¡ILAWIL! ¿Bin yakalik ta spasel te ants winiketik ta ora ini? ¡Yakalik ta yichʼel ta mukʼ jkojt jkolel toro! ¿Bin yuʼun te jich yakalik ta spasele?

 Kʼalal te Moisés jalaj bayal kʼajkʼal ta wits, jich jajchik ta yalel te israeletike: Ma jnaʼtik te bin la spas te Moisese. Akʼa jpastik jdiostik te ya slokʼesotik bael liʼ ini.

 Lek ay, jich la yal te Aarón te sbankil te Moisese. Lokʼesaik te stakʼinal achikinik te pasbil ta oro sok ichʼbonik talel. Te kʼalal jich la spasik te israeletike, te Aarón la yulubtes te bin ichʼbotik bael ta stojole jich la spas jkojt jkolel toro. Jich la yal te lume: ¡Jaʼ Dios kuʼuntik ini te la slokʼesotik tal ta skʼinal Egipto! Jich yuʼun la spasik mukʼul kʼin sok la yichʼik ta mukʼ te jkolel toro te pasbil ta oroe.

 Kʼalal te Jehová la yil ini, kʼax bayal ilin yuʼun. Jich la yalbey te Moisés: Baan ta ora sok koan bael. Yak ta bolobel te lume. Chʼayix ta yoʼtanik te leyetik kuʼune sok yakalikix ta snijanel sbaik ta stojol te jkojt jkolel toro te pasbil ta oroe.

 Jich ko tal ta oranax ta wits te Moisese. Te kʼalal noptsajix kʼoel-ae, jaʼ la yil ini. ¡Te yakalik ta kʼayoj sok ta ajkʼot te ants winiketik sjoytayojik te jkolel toroe! Kʼax ilin yuʼun te Moisés la schʼoj ta lum te chaʼpejch ton te banti tsʼibaybil te leyetike, topʼ yuʼun. Ta patil la stsak te jkolel toro te pasbil ta oro la schikʼ, la sjuchʼ jaʼto kʼalal tsʼubiltik jil.

 La spasik te bin kʼax ma lekuk te lume. Jaʼ yuʼun te Moisés la yalbey chaʼoxtul winiketik te akʼa stsakik yespadaik. Sok jich la yalxan: Te machʼatik la yichʼik ta mukʼ te jkolel toroe yame xlajik. ¡Jich yuʼun te winiketik te la stsak yespadaike la smilik 3,000 ta jtul ants winiketik! Jaʼ ini ya yakʼ kiltik te ya skʼan jtsajtay jbatik te jaʼnax ya skʼan kichʼtik ta mukʼ te Jehovae, ma jaʼuk te lotil diosetike.