TE YACHʼIL jtsojb chʼuunjeletik yuʼun Cristo ya yichʼik tuʼuntesel yuʼun ya xkʼot ta pasel te skʼanojel yoʼtan te Diose. Jaʼukmeto te machʼatik tey ayik-ae la stsʼikik te tulan utsʼinel ta stojol te yantik ants winiketik soknix ta stojol te machʼatik pajal xchʼuunel yoʼtanik soke. ¿Bin utʼil juʼ yuʼunik te jun yoʼtan la yakʼ sbaike? Jaʼ ta swenta te veintiun cartaetik te yichʼoj te Achʼ Testamento te banti akʼbot smukʼul yoʼtanik yuʼun sok lekil tsitsel te kʼaxto tuun yuʼunike.

Te Pablo la stsʼibay te sbabial catorce cartaetik, te jajch ta carta yuʼun Romanos jaʼto kʼalal ta carta yuʼun Hebreos. Te cartaetik ini jaʼ yichʼojbey sbiil te banti la yichʼ tikunel bael chikan teme ta stojol jtul winik o ta stojol te jtsojb jchʼuunjeletik. Kiltik chaʼoxchajpuk te bintik la yalbey skʼoplal te Pabloe.

Tsitsel ta swenta jtaleltik sok te bintik ya jpastike. Te machʼatik ya xyalik ta mulil jich bitʼil te sjokinel ta wayel te machʼa ma jaʼuk nujpunemik soke, te antsiwej sok te antsinel o yantikxan tulan muliletik te ya yichʼ pasel teme ma sujtes yoʼtanik «ma ba ya x-akʼbot yichʼik te [«ajwalinel», XCD] yuʼun te Diose» (Gálatas 5:19-21; 1 Corintios 6:9-11). Te j-abatetik yuʼun te Jehová junax ya yakʼ sbaik manchukme yanyantik te nación yuʼunike (Romanos 2:11; Efesios 4:1-6). Jaʼnix jich ya skʼan te lekuk yoʼtanik sok te yakuk skoltay te yermanotakik te jun xchʼuunel yoʼtanik soke (2 Corintios 9:7). Te jpuk kʼop Pablo la yalbey te jchʼuunjeletik te akʼa yalbeyik ta jamal te Jehová te bin ay ta yoʼtanik sok jich la yaltiklambey: «Kʼoponaik Dios spisil ora» (1 Tesalonicenses 5:17, XCD; 2 Tesalonicenses 3:1; Filipenses 4:6, 7). Jaʼukmeto, teme ya skʼan te ya x-aʼiybot te skʼopik yuʼun te Diose, yame skʼan te yakuk skʼoponik sok xchʼuunel yoʼtanik (Hebreos 11:6).

¿Bintik tsitsel la yakʼ te Pablo ta stojol te jayeb machʼatik ay ta jwol nae? Te winiketik te nujpunemik yame skʼan te kʼuxuk ta yoʼtanik te yinamik jich bitʼil te kʼux ya yaʼiy sba stukele. Jaʼnix jich te inamiletik ya skʼan te yakuk yichʼik ta mukʼ sok yoʼtanik te smamlalike. Sokxan te Dios ya skʼan te yakuk xchʼuunbeyik smantal smeʼstatik te alnichʼanetike. Te meʼiltatiletik ya skʼan te yakuk stojobtesik sok xkʼuxul yoʼtanik te yal xnichʼnabik jich bitʼil ya yal te Bibliae (Efesios 5:22–6:4; Colosenses 3:18-21).

Te skʼanojel yoʼtan te Dios. Te Leyetik yuʼun Moisés kanantayotik sok tojobtesotik yuʼun te israeletik jaʼto te kʼalal jul te Mesías albil skʼoplale, jaʼukmeto, te machʼatik xchʼuunejik te Cristo maba sujbilikix te ya yichʼik ta mukʼ te Leyetik ini (Gálatas 3:24). Ta carta yuʼun Hebreos —te jaʼ jchʼuunjeletik yuʼun Cristo te stsʼumbal judío— tey la yalbey skʼoplal te Pablo te bin swentail te la yichʼ akʼel te Leyetik yuʼun Moisés sok te bitʼil la yichʼ pasbeyel skʼanojel yoʼtan te Dios ta stojol  te Cristoe. Sok ay chaʼoxchajp Leyetik yuʼun Moisés te kʼotik ta pasel ta patil. Jich bitʼil te chikʼbil majtʼanil yuʼun te chambalametik, jaʼ señail kʼot te bitʼil la yakʼ sba ta majtʼanil te Jesuse, te banti la stojbotik jmultik ta jpisiltik ta jkʼaxelnax (Hebreos 10:1-4). Te chapbil kʼop yuʼun te Ley pokoʼubix jilel te kʼalal la yakʼ sba ta lajel te Cristoe (Colosenses 2:13-17; Hebreos 8:13).

Chapal ta lek te bin utʼil ya yichʼ pasel te tsobleje. Te winiketik te ya yichʼ yaʼtelik ta stojol te jchʼuunjeletik te banti ya stsob sbaike, ya skʼan te lekuk ya yakʼik ta ilel stalelik ta xkuxlejalik sok te yakuk spasik te bin ya xkʼanbotik yuʼun te Diose (1 Timoteo 3:1-10, 12, 13; Tito 1:5-9). Soknix bayal skʼoplal te spisiluk ora ya stsob sbaik te j-abatetik yuʼun Dios ta yaʼiyel te skʼop Diose sok te ya smukʼtesbey sba yoʼtanike. Ta tsoblej ya yakʼbotik yip koʼtantik soknix ya snojptesotik (1 Corintios 14:26, 31; Hebreos 10:24, 25).

Ay ta Roma yan buelta-a te Pablo te kʼalal la stsʼibay te xchebal sjun Timoteo te jaʼ slajibal scarta, tey chukul-a sok yak ta smaliyel te ya yichʼ chajpanele. Chaʼoxtulnax jchʼuunjeletik yuʼun Cristo te ma xiw yoʼtanik bajtʼ yulaʼtayik te Pabloe. Jich bitʼil te jpuk kʼop ini snaʼojix-a te nopol ya xlajix te xkuxlejal, jich yuʼun la stsʼibay «la kakʼbeyix te lekil tsaltamba, juʼix kuʼun te animal, jkanantayej te bin ay ta chʼuunel» (2 Timoteo 4:7). Ta patil maniwan jalukix kʼajkʼal-a te la yichʼ milele. Jaʼukmeto, te cartaetik yuʼune ya skʼoltay te smelelil jchʼuunjeletik yuʼun Cristo ta kʼajkʼal ini.

(Lokʼem ta Romanos, 1 Corintios, 2 Corintios, Gálatas, Efesios, Filipenses, Colosenses, 1 Tesalonicenses, 2 Tesalonicenses, 1 Timoteo, 2 Timoteo, Tito, Filemón sok Hebreos.)