TE KʼALAL la sta wokoliletik te israeletike, la skʼambeyik koltayel te Jehovae. Jaʼ yuʼun akʼbotik koltayel ta swenta jwolwanejetik te ma xiw yoʼtanike. Te Biblia ya yakʼbey sbiilin juecetik. Te machʼa la yichʼ akʼel ta sbabial juez jaʼ te Josué, ta patil och yantik juecetik jich bitʼil te Otoniel, Aod sok te Samgar. Jaʼukmeto ay chaʼtul antsetik te koltaywanik ta stojol te lum Israele, te sbiilik te antsetik ini jaʼ, Débora sok Jael.

 Te Débora jaʼ j-alwanej ants. Te Jehová ya yakʼbey snaʼ te bin yato xkʼot ta pasele, jich ya yakʼbey snaʼ stojol te ants winiketik te bin ya yal te Jehovae. Jaʼnix jich yichʼoj yaʼtel ta juez. Ya snajkan sba ta yeʼtal jpejt palmera ta banti witstikil jich ya xtal ta ilel yuʼun te ants winiketik swenta yuʼun ya skoltay ta xchajpanel te kʼopetik yuʼunike.

 Ta yorail-abi jaʼ ay ta ajwalil yuʼun Canaán te Jabine. Ay 900novecientos ta kojt scarreta yuʼun guerra. Kʼax tsobolik sok bayal yipik te soldadoetik yuʼune, jaʼ yuʼun bayal ta jtul israeletik la yichʼik abatinel yuʼun te ajwalil Jabín. Te capitán yuʼun soldadoetik yuʼun te Jabine, Sísara sbiil.

 Ta jun buelta te Débora la stikun ta ikʼel te Barac, jich la yalbey: Jich yaloj te Jehová: Tsoba 10,000 ta jtul winiketik sok ikʼa bael ta wits Tabor. Tey ya kikʼbat tal ta atojol-a te Sisarae. Joʼon ya kakʼbat atsal soknix te soldadoetik yuʼune.

 Te Barac jich la yalbey te Deborae: Ya xboon teme ya ajokinon baele. Jich bajtʼ te Deborae, jaʼukmeto jich la yalbey te Barac: Mame jaʼukat ya awichʼ ichʼel ta mukʼ ta swenta te bin ya xkʼot ta pasele, melel te Jehová yame yakʼ ta skʼab jtul ants te Sisarae. Jich kʼot ta pasel ini.

 Jich te Barac ko tal ta wits Tabor yuʼun ya sta sba sok te soldadoetik yuʼun Sísara. Ajkʼnax la yakʼ tal tulan jaʼal te Jehová noj ta jaʼ te banti ayike, jich la sjikʼanik jaʼ bayal ta jtul te skontratakike. Te Sisarae ko ta scarreta sok lokʼ bael ta anel.

 Tey-abi te Sísara kʼot ta snailpakʼ te Jaele, la yikʼ ochel sok la yakʼbey yuchʼ jtebuk leche, ta swenta ini oranax akʼbot swayel te Sisarae. Te Jael la stsak steʼel nailpakʼ te jaynax sniʼ la sbajbey ta sjol te Sisarae. ¡Te kʼalal kʼot ta patil te Barac, te Jael la yakʼbey yil te lajemix-a te Sisarae! Jich kʼot ta pasel te bin la yal te Deborae.

 Ta patil la yichʼ milel te ajwalil Jabín, jich jalaj jun chebuk kʼajkʼal lamal kʼinal ta stojol te israeletike.