¡ILAWIL! ¡Yakalik ta kʼaxel bael ta mukʼul jaʼ Jordán te israeletike! Jaʼukmeto, ¿banti bajtʼ te jaʼe? Ta kʼajkʼaleltik-abi ya yakʼ bayal jaʼal, te kʼalal mato xkʼaxik bael-ae, kʼax nojel-a te mukʼul jaʼe. ¡Jaʼukmeto tupʼ bael spisil te jaʼe! ¡Yakalik ta kʼaxel bael te israeletik ta yolil mukʼul jaʼ te takinix te slumile, jich bitʼil kʼaxik ta Mar Rojo! ¿Banti bajtʼ spisil te jaʼe? Yame kiltik bael.

 Kʼalal la sta yorail te kʼaxik bael ta mukʼul jaʼ Jordán te israeletike, jich albot yuʼun Jehová te Josué te akʼa yalbey te lume: Te sacerdoteetik yame skʼechik bael te skaxaul te chapbil kʼop sok jaʼme ya xnailajik bael ta jtojoltik. Te kʼalal ya stekʼik ochel te mukʼul jaʼ Jordane, yame xkom ta beel te jaʼe.

 Jich yuʼun te sacerdoteetik la skʼechik bael te skaxaul te chapbil kʼope jich nailajik bael ta stojol te ants winiketike. Te kʼalal kʼotik ta Jordán te sacerdoteetike, ochik ta jaʼ. Tulan ya x-okin te jaʼe sok kʼubul. ¡Ta yorailnax-a te kʼalal la stekʼik ochel te jaʼe, kom ta beel ta oranax! ¡Milagro te bin kʼot ta pasele! Tejkʼaj ta beel te jaʼe, jaʼ te Jehová te la smakbey sbe te jaʼe. ¡Takij te mukʼul jaʼe!

 Te sacerdoteetik te skʼechojik bael te skaxaul te chapbil kʼope kʼaxik ta yolil te mukʼul jaʼ te takijemixe. ¿Yabal xjuʼ awiltiklan te ayik ta lokʼombae? ¡Te kʼalal tekʼajtik tey-ae, spisil te israeletik jajchik ta kʼaxel bael ta mukʼul jaʼ Jordán te takijemix slumile!

 Kʼalal spisil kʼaxemikix-a te israeletike, te Jehová la yalbey te Josué te akʼa yalbey lajchaytul winiketik te ay yipike: Baanik ta mukʼul jaʼ te banti ayik te sacerdoteetik te skʼechojik te skaxaul te chapbil kʼope. Ichʼaik tal lajchayeb tonetik tey-a sok akʼaik te banti ya xkʼax ajkʼabal awuʼunike. Jich yuʼun teme ay la sjojkʼoybeyex ta patil te awal anichʼnabik bin swentail te tonetik ini, yame awalbeyik te jaʼ ta skaj te kʼalal kʼax ta mukʼul jaʼ Jordán te skaxaul te chapbil kʼope, te kom ta beel yuʼun te jaʼe. ¡Te tonetik ini yame xtuun ta swenta snaʼojibal awuʼunik te milagroe! Jaʼnix jich te Josué la stejkʼan lajchayeb tonetik ta banti tejkʼajik te sacerdoteetik ta mukʼul jaʼ.

 La sta yorail te Josué jich la yalbey te sacerdoteetik te skʼechojik te skaxaul te chapbil kʼope: Lokʼanikix tal ta Jordán. Te kʼalal lokʼik tale, jajch ta beel yan buelta te jaʼe.