xiwel yuʼun, melel yaniwan xjuʼ x-ochik tal ta oranax ta utsʼinel yuʼun-a te skontratakike. Jaʼukmeto ya kiltik te winik ini, te Nehemías sbiile, yak ta skoltayel te ants winiketik ta schaʼpasel te tsʼajkʼetik yuʼun te Jerusalene. ¿Yabal anaʼ machʼa-a te winik ini?

 Te Nehemías jaʼ jtul israel winik te talem ta lum yuʼun Susa, te banti ayik ta nainel-a te Mardoqueo sok te Ester. Te Nehemías aʼtej ta sna te ajwalil, jaʼ yuʼun lekniwan la yil sba sok te Mardoqueo soknix te Ester. Jaʼukmeto te Biblia ma xyal teme jaʼ aʼtej ta stojol smamlal te Ester, te jaʼ te ajwalil Asueroe. Jaʼ aʼtej ta stojol te yan ajwalil, te Artajerjes sbiile.

 Julukme ta awoʼtan, te Artajerjes jaʼ te lekil ajwalil la yakʼbey spisil te takʼin te Esdras yuʼun la yichʼ bael ta Jerusalén ta xchajpanel te Templo yuʼun te Jehovae. Jaʼukmeto, te Esdras maba la spas te stsʼajkʼul te lum te jineme. Kiltik bael bin utʼil kʼot ta pasel yuʼun te Nehemiase.

 Ay kʼaxemix oxlajuneb jaʼbil te kʼalal te Artajerjes la yakʼbey bael takʼin te Esdras yuʼun ya schajpan te Temploe. Te Nehemías jaʼ jkʼasesej copa yuʼun te ajwalile. Jaʼ ya skʼasesbey vino yuchʼ te ajwalile sok jaʼ ya yil teme ma yichʼojuk veneno te vinoe. Jaʼ jun aʼtelil te tulan skʼoplale.

 Ta jun buelta te Hanani (Hananí) te yermano te Nehemías sok yantik winiketik ta lum Israel tal yulaʼtayik te Nehemiase. La scholbeyik yaʼiy te swokolik te israeletike, sok te bitʼil jinemto te stsʼajkʼul te Jerusalene. Te Nehemías kʼax bayal la smel yoʼtan yuʼun, jich la skʼopon te Jehová ta swenta ini.

 Ta jun buelta te ajwalil la yil te ay ta mel oʼtan te Nehemiase, jich jojkʼoybot yuʼun: ¿Bin yuʼun te ayat ta mel oʼtane? Te Nehemías la yalbey te jaʼ ta swenta te bitʼil maba chajpajem ta lek te Jerusalén sok te bitʼil jinemto te stsʼajkʼule. Jich yuʼun te ajwalil la sjojkʼoybey: ¿Bin ya akʼan?

 Te Nehemías jich la yal: Tikunawon bael ta Jerusalén, swenta jich ya jchaʼpas te tsʼajkʼetike. Te ajwalil Artajerjes kʼax bayal yutsil yoʼtan. Albot yuʼun te ya xjuʼ xbajtʼe, sok koltayot yuʼun te kʼalal akʼbot bael teʼ ta swenta te aʼtelil te la yichʼ pasele. Mato jaluk skʼoel ta Jerusalén-a te Nehemías te kʼalal la scholbey yaʼiy te lum ta swenta te bin snopoj ya spase. La smulanik te bin la yichʼik albeyel yuʼune, jich la yalik: Jajchukotik ta schaʼpasel.

 Kʼalal te skontratakik te israeletik la yilik te yak ta moel yuʼunik te tsʼajkʼe, jich la yalik: Ya kochintaytik sok ya jmiltik soknix ya jkomtik te aʼtelile. Kʼalal la snaʼ stojol te Nehemías ta swenta ini, la yakʼbey espadaetik sok lanzaetik te j-aʼteletike sok jich la yal: Mame xiwex ta stojolik. Akʼaik guerra ta swenta awermanotakik, te kerem achʼixetik awuʼunik, awinamik sok te anaike.

 Ma xiw yoʼtan te lume. Chapal yaʼtejibik yuʼun milaw ta kʼajkʼal ajkʼabal, jich ma la skom sbaik ta spasel te aʼtelile. Jich yuʼun, ta 52 kʼajkʼalnax juʼ yuʼunik ta spasel te tsʼajkʼe. Jich maʼyukix xiwel ta banti te lume. Te Nehemías sok te Esdras la yakʼik ta nopel te ley yuʼun te Diose, jich tseʼelnax yoʼtan te lume.

 Jaʼnax yuʼun te ma jichukix-a te kʼalal mato ikʼbilukik bael ta chukel ta Babilonia-ae. Jaʼ ay ta mantalteswanej-a te ajwalil yuʼun Persia jich la yakʼ sbaik ta abatinel ta stojol. Jaʼukmeto te Jehová yaloj ta jamal te ya stikun tal jtul yachʼil ajwalil te jaʼ ya yichʼ tal lamal kʼinal ta stojol te lume. ¿Machʼaniwan-a? ¿Bin utʼil ya yichʼ tal lamal kʼinal ta Balumilal? Swenta la yichʼ naʼbeyel skʼoplal ini kʼaxniwan 450 jaʼbil, tey-abi ayin jtul alal te kʼax mukʼ skʼoplale, jaʼ ini yanmeix aʼyej stukel-abi.