AYIX yoxebal kʼajkʼal slajel-a te Cristoe, ay chaʼoxtul jnopojel antsetik te bajtʼ yilik te mukenale, jamal kʼot staik. Ay machʼa sbalchʼunojix lokʼel-a te ton te smakojbey te stiʼil te mukenale, sok jochol la staik.

Ta patil chiknaj chaʼtul chʼul abatetik. Te jtule jich la yalbey te antsetike: «Yak alebelik te Jesús talem ta Nazaret [...], chaʼkuxajemix» (Marcos 16:6). Jich te antsetik bajtʼik ta oranax ta animal ta yalbeyel te jpuk kʼopetik yuʼun te Jesuse. La sta sbaik ta be sok te Jesús te jich albotik yuʼune: «Ma xiwex. Baanik, albeyaik yaʼiy te kermanotak. Akʼa bajtikuk ta Galilea, tey ya xkʼot yilonik-a» (Mateo 28:10).

Jaʼnix ta kʼajkʼal abi chaʼtul jnopojeletik te lokʼik bael ta Jerusalén te yakalik ta bael ta lum Emaús, ay machʼa noptsaj tal ta stojolik te ma snaʼbeyik sbae sok jojkʼoybotik yuʼun te bin-a te yakalik ta yalele. Ma la snaʼik teme jaʼnix-a te Jesuse, melel yanajemix te sit yelawe. Ayik ta mel oʼtan-a te la sutik te jaʼ yakalik ta yalbeyel tal skʼoplal ta swenta te Maestro yuʼunike, jich te machʼa kʼoponotik yuʼun jajch ta cholbeyel yaʼiyik te bin tsʼibaybil jilel ta swenta te Mesiase. Ta melel, yuʼunix tsʼakal la spas-a te Jesús te bintik albil jilel skʼoplal ta swenta te Mesiase. * Kʼalal la snaʼik te jaʼ yakalik ta kʼop sok te Cristoe, te jaʼix jun espíritu-ae jich sak chʼay bael.

Te chaʼtul jnopojeletik chaʼsujtik bael ta Jerusalén, jaʼ bajtʼ yilik te banti stsoboj sbaik te jpuk kʼopetik te makalik ta nae. Yaktonax ta cholbeyel skʼoplal-a te bin kʼot ta pasel, spisil te machʼatik tey ayik-ae chamnax la yaʼiyik yuʼun te kʼalal la yilik te Jesús te chiknaj ta stojolik. «[¿]Bin yuʼun te wokol ya xchʼuun awoʼtanike?», jich jojkʼoybotik yuʼun. Sok la yalxan: «Jich tsʼibaybil jilel te la skʼan te ya xkʼax swokol te Cristo sok ta yoxebal kʼajkʼal ya xchaʼkuxaj tal ta yolil te machʼatik chamenik» (Lucas 24:38, 46).

Ta chaʼwinik kʼajkʼal la yakʼxan sba ta ilel te Jesuse. Ta jun buelta, kʼaxem ta quientos ta jtul ants winiketik te la yilike. Teyniwan la yalbey jilel-a te jnopojeletik yuʼun ta swenta te aʼtelil ini te mukʼ skʼoplale: «Baanik, sok otsesaik ta jnopojel te ants winiketik ta spisil ta jchap nacionetik, [...] akʼtiklambeya snopik te yame xchʼuunik spasel spisil te mantal kalojbeyexe. Mame xchʼay ta awoʼtanik te jokinejex ta spisil ora, jaʼto ta slajibal te bintik ay ta balumilal» (Mateo 28:19, 20, NM).

Te kʼalal junxanix buelta la stsob sba te Jesús sok te bulucheb jpuk kʼopetik yuʼun te jun yoʼtan yakʼoj sbaik ta stojole, jich la yalbey: «Yame awichʼ awuelik te kʼalal ya xtal ta atojolik te chʼul espíritu; testigo ya xkʼoex kuʼun [...] kʼalal ta stiʼil balumilal» (Hechos 1:8). Ta patil, mo bael ta chʼulchan, potsot ta tokal, chʼay ta sitik te machʼatik yakalik ta yilele.

(Lokʼem ta capítulo 28 yuʼun Mateo, ta capítulo 16 yuʼun Marcos, ta capítulo 24 yuʼun Lucas, ta capítulo 20 sok 21 yuʼun Juan sok 1 Corintios 15:5, 6.)