¿Bin yuʼun ya skʼan jnoptik te bin ya yal te Bibliae?
Maʼyuk yan libro te jich kʼaxemto yichʼoj pasel sok pukel te bitʼil te Bibliae. ¿Aybal akʼoponojix te Biblia te kʼax mukʼ skʼoplale? Nameyix tal kʼinal ta spisil stsʼumbal te ants winiketik ay staoj smukʼul yoʼtanik ta Biblia sok staojik koltayel ta swenta xkuxlejalik sok yakalik ta smaliyel te bin yaloj te ya spas te Diose. Jaʼukmeto ay bayal te machʼatik mato skʼoponojik te Biblia sok ay yantik manchukme jchʼuunjeletik o maʼuk te yawan skʼan snopikxan ta lek. Teme jich ya akʼan te jaʼate, te folleto ini pasbil swenta yuʼun ya skoltayat ta snopelxan te bin ya yal te Bibliae.
TE KʼALAL mato xjajchat ta skʼoponel te Bibliae, yame skʼan te yakuk anaʼ nail te bintik chaʼox chajp yichʼoje. Te Bibliae, jaʼnix jich naʼbil sba bitʼil Xchʼul Kʼop Dios, te yichʼoj 66 ta pajk bikʼtal libroetik. Te sbabial libroe jaʼ Génesis te slajibale jaʼ te Apocalipsis, o Revelación.
¿Machʼa lokʼem tal ta yoʼtan te bin tsʼibaybil ta Bibliae? Kʼax lek te jojkʼoyel ini. Cuarenta ta jtul winiketik la stsʼibayik te 66 pajk bikʼtal libroetik te yichʼoj te Bibliae, jalaj tal ta pasel mil seiscientos jaʼbil. Jaʼukmeto jtul maʼyuk machʼa la yal te jaʼ lokʼem tal ta yoʼtan te bin la stsʼibayike. Sok ay jtul te jich la yal: «Spisil te bin tsibaybil jilel ta sjun jichnix la skʼan Dios te ya yichʼ tsʼibayel» (2 Timoteo 3:16). Sok ay yan te jich la yal: «Te espíritu yuʼun Jehová kʼopoj ta jkuenta ay ta ke te skʼope» (2 Samuel 23:2). Jich bitʼil la yichʼix alel, te machʼatik la stsʼibayik te bin ya yal te Biblia la yalik ta jamal te jaʼ lokʼem tal ta yoʼtan te Jehová te mukʼ Ajwalil yuʼun spisil te bintik spasoj ta chʼulchan sok Balumilal. Ta Biblia ya yakʼbotik jnaʼtik te Dios te ya skʼan xnoptsajotik ta stojole.
Jaʼnix jich ya skʼan jnaʼtik te ay bin mukʼ skʼoplal ya xchol te Bibliae: Jaʼ te ya yakʼ jtul Ajwalil ta chʼulchan te Dios yuʼun jich ya yakʼ sba ta naʼel sok ya yichʼ ichʼel ta mukʼ te bitʼil jaʼnax stukel ya xmantalaj ta stojol te ants winiketike. Te kʼalal ya akʼopon te folleto ini yame awil bael te junax te bin ya xcholbey skʼoplal ta spajkʼal te Biblia ta Génesis kʼalalto ta Apocalipsis.
Ayukme ta awoʼtan te bin la yichʼix albeyel skʼoplale, jaʼ ya skoltayat bael ta snopel te bin ya yal te Biblia te jaʼ jun libro te kʼax mukʼ skʼoplale.
^ parr. 9 Ay bayal ta chajp te bin utʼil ya yichʼ alel te ajtale. Ta folleto ini ya jtuuntestik te letraetik (m.j.jkʼ.) te ya skʼan yal mato jaʼuk jkʼajkʼaleltik sok (t.jkʼ.) te ya skʼan yal ta jkʼajkʼaleltik, yame xchiknaj ta yeʼtal jujun página te kitsbil ya awile.
Yaniwan amulan-euk sk'oponel ini
SWENTA JKʼOPLALTIK
¿Bin yuʼun ya skʼan ya jnoptik te Bibliae? (najtʼ)
Bayal miyon ta tul ants winiketik staojbeyik sujtib ta Biblia te jojkʼoyeletik te tulanik skʼoplale. ¿Yabal akʼan anaʼbey sujtib-euk?
