KʼAXIX bayal jaʼbil... 25, 30, 35, 39 jaʼbil, te israeletike ayikto ta jochol takin kʼinal. Jaʼukmeto te jayeb jaʼbil kʼax ini te Jehová la skanantay te lum yuʼune. La smakʼlin ta maná. Sok jaʼ la stojobtes bael ta be ta swenta balal tokal ta kʼajkʼaleltik sok ta balal kʼajkʼ ta ajkʼabal. Maba pokoʼub te skʼuʼ spakʼike sok maba sijtʼ yokik.

 Ayikix ta sbabial u yuʼun te 40 jaʼbil slokʼelik tal ta Egipto te israeletike. Ayik ta Cades yan buelta. Tey ayik-a te kʼalal la yichʼik tikunel bael te lajchayeb ta jtul jtsajtaywanejetik ta yilel te skʼinal Canaán, jaʼ ini jteb ma sta 40 jaʼbil te jich kʼot ta pasele. Te María te swix te Moisese laj ta Cades. Jich bitʼil ta nailale ay kʼop yan buelta tey-a.

 Melel maʼyuk banti ya xjuʼ sta jaʼ yuchʼik te israeletike. Jaʼ yuʼun jajchik ta wulwunel ta stojol te Moisese: Jaʼ lek te lajukotike. ¿Bin yuʼun la alokʼesonkotik tal ta Egipto yuʼun ya awikʼonkotik tal liʼ ta kʼinal te banti kʼax maʼyuk bin ya xchʼie? Liʼ ini maʼyuk sbakʼ awal tsʼunubil, maʼyuk higo, tsʼusub sok granada; sok maʼyuk jxujtʼuk jaʼ kuchʼtik.

 Kʼalal te Moisés sok te Aarón bajtʼik ta skʼoponel Dios ta Nailpakʼ templo, jich albot yuʼun Jehová te Moisese: Tsoba tal te snichʼnab Israel. Kʼopona te mukʼul ton ta comon sitil, teyme ya xlokʼ tal bayal jaʼ-a te ya awakʼbey yuchʼik te israeletik sok te chambalametik yuʼunike.

 Jich yuʼun te Moisés la stsob te israeletike, sok jich la yal: ¡Aʼiya awaʼiyik ta lek jaʼex te maʼyuk smukʼul awoʼtanik ta stojol te Diose! ¿Yabal akʼan ya jlokʼesbeyexkotik jaʼ ta mukʼul ton ini te joʼon sok te Aarone? Jich te Moisés la smaj cheb buelta ta snabateʼ te mukʼul tone, jich lokʼ tal bayal jaʼ tey-a. Ay bayal jaʼ yuʼun ya yuchʼik spisil te ants winiketik sok spisil te chambalametik te ayik tey-ae.

 Jaʼukmeto te Jehová ilin ta stojol te Moisés sok te Aarón. ¿Yabal anaʼ bin yuʼun? Jaʼ yuʼun te bitʼil la yalik te jaʼiknix ta swenta te ya slokʼesik jaʼ ta mukʼul tone. Jaʼukmeto jaʼnix ta swenta Jehová te la yakʼ kʼotuk ta pasele. Jich bitʼil te Moisés sok te Aarón te ma la yalik ta jamal ta swenta ini, te Jehová la yal te ya yakʼtiklambey castigo. Maba ya awakʼik ochel ta skʼinal Canaán te lum kuʼune, xchi te Jehová Diose.

 Jich te israeletik lokʼik bael ta Cades. Maba jalajik te bitʼil kʼotik ta wits Hor. Tey laj-a te Aarón ta ba wits. Ayix 123 yaʼbilal-a te kʼalal laje. Bayal la smel yoʼtanik yuʼun te israeletik sok 30 kʼajkʼal la yokʼetayik te Aarone. Jich te Eleazar snichʼan te Aarón och ta mukʼul sacerdote ta swenta te nación yuʼun Israel.