¿BIN yuʼun te xtaluk ta Balumilal te Jesuse? Jaʼnix la yal: «Puersa ya xba kal ta bay lumlumtik te lek yachʼil kʼop te ya xjajchʼix ta mandal te Diose» (Lucas 4:43, XCD). Yame kiltik chan chajp skʼoplal te Ajwalinel yuʼun Dios te la yakʼ ta nopel te Jesuse, te jaʼ bajtʼ yoʼtan ta xcholbeyel skʼoplale.

1. Te Jesús ya x-och ta Ajwalil. Te Jesús jamal la yal sba te jaʼnix-a te Mesiase (Juan 4:25, 26). Jaʼnix jich la yakʼ sba ta naʼel te bitʼil jaʼnix-a te Ajwalil te la yichʼ akʼbeyel yil te Daniele. Te Jesús la yalbey te jnopojeletik yuʼun te ya sta yorail te ya sjujkan sba ta «smukʼul juktajib ta utsilal» sok la yaltiklambey te ajtaybiliknax te machʼatik ya xpasawanik ta mantal ta stsʼeele (Mateo 19:28). Te jayeb machʼa ya xbajtʼik la yakʼbey sbiilin «tut jtsojb tuminchijetik». Jaʼnix jich la yalbey skʼoplal ta swenta «yantik tuminchijetik» te maba jaʼ sjoʼtak te tut jtsojb tuminchijetike (Lucas 12:32; Juan 10:16).

2. Te Ajwalinel yuʼun Dios ya yichʼ tal te bin toj ta pasele. Te Jesús la yal te jaʼ ta swenta te Ajwalinel yuʼun Dios ya slajinbey skʼoplal te bintik ma lek la yal te Satanás ta stojol sbiil te Diose. ¿Binwan utʼil ya slajinbey skʼoplal? Jaʼ te kʼalal ya yichʼ Chʼultesbeyel te sbiil ta swenta te lot albil skʼoplal ta stojol kʼalalto ta Edén (Mateo 6:9, 10). Jaʼnix jich, te Cristo la yakʼ ta ilel te jaʼ ta swenta te Ajwalinel yuʼun Dios te ya xba lajuk skʼoplal te pʼajele, melel la snojptes te antsetik sok te winiketik, jkʼulejetik sok meʼbaetik maʼyuk machʼa la stsa stukel. Manchukme jaʼnax tikunot tal ta xcholbeyel skʼop Dios te israeletik, jaʼukmeto, la spas tulan ta xcholbeyel skʼop Dios te samaritanoetik sok yantikxan ants winiketik ta yantik nación. Te Jesús maba la spajbey stalel te fariseoetik, melel jaʼ uʼuninbil yoʼtanik yuʼun te pʼajaw sok tsabilnax te machʼatik lek la yilike.

3. Te Ajwalinel yuʼun Diose ma liʼuk ay ta balumilal te uʼunibil yuʼun te Satanás. Ta yorail-a te kʼalal kuxin te Jesús ay bayal kʼopetik yuʼunik-a te judioetike, melel te Israel wentainbil yuʼun yan nación-a. Jaʼukmeto, te Jesús maʼyuk bin ora la skʼan xchʼik sba ta política (Juan 6:14, 15). Ta jun buelta te kʼalal yak ta kʼop sok jtul ajwalil, jich la yal: «Te bitʼil ajwalilone, ma jaʼuk ta swenta in balumilal to» (Juan 18:36, XCD). Sok jich la yalbey te jnopojeletik yuʼune: «Ma yuʼunukex te balumilal» (Juan 15:19). Jaʼnix jich ma la yakʼbey stsak yaʼtejibik yuʼun milaw te jnopojeletike, nijaʼuk-a te kʼalal kʼan yichʼ utsʼinel te Jesuse (Mateo 26:51, 52).

4. Te Cristo ya xmantalaj sok xkʼuxul yoʼtan. Te Jesús jamal la yalbey te machʼatik ya xtʼunot yuʼun ya skoltay te kʼalal ay swokolike (Mateo 11:28-30). Yuʼunix jich la spas-a, melel la yakʼtiklambey lekil tsitsel ta swenta teme ay bin ya xwoklaj o, xkʼopojoj yoʼtanik yuʼune sok bin utʼil ta tael te smelelil tseʼel oʼtanile, sok te lekuk ya yil sbaik sok te yantike, sok te manchuk ya xbikʼtaj yoʼtanik yuʼun te kʼulejalile (Mateo, capítulo 5 kʼalal ta 7). Te Jesús la yakʼ ta ilel te xkʼuxul yoʼtan sok lek yoʼtan ta stojol te ants winiketike. Biluk ants winiketik noptsajik ta stojol te Jesús manchukme meʼbaetik, melel snaʼojik te lek ya x-ilotik yuʼun sok te ya x-ichʼotik ta mukʼ yuʼune. ¿Aybal machʼa ma skʼan te ayuk jtuluk Ajwalil jich bitʼil te Jesuse?

Te milagroetik te la spas te Jesuse, jaʼnax señail te bin yato spas te Ajwalinel yuʼun Dios. ¿Bin lokʼ yuʼun-a te bitʼil la spas milagroetike? Akʼa kiltik.

(Lokʼem ta sjun Mateo, Marcos, Lucas sok Juan.)